កណ្ដាល៖ ដំណើរការចាក់វ៉ាក់សាំងការពារកូវីដ១៩​ នៅខេត្តកណ្តាល ហាក់មានសន្ទស្សន៍​លឿន​ឡើងវិញ បន្ទាប់ពីក្រសួងសុខាភិបាលបានប្រកាសរកឃើញករណីកើតឡើងវិញ​នៃការរាតត្បាត​កូវីដ១៩ និងកូវីដអូមីក្រុង លើអ្នកដំណើរអន្តរជាតិផង និងប្រពលរដ្ឋនៅក្នុងសហគមន៍។

បើតាមវេជ្ជបណ្ឌិត លី មករា ប្រធានមន្ទីរពេទ្យជ័យជំនះ ដែលជាមន្ទីរពេទ្យធំជាងគេនៅក្នុង​ខេត្តកណ្តាល ​បានថ្លែងប្រាប់BTVនៅថ្ងៃទី៤ ខែកក្ដដានេះថា ​បច្ចុប្បន្ននៅក្នុងមន្ទីរពេទ្យជ័យជំនះ បាននឹង​កំពុងដំណើរការចាក់វ៉ាក់សាំងការពារកូវីដ១៩ ចាប់ពីដូសទី១ រហូតដល់ដូសទី៥ ហើយ​បន្ទាប់​ពីក្រសួងសុខាភិបាលបានប្រកាសរកឃើញករណីកើតឡើងវិញ​នៃការរាតត្បាតកូវីដ១៩មក ក្នុងរយៈពេលប្រមាណ ១សប្តាហ៍មកនេះ បណ្តាពលរដ្ឋបានមកចាក់វ៉ាក់​សាំង​ដូស​ជំរុញ​ស្រប​ការ​ណាត់​របស់ក្រុមពេទ្យបានច្រើន​ ជាពិសេសសម្រាប់ពលរដ្ឋដែលត្រូវចាក់ដូសទី៣ដល់ដូសទី៥។

សម្រាប់បណ្តាពលរដ្ឋវិញ ​នៅក្នុង​អំឡុងពេលនេះ ហាក់មានការយល់ដឹងច្រើនអំពី​ការ​ចាក់វ៉ាក់​សាំងដូស​​ជំរុញ ក្នុងការពង្រឹង​ភាពសាំង​នៅក្នុងខ្លួន​ និងនៅក្នុងសហគមន៍ ហើយគេបានឆ្លៀត​ពេលវេលាមកចាក់ ​បើទោះគេមានភាពមមាញឹកនៅក្នុងការងារ​ ប្រកប​របរ​រកស៊ីយ៉ាងណាក៏ដោយ។

​បើតាមវេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាល​ខេត្តកណ្តាល ​បានថ្លែងជា នៅក្នុងអំឡុង​ពេលនេះ នៅគ្រប់មន្ទីរពេទ្យបង្អែក និងមណ្ឌលសុខភាពទាំងអស់នៅក្នុងខេត្តកណ្តាល គឺបាននឹង​កំពុង​ទទួលការចាក់វ៉ាក់សាំងកូវីដ១៩ ​ចាប់ពីដូសទី១ ​រហូតដល់ដូសទី៤ ​ជូនពលរដ្ឋវ័យ៣ឆ្នាំ​ឡើងទៅ ។ ដោយឡែកការចាក់ដូសទី៥ ផ្តល់​ជូនដល់ក្រុម​អាទិភាពជួរមុខ។

វេជ្ជបណ្ឌិត គួយ ប៊ុនធឿន បញ្ជាក់ថា សម្រាប់ការចាក់នៅក្នុងរយៈពេលប្រមាណ ​១សប្តាហ៍នេះ ហាក់មាន​សន្ទស្សន៍លឿន​ ក្នុងនោះ ដូសទី៣ជាមធ្យមចាក់បាន៨៥.៦៧% ​នៃចំនួនគោលដៅសរុប ហើយគិតតែលើក្រុមមនុស្សវ័យចាប់ពី១២ឆ្នាំដល់១៧ឆ្នាំចាក់បានប្រមាណជាង៩០%។ ដោយឡែកដូសទី៤ ជាមធ្យមចាក់បាន១៩% នៃចំនួនគោលដៅសរុប ដោយឡែកដូសទី៥​ចាក់បានប្រមាណជាង ១% នៃចំនួនគោលដៅសរុប។

សម្រាប់ក្រុមក្មេងអាយុ ៣ឆ្នាំដល់៥ឆ្នាំ​ ក្រុមគ្រូពេទ្យខេត្តកណ្តាល បានប្រកាសនឹងចាប់ផ្តើមចាក់​ដូសទី៣​ ចាប់ពីថ្ងៃទី៦​ ខែក​ក្កដានេះតទៅ៕ អត្ថបទ ស៊ុម សុខជា