​សហរដ្ឋអាមេរិក៖ នគរបាល​បាន​និយាយ​កាលពី​ថ្ងៃអាទិត្យ​ថា ខ្មាន់កាំភ្លើង​ម្នាក់​បាន​បាញ់សម្លាប់​មនុស្ស ​២​នាក់ និង​បាន​បណ្ដាល​ឲ្យ​មនុស្ស​ ៤​នាក់​រង​របួសរួម​ទាំងមន្ត្រីនគរបាល​ ៣​នាក់ មុន​ពេល​ជនសង្ស័យ​ធ្វើ​អត្តឃាត​នៅផ្ទះ​មួយ​កន្លែង​ក្នុង​តំបន់ Dallas-Fort Worth ក្នុង​រដ្ឋ Texas សហរដ្ឋអាមេរិក​។ នគរបាល​បាន​និយាយ​ថា មនុស្ស ​៤​នាក់​ដែល​រង​របួស​មិន​គំរាមកំហែង​ដល់​អាយុជីវិត​ទេ​។

​លោក Rick Alexander បាន​និយាយ​កាលពី​ថ្ងៃអាទិត្យ​ថា ការបាញ់បោះ​ដោយ​សេរី​នេះ​បាន​កើត​ឡើង​នៅ​ម៉ោង​ 6:45យប់​ថ្ងៃ​សៅរ៍ នៅ​ពេល​ក្រុមមន្ត្រី​បានទទួល​របាយការណ៍​ពី​ការ​បាញ់​ប្រហារ​នៅ​ក្នុង​ទីក្រុង​ជិតខាង Haltom City។ លោក Alexander បាន​និយាយ​ថា មាន​សេចក្ដីរាយការណ៍​ថា មនុស្ស ​២​នាក់​ត្រូវ​បាន​បាញ់សម្លាប់ ​ម្នាក់​ឈ្មោះ Collin Davis វ័យ​ ៣៣​ឆ្នាំ ​និង​ម្នាក់​ឈ្មោះ Amber Tsai វ័យ ៣២​ឆ្នាំ​។ លោក Alexander បាន​ឲ្យ​ដឹង​ថា ជនរងគ្រោះ​ Tsai ត្រូវ​បាន​រក​ឃើញ​សម្លាប់​នៅ​ក្នុង​ផ្ទះ ចំណែក Davis ត្រូវ​បាន​រក​ឃើញ​ស្លាប់​នៅ​ខាងក្រៅ​ផ្ទះ​។ ស្ត្រី​វ័យ​ចំណាស់​ម្នាក់​ដែល​បាន​ទូរស័ព្ទ​ទៅ​លេខ ​911 ប៉ុន្តែ​មិន​ត្រូវ​បាន​បញ្ជាក់​អត្តសញ្ញាណ​ក៏​រង​របួស​ដែរ តែ​មិន​គំរាមកំហែង​ដល់​អាយុជីវិត​ទេ​។

​កាមេរ៉ា​សន្តិសុខ​ថត​ពី​ផ្ទះ​ជិតខាង​កាលពី​ថ្ងៃអាទិត្យ នៅ​សន្និសីទ​សារព័ត៌មាន​បាន​បង្ហាញ​ពី​នគរបាល ​៣​នាក់​ចូល​ទៅ​ក្នុង​ផ្ទះ​នោះ​នៅ​ពេល​មានការ​បាញ់​ប្រហារ​ភ្លាមៗ ​បាន​បង្អាក់​សកម្មភាព​របស់​នគរបាលបណ្ដាល​ឲ្យ​មន្ត្រី ​៣​នាក់​រង​របួស លោក​ថា ក្រុម​មន្ត្រី​បាន​បាញ់​តបត​វិញ ខណៈ​ខ្មាន់កាំភ្លើង​បាន​រត់គេច​ចេញ​ពី​ផ្ទះ​នោះតាម​ទ្វារ​ក្រោយ។​

តាម​ការ​តាម​ដាន​ពីលើ​អាកាស ខ្មាន់កាំភ្លើង​ដែល​ត្រូវ​បាន​គេ​ដឹង​ថា​ មាន​អាយុ ២៨​ឆ្នាំ​ឈ្មោះ Edward Freyman បាន​បាញ់សម្លាប់​ខ្លួន​ឯង និង​ត្រូវ​បាន​រក​ឃើញ​កាំភ្លើង​វែង ដូចជា​អាវុធ​របស់​កងកម្លាំង​យោធា និង​កាំភ្លើងខ្លី​មួយ​ដើម។ លោក Cody Phillips ស្នងការ​នគរបាល​រដ្ឋ Texas បាន​និយាយ​ថា ខ្មាន់កាំភ្លើង និង​មនុស្ស​ ២​នាក់​ដែល​បាន​ស្លាប់ ម្នាក់​ស្គាល់​ខ្មាន់កាំភ្លើង ប៉ុន្តែ​មិនទាន់​អាច​បញ្ជាក់​ច្បាស់​ពី​ទំនាក់​ទំនង​របស់​ពួកគេ​ភ្លាមៗ​នៅឡើយ​ទេ​។ ទីភ្នាក់ងារ​ស៊ើបអង្កេត​រដ្ឋ Texas Rangers បាន​ធ្វើ​ការ​ស៊ើបអង្កេត​ហើយ តែ​ពុំ​ទាន់​មានការ​បញ្ជាក់​សកម្មភាព​សង្ស័យ​ណាមួយ​ ពាក់ព័ន្ធ​នឹង​ការ​បាញ់​ប្រហារ​នេះ​នៅឡើយ​ទេ​៕

អត្ថបទ៖ សុខមាន