ភ្នំពេញ៖ ដើម្បីទប់ស្កាត់ការឆ្លងជំងឺកូវីដ-១៩ សារឡើងវិញកាន់តែច្រើនចូលក្នុងសហគមន៍នោះ អាជ្ញាធររាជធានីភ្នំពេញ បានដាក់ចេញវិធានការចំនួនពីរចំណុច រួមមាន ទី១. ជំរុញដំណើការចាក់វ៉ាក់សាំងជូនពលរដ្ឋ ក្នុងមូលដ្ឋាន ចាប់ពីដូសមូលដ្ឋានរហូតដូសជំរុញ និងទី២. ពង្រឹងវិធានការរាជរដ្ឋាភិបាល ដែលបានដាក់ចេញ ៣កុំ ៣ការពារ។

លោក កើត ឆែ អភិបាលរងរាជធានីភ្នំពេញ នៅថ្ងៃទី៥ ខែកក្កដានេះ បានប្រាប់BTVថា បន្ទាប់ពី​ក្រសួង​សុខាភិបាល បានរកឃើញអ្នកឆ្លងជំងឺកូវីដ-១៩ឡើងវិញ ​ក្នុងពេលបច្ចុប្បន្ននេះ អាជ្ញាធរ​រាជធានីភ្នំពេញ ដែលមានការណែនាំពីអភិបាលរាជធានីភ្នំពេញ ​បានដាក់ចេញវិធានការចំនួន២​ចំណុច ដើម្បីទប់ស្កាត់ការឆ្លងជំងឺកូវីដ ​កាន់តែច្រើនចូលក្នុងសហគមន៍។

ក្រៅពីនេះ លោកបានបញ្ជាក់ថា​ អ្នកជំងឺកូវីដ-១៩ ព្យាបាលតាមផ្ទះដែលមានចំនួនតិចតួចនោះ គឺស្ថានភាពពួកគេមិនធ្ងន់ធ្ងរនោះទេ ​ព្រោះពួកគេ ​ទទួលបានការចាក់វ៉ាក់សាំងកូវីដ-១៩​ជាច្រើនដូសរួចរាល់។

ប្រជាពលរដ្ឋ បានឡើងដែរថា ការឆ្លងជំងឺកូវីដសាឡើងវិញនេះ មានអារម្មណ៍ភ័យខ្លាចដែរ តែមិន ខ្លាចខ្លាំងដូចឆ្នាំមុននោះទេ ព្រោះបានចាក់វ៉ាក់សាំងច្រើនដូសរួចរាល់ហើយ។​ យ៉ាងណាក្តី ដើម្បី​ធានាសុវត្ថិភាពកុំឲ្យឆ្លងជំងឺកូវីដចូលក្នុងខ្លួន​ និងក្រុមគ្រួសារ ព្រមទាំងមិនចង់ឲ្យប្រទេសជាតិ​មាន​ការបិទខ្ទប់ដូចឆ្នាំ មុនព្រោះជំងឺកូវីដ-១៩។

ពលរដ្ឋ បានអះអាងថា នឹងយកចិត្តទុកដាក់ខ្ពស់ជាងមុនអនុវត្តវិធានការ ​ណែនាំ របស់​រាជរដ្ឋាភិបាល ៣កុំ ៣ការពារ។

បន្ទាប់ពីក្រសួងសុខាភិបាល បានរកឃើញអ្នកឆ្លងជំងឺកូវីដ-១៩ សារឡើងវិញ​ ចាប់ពី២៨ ខែមិថុនា មកប្រជាពលរដ្ឋមានការ​ប្រុងប្រយ័ត្ន​ច្រើនជាងមុន ​និងជាពិសេសសម្រុកទៅចាក់វ៉ាក់សាំង​ដូស​ជំរុញ តាមកំណត់របស់គ្រូពេទ្យ។

បច្ចុប្បន្នការចាក់វ៉ាក់សាំងបង្កាជំងឺកូវីដ-១៩ ត្រូវបានរាជរដ្ឋាភិបាលបន្តចាត់ទុកជា យុទ្ធសាស្រ្ត​ដ៏សំខាន់មួយ ដើម្បីធានានិរន្តរភាព ​ដំណើរការសេដ្ឋកិច្ច និងការរស់នៅជាធម្មតា ​តាមបែបគន្លងថ្មី ជាមួយជំងឺកូវីដ-១៩៕ អត្ថបទ៖ ទូច សោភ័ណ