អ៊ុយក្រែន៖ លោកប្រធានាធិបតីអ៊ុយក្រែន Volodymyr Zelenskiy បាននិយាយកាលពីថ្ងៃចន្ទថា ប្រទេសអ៊ុយក្រែនកំពុងពិភាក្សាជាមួយប្រទេសទួរគី និងអង្គការសហប្រជាជាតិ ដើម្បីធានាដល់ការនាំចេញគ្រាប់ធញ្ញជាតិពីកំពង់ផែផ្សេងៗរបស់អ៊ុយក្រែន។
លោក Zelenskiy បានប្រាប់សន្និសីទសារព័ត៌មានរួមគ្នា ជាមួយនាយករដ្ឋមន្ត្រីស៊ុយអែតលោកស្រី Magdalena Andersson ថា ពេលនេះការចរចាកំពុងដំណើរការជាមួយប្រទេសទួរគី និងអង្គការសហប្រជាជាតិ និងក្រុមអ្នកតំណាងរបស់យើង ដែលទទួលខុសត្រូវផ្នែកសន្តិសុខរបស់គ្រាប់ធញ្ញជាតិ ដែលនឹងដឹកចេញពីកំពង់ផែនានារបស់យើង។ វាពិតជាសំខាន់ណាស់ដែលមានអ្នកធានាសន្តិសុខនាវាសម្រាប់ការនាំចេញនេះ ឬសម្រាប់ប្រទេសនេះ ក្រៅពីរុស្ស៊ីដែលយើងមិនអាចជឿទុកចិត្តបាន។ យ៉ាងណាក៏ដោយ យើងត្រូវការសន្តិសុខសម្រាប់នាវាទាំងនោះ ដែលនឹងមកកាន់ទីនេះ ដើម្បីដឹកជញ្ជូនទំនិញទាំងនោះ។
លោក Zelenskiy និយាយថា អ៊ុយក្រែនកំពុងធ្វើការដោយផ្ទាល់ជាមួយអគ្គលេខាធិការអង្គការសហប្រជាជាតិលើបញ្ហានេះ ហើយអង្គការនេះកំពុងដើរតួនាទីឈានមុខគេ មិនមែនត្រឹមតែជាអ្នកសម្របសម្រួលប៉ុណ្ណោះទេ។ សេចក្ដីរាយការណ៍ព័ត៌មានបានលើកឡើងនៅក្នុងប៉ុន្មានសប្ដាហ៍ថ្មីៗនេះថា ការពិភាក្សានោះនឹងធ្វើឡើងក្នុងពេលឆាប់ៗនៅប្រទេសទួរគី។ អ៊ុយក្រែនដែលជាប្រទេសមួយក្នុងចំណោមប្រទេសនាំចេញឈានមុខគេជាច្រើនក្នុងពិភពលោក បានចោទរុស្ស៊ីពីបទរារាំងសកម្មភាពនាវាដឹកទំនិញរបស់ខ្លួន ហើយលោក Zelenskiy បាននិយាយថា ឥឡូវនេះមានគ្រាប់ធញ្ញជាតិចំនួន ២២លានតោនបានជាប់ ដោយរំពឹងថា ការប្រមូលផលនៅក្នុងសរទរដូវខាងមុខនឹងទទួលបានផលិតផលកសិកម្មប្រមាណ ៦០លានតោនថែមទៀត៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
