ភ្នំពេញ៖ ទំហំផ្សារនៃពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា បានកើនឡើងជាលំដាប់ ខណៈរាជរដ្ឋាភិបាល តាមរយៈក្រសួងពាណិជ្ជកម្ម តម្រូវឱ្យអាជីវកម្ម ពាណិជ្ជកម្ម ចុះបញ្ជី ដើម្បីទទួលសិទ្ធស្របច្បាប់នៃពាណិជ្ជកម្មតាមប្រព័ន្ធអេឡិចត្រូនិក។

ក្រសួងពាណិជ្ជកម្ម បានឲ្យដឹងថា ទំហំទីផ្សារសរុបនៃការធ្វើពាណិជ្ជកម្មតាមប្រព័ន្ធអេឡិចត្រូនិក​នៅកម្ពុជា ក្នុងឆ្នាំ២០២១ មានតម្លៃទឹកប្រាក់ ៩៧០,១លានដុល្លារ បានកើនឡើងពី ៨១៣,២៥លានដុល្លារ ក្នុងឆ្នាំ ២០២០។

របាយការណ៍ក្រសួងពាណិជ្ជកម្ម បង្ហាញថា ចំណូលនៃពាណិជ្ជកម្មតាមប្រព័ន្ធអេឡិចត្រូនិកតាម​វិស័យ​នីមួយៗ កាលពីឆ្នាំ ២០២១ រួមមាន៖ សំលៀកបំពាក់ ២៦៣,៣០លានដុល្លារ, គ្រឿង​អេឡិចត្រូនិក ២៥៤,៤លានដុល្លារ, គ្រឿងសម្អាង ​ផលិតផលសុខភាព ​និងសម្ភារៈប្រើប្រាស់ ២៣០,៥លានដុល្លារ, សម្ភារៈក្មេងលេង ​សម្ភារៈកម្សាន្ត និងសម្ភារៈកែច្នៃផ្សេងៗ ៦២,៩៤លានដុល្លារ, ម្ហូបអាហារ ៥៧,១៩លានដុល្លារ, គ្រឿង​សង្ហារិម ៤៦,២៩លានដុល្លារ ​និងប្រព័ន្ធផ្សព្វផ្សាយ ១១,១៩លានដុល្លារ។

យោងតាមរបាយការណ៍ដដែល ចំនួនអ្នកប្រើប្រាស់អ៊ិនធើណេត នៅកម្ពុជា មានជាង១៣លាននាក់ ខណៈចំនួនអ្នកប្រើប្រាស់ស៊ីមកាតទូរស័ព្ទមានចំនួន ២២លាននាក់។

តាមការប៉ាន់ប្រមាណនៅឆ្នាំ ២០២២នេះ ទំហំ​ទីផ្សារនៃការធ្វើពាណិជ្ជកម្មតាមប្រព័ន្ធអេឡិចត្រូនិក​នៅកម្ពុជា ​នឹងកើនដល់ប្រមាណ ១១១៧,២៩លានដុល្លារ ​និងបន្តកើនដល់ប្រមាណ ១៧៨២,៣៤ លានដុល្លារ នៅឆ្នាំ ២០២៥ខាងមុខ។

ក្រសួងពាណិជ្ជកម្ម បានតម្រូវឲ្យម្ចាស់អាជីវកម្មអនឡាញទាំងអស់នៅទូទាំងប្រទេស មកធ្វើការ​ចុះ​បញ្ជីនៅក្រសួង ​ដើម្បីចៀសវាងការផាកពិន័យដែលនឹងចាប់ផ្តើមអនុវត្តចាប់ពីខែកក្កដា ​ឆ្នាំ ២០២២។

សូមបញ្ជាក់ថា ច្បាប់ស្តីពីពាណិជ្ជកម្មតាមប្រព័ន្ធ​អេឡិចត្រូនិកដែលចូល​ជាធរមានកាលពី​ចុង​ឆ្នាំ​២០២០ បានដើរតួនាទីជាមូលដ្ឋានច្បាប់ដ៏សំខាន់ ​សម្រាប់ការអភិវឌ្ឍវិស័យពាណិជ្ជកម្មតាម​ប្រព័ន្ធ​អេឡិចត្រូនិក ​ជាពិសេសដើម្បីការពារផលប្រយោជន៍ ​និងបង្កើត​ទំនាក់ទំនង​ប្រកបដោយ​ទំនុក​ចិត្តខ្ពស់​ជាមួយអ្នកប្រើប្រាស់អេឡិចត្រូនិក​ ក៏ដូចជា ​ដើម្បីទាក់ទាញវិនិយោគិនក្នុងស្រុក និង​បរទេសឲ្យមកបណ្តាក់ទុននៅកម្ពុជា៕ អត្ថបទ៖ វណ្ណៈ