ប៊ុលហ្គារី៖ អ្នកការទូតរុស្ស៊ីបានមកដល់អាកាសយានដ្ឋាន Sofia បន្ទាប់ពីត្រូវបានបណ្តេញចេញពីប្រទេសប៊ុលហ្គារី។ អ្នកការទូតរុស្ស៊ីម្នាក់បាននិយាយថា យន្តហោះរុស្ស៊ីពីរគ្រឿងបានចាកចេញពីប្រទេសប៊ុលហ្គារីកាលពីថ្ងៃអាទិត្យ ដោយមានបុគ្គលិកការទូតរុស្ស៊ីជាច្រើននាក់ និងក្រុមគ្រួសាររបស់ពួកគេ ក្នុងពេលមានការបណ្តេញចេញដែលបណ្តាលឱ្យភាពតានតឹងកើនឡើង រវាងប្រទេសជិតស្និទ្ធជាប្រវត្តិសាស្ត្រទាំងពីរនេះ។
លោក Filip Voskresenski អ្នកការទូតជាន់ខ្ពស់រុស្ស៊ីបាននិយាយទៅកាន់អ្នកសារព័ត៌មាន នៅអាកាសយានដ្ឋានក្នុងរដ្ឋធានី Sofia ប្រទេសប៊ុលហ្គារីមុនពេលជើងហោះហើរចាកចេញថា លោកស្ថិតក្នុងចំណោមបុគ្គលិកការទូតរុស្ស៊ីចំនួន 70នាក់ដែលបានប្រកាសថា ពួកគេលែងត្រូវបានស្វាគមន៍កាលពីសប្តាហ៍មុន ហើយបានបង្គាប់ឱ្យចាកចេញពីប្រទេសនេះនៅត្រឹមល្ងាចថ្ងៃអាទិត្យ។ ការសម្រេចចិត្តក្នុងការបណ្តេញអ្នកការទូតចេញរបស់ប្រទេសប៊ុលហ្គារី ត្រូវបានប្រកាសដោយនាយករដ្ឋមន្ត្រីស្តីទីលោក Kiril Petkov ដែលបានប្រកាន់ជំហររឹងមាំប្រឆាំងរុស្ស៊ី បន្ទាប់ពីរុស្ស៊ីបានវាយលុកលើអ៊ុយក្រែនចាប់តាំងពីថ្ងៃទី24 ខែកុម្ភៈ។
កាលពីថ្ងៃសុក្រ ឯកអគ្គរដ្ឋទូតរុស្ស៊ីលោក Eleonora Mitrofanova បានចេញឱសានវាទដល់ប្រទេសប៊ុលហ្គារីឲ្យកែប្រែការសម្រេចចិត្តរបស់ខ្លួន និងបានគំរាមថា ទីក្រុងមូស្គូនឹងកាត់ផ្តាច់ទំនាក់ទំនងការទូតទាំងស្រុង។ ការបណ្តេញចេញ បានធ្វើឲ្យទំនាក់ទំនងផ្នែកការទូតកាន់តែមានតានតឹងខ្លាំង ខណៈចំនួនអ្នកការទូតរុស្ស៊ីច្រើនបំផុតមិនធ្លាប់មានត្រូវបានប្រទេសប៊ុលហ្គារីបណ្តេញចេញ ដែលប៊ុលហ្គារីជាសមាជិករបស់សហភាពអឺរ៉ុប និងអង្គការណាតូ។ ប៊ុលហ្គារីបានគាំទ្រយ៉ាងខ្លាំងចំពោះការដាក់ទណ្ឌកម្ម របស់ប្រទេសលោកខាងលិចលើទីក្រុងមូស្គូ ចាប់តាំងពីចាប់ផ្តើមសង្គ្រាមនៅអ៊ុយក្រែនជាងបួនខែកន្លងទៅនេះ។ កាលពីចុងខែមេសា រុស្ស៊ីបានកាត់ផ្តាច់ការផ្គត់ផ្គង់ឧស្ម័នទៅឲ្យប្រទេសប៊ុលហ្គារី បន្ទាប់ពីមន្ត្រីបានបដិសេធការទាមទាររបស់ក្រុងមូស្គូ ក្នុងការបង់ថ្លៃឧស្ម័នជាប្រាក់រូប្លិ៍ (រូបិយប័ណ្ណរបស់រុស្ស៊ី)៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
