ឧត្ដរមានជ័យ៖ អភិបាលខេត្តឧត្ដរមានជ័យ បានជំរុញមន្ត្រីជំនាញពាក់ព័ន្ធនានា ដែលកំពុងឈរជើងនៅច្រកព្រំដែន ត្រូវពង្រឹងវិធានការទប់ស្កាត់បង្ការការនាំចូលជំងឺកូវីដ-១៩ ខណៈនៅក្នុងប្រទេសកម្ពុជា បានរកឃើញករណីជំងឺកូវីដ-១៩ ឆ្លងក្នុងសហគមន៍ឡើងវិញ ។

ឯកឧត្តម ប៉ែន កុសល្យ អភិបាលខេត្តឧត្តរមានជ័យ កាលពីថ្ងៃទី០៤ ខែកក្កដាម្សិលមិញ បានធ្វើដំណើរទៅត្រួតពិនិត្យស្ថានភាពព្រំដែន និងបានក្រើនរំលឹកដល់កងកម្លាំងជួរមុខ កំពុង ឈរជើងនៅតាមច្រកទ្វារព្រំដែនកម្ពុជា-ថៃទាំងអស់ ក្នុងភូមិសាស្រ្តខេត្ត ត្រូវបង្កើនការ​ប្រុងប្រយ័ត្ន​ពង្រឹងទប់ស្កាត់ឲ្យបានម៉ត់ចត់បន្ថែម ទៀតចំពោះបញ្ហាប្រឈមនានា​ ពិសេសករណីកូវីដ-១៩លើ​អ្នក​ដំណើរឆ្លងដែន ​ក៏ដូចជាពលករវិលត្រឡប់មកពីប្រទេសថៃ។

ឯកឧត្តម បានបញ្ជាក់ថា អាជ្ញាធរ និងមន្ត្រីជំនាញទាំងអស់ ​ដែលឈរជើងនៅតាមច្រកទ្វារព្រំដែន កម្ពុជាថៃ ​ត្រូវតែមានវិធានការទប់ស្កាត់ ​ពិនិត្យសុខភាពដោយការប្រុងប្រយ័ត្នខ្ពស់ ដើម្បីចៀសវាង​ការឆ្លងម្តងទៀត នៅក្នុងសហគមន៍ខេត្តមួយនេះ ។

បច្ចុប្បន្នអាជ្ញាធរខេត្តឧត្ដរមានជ័យ បានធ្វើការពង្រាយការចាក់វ៉ាក់ទៅតាមទីតាំងក្រុង/ស្រុក​ និង តាម​ទីសាធារណៈជាច្រើនកន្លែង​ ដែលអាជ្ញាធរបានកំណត់ ដើម្បីពន្លឿនការចាក់វ៉ាក់សាំងដូស​ជំរុញ​ជូនដល់ប្រជាពលរដ្ឋឲ្យបានលឿន និងទាន់ពេលវេលា៕ អត្ថបទ៖ ឃិន សារិទ្ធ