ភ្នំពេញ៖ បេឡាជាតិរបបសន្តិសុខសង្គម នឹងចាប់ផ្តើមការអនុវត្តបង់ភាគលើរបបប្រាក់សោធន សម្រាប់សហគ្រាស គ្រឹះស្ថាន ចាប់ពីថ្ងៃទី១ ខែតុលាខាងមុខ បន្ទាប់ពីរបបសន្តិសុខសង្គម​ផ្នែក​ប្រាក់សោធន បានដាក់ឲ្យអនុវត្តនៅក្នុងឆ្នាំ២០២២នេះ សម្រាប់បុគ្គលដែលស្ថិតនៅក្រោមបទ​ប្បញ្ញត្តិនៃច្បាប់ស្តីពីការងារ។

ឯកឧត្តម ហេង សុផាន់ណារិទ្ធ ប្រធាននាយកដ្ឋានសេវាអតិថិជន និងទំនាក់ទំនងសាធារណៈ និងជាអ្នកនាំពាក្យ នៃបេឡាជាតិរបបសន្តិសុខសង្គម ហៅកាត់ ប.ស.ស. បានឲ្យទូរទស្សន៍ព័ត៌មាន ប៊ីធីវី ដឹងនៅព្រឹកថ្ងៃទី៤ ខែកក្កដានេះថា អនុក្រឹត្យថ្មី មានវិសាលភាព អនុវត្តចំពោះបុគ្គលទាំង​ឡាយណា ​ដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ ដោយរាប់បញ្ចូលទាំងបុគ្គល​ដែល​ធ្វើការចាប់ពី ​២កន្លែងឡើងទៅ។

ឯកឧត្តម បានឲ្យដឹងទៀតថា ក្នុងចន្លោះពេលពីថ្ងៃទី១ ខែកក្កដា ដល់ថ្ងៃទី១ ខែតុលា ឆ្នាំ២០២២ ក្រុមការងារ ប.ស.ស នឹងចុះផ្សព្វផ្សាយសហគ្រាសូទាំងប្រទេសតែម្តង ដើម្បីចុះទៅពន្យល់​​សហគ្រាស គ្រឹះស្ថាន ឲ្យបានយល់​ ក៏ដូចជកម្មករនិយោជិតឲ្យគាត់យល់ពីកាតព្វកិច្ចដែល​ត្រូវបង់​ភាគទានមក ប.ស.ស ដើម្បីទទួលបានប្រាក់សោធននិវត្តន៍នៅពេលអនាគត។

ឯកឧត្តមប្រធាន បានបញ្ជាក់ថា បច្ចុប្បន្ន មិនទាន់មានគោលការណ៍នៅឡើយទេ ប៉ុន្តែយើងកំពុង​តែ​ធ្វើការសិក្សាទៅលើពួកគាត់។ ឯកឧត្តម បន្ថែមថា យើងក៏កំពុងរៀបចំលិខិតបទដ្ឋានមួយទៀត ដើម្បី​ឲ្យពួកគាត់ចូលទៅក្នុងប្រព័ន្ធទាំងអស់ក្នុងរបបទាំងឡាយ ដូចទៅនឹងកម្មករនិយោជិតទាំង​អស់​ផងដែរ ដែលឲ្យពួកគាត់បង់ភាគទានមកបេឡាជាតិរបបសន្តិសុខសង្គម ហើយពួកគាត់នឹង​ទទួល​បាន​របបទាំងនោះដូចគ្នា។

សូមជម្រាបជូនថា ការបង់ភាគលើរបបប្រាក់សោធននេះ សម្រាប់រយៈពេល ៥ឆ្នាំដំបូង ត្រូវកំណត់ក្នុងអត្រាស្មើនឹង​ ៤ភាគរយ ​នៃប្រាក់ឈ្នួលជាប់ភាគទាន។

ក្នុងនោះ ២ភាគរយ ជាបន្ទុកនិយោជក​ និង ២ភាគរយ​ ជាបន្ទុកកម្មករនិយោជិត។ ការបង់ភាគទាន​ផ្នែកប្រាក់​សោធន​ត្រូវធ្វើជាប្រចាំខែ៕អត្ថបទ៖ ឈិត បូរ៉ាវី