កោះកុង៖ រដ្ឋបាលខេត្តកោះកុង សមាគមអតីតយុទ្ធជន និងមន្ទីរអង្គភាពពាក់ព័ន្ធ បាននឹងកំពុងផ្តោតការយក ចិត្តទុកដាក់ខ្ពស់ទៅលើអតីតយុទ្ធជន តបនឹងគុណបំណាច់បម្រើសង្គមជាតិកន្លងទៅមក។
នៅព្រឹកថ្ងៃទី៤ ខែកក្កដានេះ លោកជំទាវ មិថុនា ភូថង អភិបាលខេត្តកោះកុង បានបញ្ជាក់ថា សមាគម និងមន្ទីរអង្គភាពជុំវិញខេត្ត បានសម្របសម្រួលដោះស្រាយឧបត្ថម្ភស្បៀងអាហារ ថវិកាសម្រាប់ជីវភាពខ្វះខាត ផ្ដល់ការពិនិត្យព្យាបាលជំងឺផ្សេងៗ កសាងផ្ទះសម្បែង និងការផ្តល់ប័ណ្ណក្រីក្រជូនដល់យុទ្ធជននិវត្តន៍ជន និងជនមានពិការភាព ។ល។បន្ថែមលើយន្តការយកចិត្តទុកដាក់ដល់ជីវភាពអតីតយុទ្ធជនរដ្ឋបាល ខេត្តកោះកុង ក៏កំពុងពិនិត្យដោះស្រាយផលប៉ះពាល់នានាផងដែរ មុននឹងផ្តល់ដីសម្បទានសង្គមកិច្ចជូន អតីតយុទ្ធជន ។
ក្រុមអតីតយុទ្ធជននៅខេត្តកោះកុង បានឱ្យដឹងថា រដ្ឋបាលខេត្ត សមាគមអតីតយុទ្ធជន និងរាជរដ្ឋាភិបាលកម្ពុជា គឺពិតជាមានយកចិត្តទុកដាក់ទៅជីវភាពរស់នៅរបស់ពួកគេពិតប្រាកដមែន តាមរយៈការផ្តល់ស្បៀងអាហារជាប្រចាំ ពិនិត្យសុខភាព ព្យាបាលជំងឺ និងប្រាក់ឧបត្ថម្ភ ។
ចំពោះបញ្ហាដីធ្លីសម្រាប់បង្កបង្កើនផល សមាគមអតីតយុទ្ធជន បានស្រង់ស្ថិតិរួចរាល់ហើយ រង់ចាំតែថ្ងៃខែចូលអាស្រ័យផលប៉ុណ្ណោះ។
អតីតយុទ្ធជននៅខេត្តកោះកុង ទាំងសមាជិកថ្មី និងចាស់មានជាង ៨០០នាក់ ដោយកំពុងទទួល បានកិច្ចគាំពារទៅតាមគោលនយោបាយរបស់រាជរដ្ឋាភិបាល តាមរយៈសេវាបេឡាសន្តិសុខជាតិ៕
អត្ថបទ៖ ឈឹម មករា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
