បាត់ដំបង៖ អភិបាលខេត្តបាត់ដំបង ឯកឧត្តម សុខ លូ បាន​អំពាវនាវ​ឱ្យប្រជាពលរដ្ឋទៅ​ចាក់វ៉ាក់​សាំងកូវីដ-១៩ ពិសេសដូសជំរុញឱ្យបានគ្រប់ៗគ្នា​ និងបន្តអនុវត្តវិធានការសុខាភិបាល និង​វិធាន​ការ៣កុំ ៣ការពារឱ្យបាន​ខ្ជាប់ខ្ជួន​ ដើម្បីទប់ស្កាត់ការឆ្លងរីករាលដាលខ្លាំងឡើងវិញនៃជំងឺកូវីដ-១៩។

ក្នុងឱកាសនាំយកអំណោយមនុស្សធម៌​ របស់សាខាកាកបាទក្រហមកម្ពុជា ខេត្តបាត់ដំបង ចែកជូន​ពលរដ្ឋ​ងាយរងគ្រោះប្រមាណ ៥០០គ្រួសារ ក្នុងសង្កាត់អូរចា ​ក្រុងបាត់ដំបង នៅព្រឹកថ្ងៃទី៤ ខែកក្កដានេះ ឯកឧត្តម សុខ លូ បានណែនាំ​ប្រជាពលរដ្ឋឱ្យទៅ​ចាក់​វ៉ាក់សាំង​ដូស​ជំរុញ​ឱ្យបាន​គ្រប់ៗ​គ្នា ខណៈអ្នកមិនបានចាក់ដូសជំរុញជាមុខ​សញ្ញា​ប្រឈមគួរឱ្យ​ព្រួយបារម្ភ​ ក្នុង​ករណីជំងឺកូវីដ-១៩ផ្ទុះឡើងវិញ។

ឯកឧត្តម អភិបាលខេត្តបាត់ដំបង ​បានបញ្ជាក់បន្ថែមថា អាជ្ញាធរ​បាន​សហការជាមួយក្រុមគ្រូពេទ្យ ពង្រាយ​ទីតាំងចាក់វ៉ាក់សាំងនៅតាមផ្សារ​ និងទីប្រជុំជន​បន្ថែមពីលើទីតាំងដែលមានស្រាប់​ជា​ច្រើន​កន្លែង ​សំដៅបង្កលក្ខណៈ​ងាយស្រួល​ដល់ប្រជាពលរដ្ឋ ​និង​ដើម្បីបង្កើនល្បឿនការចាក់វ៉ាក់សាំង។

បន្ទាប់ពីក្រសួងសុខាភិបាល ​បានប្រកាសពីការរកឃើញករណីឆ្លងជំងឺកូវីដ-១៩ ​ក្នុងសហគមន៍ ឡើងវិញ​ ប្រជាពលរដ្ឋហាក់មានការភ្ញាក់រលឹក​ទៅទទួលការចាក់វ៉ាក់សាំង​ដូសជំរុញច្រើនជាងមុន៕

អត្ថបទ៖ នឿត សុភក្ត្រ