ភ្នំពេញ ៖ អនុគណៈកម្មការស្រាវជ្រាវជំងឺកូវីដ-១៩ នៃក្រសួងសុខាភិបាល នៅថ្ងៃទី២៩ ខែមីនា ឆ្នាំ២០២១នេះ បានជូនដំណឹងលើបណ្តាញសង្គម Facebook ឲ្យដឹងថា មានអ្នកកើតជំងឺកូវីដ-១៩ ធ្លាប់បានចូលទៅទទួលសេវាកម្មមិត្តហ្វូន និងហូបអាហារនៅហាង Pepper Lunch និងកន្លែងហាត់ប្រាណ ឈ្មោះ 390 Crossសូមអញ្ជើញទៅធ្វើតេស្តកូវីដ-១៩ជាប្រញាប់។

​

អនុគណៈកម្មការស្រាវជ្រាវជំងឺកូវីដ-១៩ បានអំពាវនាវឲ្យអ្នកពាក់ព័ន្ធអញ្ជើញទៅធ្វើតេស្ត និងពិនិត្យយកសំណាកទៅតាមលក្ខខណ្ឌ និងទីតាំងដូចក្នុងសេចកី្តជូនដំណឹងខាងក្រោមនេះ ៖ សេចកី្តជូនដំណឹង ករណីវីរុសកូវីដ-១៩ បានចូលទៅទទួលសេវាកម្មមិត្តហ្វូន "Metfone" សាខាស្ថិតនៅលេីផ្លូវវេងស្រេង, សង្កាត់ ចោមចៅ, ខណ្ឌ ពោធិ៍សែនជ័យ រាជធានីភ្នំពេញ ចាប់ពីថ្ងៃទី ១០ មីនា ដល់ថ្ងៃទី ២៤ ខែមីនា ឆ្នាំ២០២១ (មូលហេតុ៖ អ្នកវិជ្ជមានកូវីដ១៩ ធ្វើខាងផ្នែកបច្ចេកទេស នៅទីនោះ) និងប្រជាពលរដ្ឋ ដែលធ្លាប់បានហូបអាហារនៅហាង "Pepper Lunch" សាខាផ្សារទំនើប អ៊ីអន ១ ជាន់ទី២, អគារលេខ ១៣២, ផ្លូវសុធារស រាជធានីភ្នំពេញ (មូលហេតុ៖ អ្នកវិជ្ជមានកូវីដ១៩ បានទៅហូបអាហារនៅទីនោះ កាលពីថ្ងៃទី២១ ខែមីនា ឆ្នាំ២០២១ វេលាម៉ោង ១៩.២០នាទី) និងប្រជាពលរដ្ឋ ដែលធ្លាប់បានចូលទៅ ហាត់ប្រាណ នៅកន្លែងហាត់ប្រាណ ឈ្មោះ 390 Cross ស្ថិតនៅផ្ទះលេខ ៣Eo, ផ្លូវ ៣៩០ សង្កាត់ បឹងកេងកង៣, ខណ្ឌ បឹងកេងកង (មូលហេតុ៖  អ្នកវិជ្ជមានកូវិដ១៩ បានទៅកាន់ទីតាំងនេះ នៅថ្ងៃទី១៩ ខែមីនា ឆ្នាំ២០២១)។ សូមបងប្អូនដែលមានរោគសញ្ញាដូចជាគ្រុនក្តៅ ក្អក កណ្តាស់ ឈឺបំពង់ករ ដកដង្ហើមខ្លីៗ ឬសង្ស័យ និងធ្លាប់ចេញ-ចូល នៅក្នុងទីតាំងខាងលើនេះ សូមអញ្ជើញទៅធ្វើតេស្តនៅមនី្ទរពេទ្យដែលបានកំណត់អនុញ្ញាត នៅក្នុងរាជធានីភ្នំពេញ និងខេត្តរបស់អ្នក (នៅវិទ្យាល័យបាក់ទូក វិទ្យាល័យបឹងត្របែក សាលាបឋមសិក្សាសុភមង្គល (ក្រោយផ្សារស៊ិន ជូរី បណ្តោះអាសន្ន) មណ្ឌលសុខភាពចាក់អង្រែក្រោម ឬមនី្ទរពេទ្យមិត្តភាពខ្មែរ-សូវៀត និងមនី្ទរពេទ្យបង្អែកនៅតាមបណ្តាខេត្តនានា ដោយឥតគិតថ្លៃ) ព័ត៌មានបន្ថែមសូមទាក់ទងលេខ១១៥។ចំពោះបុគ្គលដែលមិនមានរោគសញ្ញាសូមធ្វើចត្តាឡីស័កនៅផ្ទះ និងតាមដានសុខភាពរបស់អ្នករាល់ថ្ងៃរយៈពេល១៤ថ្ងៃ រាប់ពីថ្ងៃអ្នកបានប៉ះពាល់ចុងក្រោយ ឬទៅទីកន្លែងនោះ៕ អត្ថបទ ៖ រដ្ឋា