​​អ៊ុយ​ក្រែ​ន៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​និយាយ​ថា កងកម្លាំង​របស់​ទីក្រុង Kyiv នៅតែ​ប្រយុទ្ធ​ជាមួយ​ទាហាន​រុស្ស៊ី​នៅ​ជាយក្រុង Lysychansk ប៉ុន្តែ​វា​ជា​ស្ថានភាព​លំបាក និង​គ្រោះថ្នាក់​ខ្លាំង​។ លោក Zelenskyy បាន​ថ្លែង​នៅក្នុង​សន្និសីទ​សារព័ត៌មាន​រួមគ្នា ​ជាមួយ​នាយករដ្ឋមន្ត្រី​អូស្ត្រាលីលោក Anthony Albanese ដែល​បានប្រកាស​ជំនួយ​យោធា​របស់​អូស្ត្រាលី​បន្ថែមទៀត ​សម្រាប់​ប្រទេស​អ៊ុយ​ក្រែ​ន​។

លោក Zelenskyy បាន​ថ្លែង​នៅក្នុង​សន្និសីទ​សារព័ត៌មាន​ក្នុង​ទីក្រុង Kyiv ថា ​កងកម្លាំងប្រដាប់អាវុធ​របស់​យើង​កំពុងធ្វើ​អ្វី​គ្រប់យ៉ាង​ដែល​ពួកគេ​អាចធ្វើ​បាន​។ លោក​បាន​ទទួលស្គាល់ថា កងកម្លាំង​រុស្ស៊ី​ទទួលបាន​ប្រយោជន៍​នៅក្នុង​ទីក្រុង​នេះ ដោយ​លោក​បានចាត់ទុក​វា​ថា ​ជា​កន្លែង​ទន់ខ្សោយ​របស់​យោធា​អ៊ុយ​ក្រែ​ន​។​ ​ការដណ្តើមយក​ទីក្រុង Lysychansk នឹង​ផ្តល់ឱ្យ​រុស្ស៊ី​នូវ​ទឹកដី​បន្ថែមទៀត ដើម្បី​បង្កើន​ការវាយប្រហារ​លើ​តំបន់ Donetsk ខណៈ​ពួកគេ​ជំរុញ​យុទ្ធនាការ​នៅក្នុង​តំបន់ Donbas ជា​តំបន់​មាន​អណ្តូងរ៉ែ និង​រោងចក្រ ជា​កន្លែង​ដែល​ក្រុម​ផ្តាច់ខ្លួន​គាំទ្រ​ដោយ​ទីក្រុង​មូ​ស្គូ បាន​ប្រយុទ្ធ​ជាមួយ​កងកម្លាំង​អ៊ុយ​ក្រែ​ន​ចាប់តាំងពី​ឆ្នាំ2014។​

​ប្រសិនបើ​រុស្ស៊ី​ទទួលបាន​ជ័យជំនះ​នៅ​តំបន់ Donbas អ៊ុយ​ក្រែ​ន​នឹង​បាត់បង់​មិន​ត្រឹមតែ​ទឹកដី​ប៉ុណ្ណោះ​ទេ ប៉ុន្តែ​ទំនងជា​ភាគច្រើន​នៃ​កងកម្លាំង​យោធា​ដែលមាន​សមត្ថភាព​បំផុត​របស់ខ្លួន ដែល​បើកផ្លូវ​ឱ្យ​ទីក្រុង​មូ​ស្គូ​ដណ្តើមយក​ទឹកដី​បន្ថែម​ទៀត និង​ពង្រឹងសមត្ថភាព​របស់​ខ្លួន​ ដើម្បី​កំណត់​លក្ខខណ្ឌ​សម្រាប់​ទីក្រុង​គី​វ​។ ក្នុងជំនួប​ជាមួយ​ប្រធានាធិបតី​អ៊ុយ​ក្រែ​ន នាយករដ្ឋមន្ត្រី​អូស្ត្រាលីលោក Anthony Albanese បានប្រកាស​ពី​ការបន្ថែម​បញ្ជី​ដាក់ទណ្ឌកម្ម​លើ​រដ្ឋមន្ត្រី និងអ្នកមានអំណាច​របស់​រុស្ស៊ី​។ មុនពេល​ជំនួប​ជាមួយលោក Zelenskyy លោក Albanese បាន​ទៅ​ពិនិត្យមើលទីក្រុង Irpin, Bucha និង Hostomel ដែល​ហែកហួរ​ដោយ​សង្គ្រាម៕

អត្ថបទ៖ ប៊ុនថន