ភ្នំពេញ៖ ក្រសួងសុខាភិបាលរៀបចំផែនការសំដៅកាត់បន្ថយអត្រាឆ្លង និងអត្រាស្លាប់ជំងឺរបេងនេះ ឲ្យលែងជាបញ្ហាសុខភាពសាធារណៈ និងស្របតាមទិសដៅអន្តរជាតិ នៅឆ្នាំ២០៣០ខាងមុខ។

ក្នុងកិច្ចប្រជុំបូកសរុបលទ្ធផលគម្រោងសិក្សា TB-Speed ថ្នាក់ជាតិ ដែលរៀបចំដោយមជ្ឈមណ្ឌល​ជាតិ​កំចាត់​រោគរបេង និងហង់សិន រួមជាមួយវិទ្យាស្ថានប៉ាស្ទ័រកម្ពុជា សហការជាមួយដៃគូ ដែល​ប្រព្រឹត្តឡើងរយៈពេល២ថ្ងៃ ចាប់ពីថ្ងៃទី៥-៦ ខែកក្កដា ឆ្នាំ២០២២ ក្រោមវត្តមានឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាលដោយមានការចូលរួមពីឯកឧត្តម Jacques Pellet ឯកអគ្គរដ្ឋទូតបារាំង ប្រចាំព្រះរាជាណាចក្រកម្ពុជា ​ឯកឧត្តម Fabrice Etienne ទីប្រឹក្សាទី១ នៃស្ថានទូត​បារាំង ប្រចាំព្រះរាជាណាចក្រកម្ពុជា លោកសាស្រ្តាចារ្យ Andre Spiegel នាយកវិទ្យា​ស្ថាន​ប៉ាស្ទ័រកម្ពុជា លោកវេជ្ជបណ្ឌិត Olivier Marcy នាយកគម្រោងសិក្សាស្តីពីជំងឺរបេង TB-Speed អន្តរជាតិ និងលោកស្រីវេជ្ជបណ្ឌិត Laurence Borand សហប្រធានស្រាវជ្រាវគម្រោងសិក្សា​ស្តីពី​ជំងឺរបេង TB-Speed។

ឯកឧត្តម រដ្ឋមន្រី្ត បានថ្លែងថា គម្រោងសិក្សាស្រាវជ្រាវTB-Speed មានគោលបំណង ដើម្បីកាត់​បន្ថយ​អត្រា​មរណៈក្នុងចំណោមកុមារ ​តាមរយៈការធ្វើឲ្យប្រសើរឡើង ការធ្វើរោគ​វិនិច្ឆ័យ​ជំងឺ​របេងកុមារ ដោយប្រើវិធីសាស្រ្ត ​រាប់បញ្ចូល​ទាំងការបឺតយកសំណាកតាមចម្រុះ និងហ្វេរាំង រួមជាមួយ​នឹងការធ្វើវិមជ្ឈការ នៃការធ្វើរោគវិនិច្ឆ័យជំងឺរបេងទៅមន្ទីរពេទ្យបង្អែកស្រុក និងមណ្ឌលសុខភាព សំដៅបង្ខិតសេវាធ្វើឲ្យដល់ក្បែរប្រជាជន និងដើម្បីធ្វើរោគវិនិច្ឆ័យជំងឺរបេង ក្នុងចំណោមកុមារងាយរងគ្រោះបំផុត ដែលរួមមានដូចជា កុមារដែលទទួលរងនូវជំងឺ​រលាកសួត​ធ្ងន់ធ្ងរ កុមារកង្វះ​អាហារូបត្ថម្ភ ​និងកុមារដែលរស់នៅជាមួយមេរោគអេដស៍ជាដើម។

យោងតាមលោកវេជ្ជបណ្ឌិត ហួត ចាន់យុដា ប្រធានមជ្ឈមណ្ឌលជាតិកំចាត់រោគរបេង ​និងហង់សិន ជំងឺរបេង គឺជាជំងឺដែលមានតាំងពីយូរលង់ណាស់មកហើយ ​ទោះជាយ៉ាងណាក៏ដោយ វានៅ​តែជាជំងឺឆ្លង ដែលជាឃាតករសម្លាប់មនុស្សច្រើនជាងគេ​ ទីពីរនៅលើពិភពលោក បន្ទាប់ពីមេរោគកូវីដ-១៩ ៕