ភ្នំពេញ៖ អភិបាលខណ្ឌដូនពេញ លោក សុខ ពេញវុធ បានថ្លែងការកោតសរសើរ និងផ្តាំផ្ញើទៅដល់ចៅ​សង្កាត់ និងចៅសង្កាត់រង ព្រមទាំងសមាជិកក្រុមប្រឹក្សាសង្កាត់ទាំងអស់ ត្រូវបន្តអភិវឌ្ឍន៍មូលដ្ឋានឱ្យកាន់តែរីកចម្រើនបន្ថែមទៀត។

 ការថ្លែងបែបនេះរបស់លោក នៅក្នុងពិធីប្រកាសសុពលភាពក្រុមប្រឹក្សាសង្កាត់ស្រះចក អាណត្តិទី៥ នៃខណ្ឌដូនពេញ រាជធានីភ្នំពេញ កាលពីថ្ងៃទី៣ ខែកក្កដា ឆ្នាំ២០២២។

លោកបន្តថា អាជ្ញាធរសង្កាត់ស្រះចក ត្រូវខិតខំបន្តបំរើប្រជាពលរដ្ឋអោយបានល្អប្រសើរ លើកកម្ពស់ជីវភាព​រស់របស់ប្រជាពលរដ្ឋ តាមរយៈការផ្តល់សេវាសង្គម ការកសាង និងពង្រឹងពង្រីកហេដ្ឋារចនាសម្ព័ន្ធសាធារណៈដែលសំខាន់ចាំបាច់ឱ្យបានកាន់តែប្រសើរឡើង និងប្រកបដោយសមធម៌ បរិយាប័ន និងមានចីវភាពដើម្បីឈានឆ្ពោះទៅរួមចំណែកក្នុងការកាត់បន្ថយភាពក្រីក្ររបស់ប្រជាពលរដ្ឋ។

លោកអភិបាលខណ្ឌ បន្ថែមថា សមាជិកក្រុមប្រឹក្សាសង្កាត់ទាំងអស់ ត្រូវអនុវត្តការងារ តួនាទី និងភារកិច្ច ឱ្យបានសមស្រប តាមសេចក្តីណែនាំរបស់ក្រសួងមហាផ្ទៃ និងសារាចរណែនាំផ្សេងៗរបស់រាជរដ្ឋាភិបាល ព្រមទាំងការធានាបាននូវសាមគ្គីភាពផ្ទៃក្នុង និងការយោគយល់គ្នានៅក្នុងការបំពេញការងាររបស់ខ្លួនផងដែរ។

លោកស្រី អ៊ិន សាផន ប្រធាន ក្រុមប្រឹក្សា និងជាចៅសង្កាត់ស្រះចក អាណត្តិទី៥ បានបញ្ជាក់ថា លោកស្រី នៅតែមានការគោរពដឹងគុណ និងសូមថ្លែងអំណរគុណចំពោះបងប្អូនប្រជាជននៅក្នុងមូលដ្ឋានសង្កាត់​ស្រះចក ដែលតែងតែផ្ដល់ទំនុកចិត្តលើសមត្ថភាពដឹកនាំ និងបំពេញភារកិច្ចរបស់លោកស្រី ព្រមទាំងទឹកចិត្តប្រកបទៅដោយមនោសញ្ចេតនាខ្ពស់ ការបារម្ភ អាណិតស្រឡាញ់ សណ្តោសប្រណី មកលើបង​ប្អូនប្រជាជនទាំងអស់ ដោយគ្មានការរើសអើង​។

ការប្ដេជ្ញាចិត្តរបស់លោកស្រី ក៏បានបញ្ជាក់កាន់តែច្បាស់ថែមទៀតថា : លោកស្រីនៅតែបន្តខិតខំ ប្រឹងប្រែងអភិវឌ្ឍន៍មូលដ្ឋានសង្កាត់ ឱ្យកាន់តែរីកចំរើនថែមទៀត និងរួមចំណែកលើកកំពស់ជីវភាពរស់នៅ របស់បងប្អូនប្រជាជនក្នុងមូលដ្ឋាន រួមចំណេកកាត់បន្ថយភាពក្រីក្រ និងខិតខំអនុវត្តន៍ឱ្យបាននូវរាល់ចំណុច ដែលជាតម្រូវការចាំបាច់របស់ប្រជាជន ហើយដែលបេក្ខជនក្រុមប្រឹក្សាសង្កាត់ស្រះចក របស់គណបក្ស ប្រជាជនកម្ពុជាបានដាក់ចេញនូវគោលនយោបាយអភិវឌ្ឍន៍សង្កាត់ស្រះចក អាណត្តិទី៥ ក្នុងយុទ្ធនាការ ឃោសនាបោះឆ្នោតកន្លងទៅ៕​អត្ថបទ៖ ម៉ក់ រ៉េនីតា