បង់ក្លាដែស៖ កម្រិតទឹកបានស្រកចុះនៅតាមដងទន្លេធំៗ នៅតំបន់ភាគឦសានប្រទេសបង់ក្លាដែស ប៉ុន្តែទីក្រុង Sylhet ដែលរងការវាយប្រហារធ្ងន់ធ្ងរដោយទឹកជំនន់នោះនៅតែលិចទឹកដោយផ្នែក។ មនុស្សរាប់សែននាក់ត្រូវបានជម្លៀសទៅកាន់កន្លែងសុវត្ថិភាព ហើយផ្លូវទៅដល់ទីក្រុង Sylhet និង Sunamganj ត្រូវបានកាត់ផ្តាច់បន្ទាប់ពីមានភ្លៀងធ្លាក់ខ្លាំងកាលពីខែមុន។
យោងតាមតួលេខផ្លូវការបានឱ្យដឹងថា មនុស្សជាង 100នាក់បានស្លាប់ចាប់តាំងពីទឹកជំនន់កាលពីពាក់កណ្តាលខែឧសភា។ ប្រជាជនរាប់ពាន់គ្រួសារបន្តរស់នៅក្នុងជម្រកបណ្តោះអាសន្ន ហើយមនុស្សជាច្រើនបានបាត់បង់គោក្របី និងទ្រព្យសម្បត្តិផ្សេងៗទៀត។ សហព័ន្ធកាកបាទក្រហម និងសង្គមអឌ្ឍចន្ទក្រហមអន្តរជាតិបាននិយាយនៅក្នុងសេចក្តីថ្លែងការណ៍កាលពីសប្តាហ៍មុនថា មនុស្សជាង 7លាននាក់នៅក្នុងប្រទេសបង់ក្លាដែសកំពុងត្រូវការទីជម្រក និងជំនួយសង្គ្រោះបន្ទាន់ដោយអស់សង្ឃឹមបន្ទាប់ពីទឹកជំនន់ធ្ងន់ធ្ងរ។ ប្រទេសបង់ក្លាដែសត្រូវបានគេចាត់ទុកថា ជាប្រទេសមួយដែលងាយរងគ្រោះបំផុតចំពោះបម្រែបម្រួលអាកាសធាតុ ហើយប្រជាជនក្រីក្របានរងផលប៉ះពាល់មិនស្មើរគ្នា៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
