ភ្នំពេញ៖ ឯកឧត្តមបណ្ឌិត ចន ណារិទ្ធ អគ្គលេខាធិការ និងជាអនុប្រធានប្រចាំការគណៈកម្មាធិការប្រតិបត្តិនៃក្រុមប្រឹក្សាជាតិគាំពារសង្គម លើកឡើងនៅក្នុងសិក្ខាសាលាផ្សព្វផ្សាយថ្នាក់ជាតិ ស្ដីពីយុទ្ធសាស្ត្រទំនាក់ទំនង និងផ្សព្វផ្សាយគាំពារសង្គមកម្ពុជា នៅថ្ងៃទី៤ ខែកក្កដា ឆ្នាំ២០២២ នេះថា ការដាក់ឱ្យដំណើរការយុទ្ធសាស្រ្តទំនាក់ទំនង និងផ្សព្វផ្សាយគាំពារសង្គមនៅថ្ងៃនេះ ជាការបោះជំហ៊ានថ្មីមួយ នៃការ ងារទំនាក់ទំនង និងផ្សព្វផ្សាយពាក់ព័ន្ធនឹងកិច្ចគាំពារសង្គម ក្នុងគោលបំណងធ្វើសុខដុមនីយកម្មការងារទំនាក់ទំនង និងផ្សព្វផ្សាយ និងដើម្បីធានាសង្គតិភាព ប្រសិទ្ធភាព ទាំងក្នុងទិដ្ឋភាពគោលនយោបាយ និងការអនុវត្តគោលនយោបាយព្រមទាំងធានាថា ប្រជាពលរដ្ឋក៏ដូចជាអ្នកទទួលផល ទទួលបានព័ត៌មានគ្រប់គ្រាន់ទាន់ពេល និងយល់ពីរបបកម្មវិធីគាំពារសង្គមដែលរាជរដ្ឋាភិបាលដាក់ចេញ។ 

ឯកឧត្តមបណ្ឌិត បន្តថា ការអភិវឌ្ឍប្រព័ន្ធគាំពារសង្គមនៅកម្ពុជា បានកំពុងអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩, ការរៀបចំវគ្គបណ្តុះបណ្តាលវិជ្ជាជីវៈសមស្រប សម្រាប់យុវជនមកពីក្រុមគ្រួសារក្រីក្រ ដើម្បីបង្កើតលទ្ធភាពក្នុងការចាប់យកជំនាញនិងមុខរបរ តាមរយៈការផ្តល់អាហារូបករណ៍ និងមិនបង់ថ្លៃសាលា, និងកំពុងអនុវត្តកម្មវិធីសាច់ប្រាក់ពលកម្ម ដើម្បីលើកកម្ពស់ការអភិវឌ្ឍហេដ្ឋារចនាសម្ព័ន្ធតាមទីជនបទ និងផ្តល់ឱកាសការងារជូនពលរដ្ឋតាមមូលដ្ឋាន, បានរៀបចំការដាក់ឱ្យដំណើរការរបបសន្តិសុខសង្គមផ្នែកសោធន សម្រាប់បុគ្គលទាំងឡាយដែលស្ថិតក្រោមបទប្បញ្ញត្តិនៃច្បាប់ការងារ ដែលប្រមុខរាជរដ្ឋាភិបាលកម្ពុជាបានសម្រេចដាក់ឱ្យអនុវត្តជាផ្លូវការកាលពីថ្ងៃទី១ ខែកក្កដា ឆ្នាំ២០២២ កន្លងទៅនេះ។

លោក កែវ អ៊ូលី ប្រធាននាយកដ្ឋានអត្តសញ្ញាណកម្មគ្រួសារក្រីក្រ នៃក្រសួងផែនការ ថ្លែងឲ្យដឹងថា ទាក់ទងអត្តសញ្ញាណកម្មគ្រួសារក្រីក្រ នៅមុនវិបត្តិនៃជំងឺកូវីដ ១៩ គ្រួសារក្រីក្រីនៅមានកម្ពុជាមានចំនួន ៥២ ម៉ឺនគ្រួសារ ត្រូវប្រមាណជាង ២ លាននាក់, បើគិតខែឧសភា ឆ្នាំ ២០២០ មកដល់ពេលនេះ ក្រសួងរកឃើញគ្រួសារក្រីក្រជិត ២០ម៉ឺនគ្រួសារបន្ថែមទៀត ក្នុងនោះផងដែរក៏មានគ្រួសារខ្លះៗបានចាកចេញពីគ្រួសារក្រីក្រនេះ, ដូច្នេះបើគិតជាសរុបទិន្នន័យគ្រួសារក្រីក្រីចុងក្រោយ កម្ពុជានៅមានក្រួសារក្រីក្រជិត ៧០ ម៉ឺនគ្រួសារ ត្រូវប្រមាណជិត ៣លាននាក់។

ចំណែកការឧបត្តម្ភសាច់ប្រាក់វិញ នៅក្នុងវិបត្តិកូវីដ -១៩នេះ រាជរដ្ឋាភិបាលចំណាយសាច់ប្រាក់ប្រមាណជិត ៣០ម៉ឺនដុល្លារ ក្នុងមួយខែៗ ដើម្បីជួយដល់ប្រជាពលរដ្ឋក្រីក្រ ហើយចំនួននឹងអាចប្រែប្រួលខ្លះៗ ខណៈមាន មានប្រជាពលរដ្ឋចាក់ចេញពីភាពក្រីក្រ៕ អត្ថបទ៖ សុន រ៉ាឌី