កំពង់ឆ្នាំង៖ ថ្ងៃទី០៥ខែកក្កដា ឆ្នាំ២០២២ អាជ្ញាធរមីន រួមសហការជាមួយ ស្ថានទូតឥណ្ឌា​ប្រចាំ​នៅកម្ពុជា, មូលនិធិ Sir Bobby Charlton, មូលនិធិ Prince និង​សភាពាណិជ្ជកម្មអាមេរិក​ប្រចាំនៅ​កម្ពុជា ដឹកនាំដោយឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានអញ្ជើញ​ទស្សនកិច្ច​ស្វែងយល់អំពីសកម្មភាព​ហ្វឹកហ្វឺន​ការងារបោសសម្អាតមីន ​និងសុនខរាវមីន នៅវិទ្យាស្ថានបច្ចេកទេសសកម្មភាពមីនរបស់ស៊ីម៉ាក់ ក្នុងខេត្តកំពង់ឆ្នាំង ។

ដំណើរទស្សនកិច្ចនេះ ប្រព្រឹត្តិទៅក្រោមកម្មវិធី"ឥទ្ធិពលស្រ្តីក្នុងវិស័យសកម្មភាពមីន"។

ក្នុងដំណើរទស្សនកិច្ច ឯកឧត្តមទេសរដ្ឋមន្រ្តី បានថ្លែងអំណរចំពោះកិច្ចទទួល​ស្វាគមន៍យ៉ាង កក់ក្តៅពីលោក ហេង រតនា អគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) និងសហការី ព្រមទាំងបានវាយតម្លៃខ្ពស់សកម្មភាពហ្វឹកហ្វឺនសមត្ថភាពជំនាញ និងបច្ចេកទេស របស់អ្នកដោះមីន ដែលទទួលបានមកពីវិទ្យាស្ថាននេះ។

ឯកឧត្តមទេសរដ្ឋមន្រ្តី លី ធុជ បានលើកឡើងថា ស៊ីម៉ាក់ គឺជាមជ្ឈមណ្ឌលបោសសម្អាតមីនជាតិ​ដ៏លេចធ្លោមួយ និងមានសមត្ថភាពខ្ពស់ ព្រមទាំង​បានចូលរួមរំដោះផ្ទៃដីពីការ​គំរាមកំហែង​ដោយ​សារមីន និងសំណល់ជាតិផ្ទុះពីសង្រ្គាមច្រើនជាងគេនៅកម្ពុជា ។

ទេសរដ្ឋមន្រ្តី បានបញ្ជាក់ថា សម្តេចតេជោ ហ៊ុន សែន នាយករដ្ឋមន្រ្តី តែងតែយកចិត្តទុក​ដាក់​ខ្ពស់ដល់សុវត្ថិភាព និងត្រូវបោសសម្អាតមីនឲ្យអស់ពីកម្ពុជា ដើម្បីផ្តល់នូវ​ស្នាមញញឹម​ជូន​ប្រជាពលរដ្ឋ។

ឯកឧត្តម បន្តទៀតថា ថ្មីៗនេះ សម្តេចតេជោ បានផ្តល់បេសកកម្មឲ្យអាជ្ញាធរមីន ដឹកនាំ និងរៀបចំ​វិស័យសកម្មភាពមីន​ជាមួយប្រតិបត្តិករជាតិ ​ដើម្បីរៀបចំផែនការ និងដាក់ពង្រាយកម្លាំង​បោស​សម្អាតមីន ក្រោម “គម្រោងសម្តេចតេជោស ម្រាប់សកម្មភាពមីន” ដំណាក់កាលដំបូង ក្នុងនោះ​ត្រូវការ​ជាចំបាច់នូវ​កម្លាំងមជ្ឈមណ្ឌល​សកម្មភាពកំចាត់មីនកម្ពុជា ​ចូលរួមផងដែរ ដែលត្រូវ​អនុវត្ត​តាមស្តង់ដា​សកម្មភាពកំចាត់មីនកម្ពុជា ៕