ភ្នំពេញ៖ សហភាពអឺរ៉ុប បានផ្ដល់ជំនួយសម្ភារបច្ចេកទេសដល់សិប្បកម្ម និងក្រុមហ៊ុនចំនួន១៧កែច្នៃជលផល ក្នុងរាជធានីខេត្តមួយចំនួន ដើម្បីកែច្នៃជលផលនានាឲ្យមានសុវត្ថិភាព មានស្ដង់ដារ នឹងអាចនាំចេញទៅលក់ក្រៅប្រទេស ដែលគម្រោងនេះ សហការអនុវត្តដោយខណ្ឌរដ្ឋបាលជលផល និងអង្គការ UNIDO។

នៅក្នុងពិធីប្រគល់កញ្ចប់វិនិយោគកមក្មវិធី VCIS ដល់សហគ្រាសជលផលក្រោយប្រមូលផល នាថ្ងៃទី០៥ ខែកក្កដា ឆ្នាំ២០២២ លោក សុខ ណារិន តំណាងអង្គការ UNIDO ប្រចាំនៅកម្ពុជា លើកឡើងថា តួអង្គភាគច្រើនក្នុងខ្សែចង្វាក់តម្លៃជលផលនៅកម្ពុជា គឺជាអាជីវកម្មខ្នាតមីក្រូ និងតូច លក្ខណៈគ្រួសារ និងមិនទាន់បានចុះបញ្ជីត្រឹមត្រូវ ដោយជាង៨៥% នៃសហគ្រាសទាំងអស់ ស្ថិតនៅក្នុងតំបន់ទន្លេសាប និងបណ្ដាខេត្តនៅតាមតំបន់ឆ្នេរសមុទ្រ ហើយផលិតផលជលផលជាច្រើនពុំសូវមានតម្លៃបន្ថែម ខ្វះពិពិធកម្មផលិតផល ការប្រកួតប្រជែងទីផ្សារក៏នៅមានកម្រិត ។

លោកបន្តថា ដើម្បីដោះស្រាយបញ្ហាខាងលើ និងលើកកម្ពស់សុវត្ថិភាពការប្រកួតប្រជែងផលិតផលជលផល ទើបសហភាពអឺរ៉ុប បានផ្ដល់នូវជំនួយបច្ចេកទេស ក្នុងនោះជួយលើកកម្ពស់បច្ចេកទេស និងនិរន្តរភាពសេវាកម្ម ព្រមទាំងប្រព័ន្ធត្រួតពិនិត្យផ្លូវការផ្នែកសុវត្ថិភាពចំណីអាហារ របស់អាជ្ញាធរ ជួយអភិវឌ្ឍសមត្ថភាពវិស័យឯកជនអនុលោមតាមស្ដង់ដារអន្តរជាតិ និងតម្រូវការទីផ្សារ ជួយពង្រឹងភាពប្រកួតប្រជែងរបស់ធុរកិច្ចជន ជនផលក្រោយប្រមូលផល តាមរយៈនវានុវត្ត និងការសិក្សាស្រាវជ្រាវផលិតផល ។

 ម្ចាស់សហគ្រាសទទួលបានជំនួយ បានលើកឡើងថា ពួកគេទទួលស្គាល់ពីកម្រិតចំណេះដឹងរបស់ពួកគេ ពាក់ព័ន្ធការកែច្នៃផលិតផលជលផលនេះ ហើយរំពឹងថា នៅពេលទទួលបាននូវសម្ភារបច្ចេកទេស ជលផលកែច្នៃរបស់កម្ពុជានឹងកាន់តែមានសុវត្ថិភាព មានស្ដង់ដារ អាចប្រកួតប្រជែង និងអាចនាំទៅកាន់ទីផ្សារក្នុងតំបន់ និងអន្តរជាតិ ។

 ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ថ្លែងអំណរគុណ ចំពោះសហភាពអឺរ៉ុប និងអង្គការ UNIDO លើកិច្ចសហប្រតិបត្តិការភាពជាដៃគូប្រកបដោយអត្ថន័យជ្រាលជ្រៅ ជួយគាំទ្រដល់ប្រទេសកម្ពុជា តាមរយៈកម្មវិធីជាច្រើន។

ឯកឧត្តម បានបង្ហាញនូវការសង្ឃឹមថា សហគ្រាសទាំង១៧ នឹងចូលរួមធ្វើឲ្យប្រសើរឡើងនូវប្រព័ន្ធសុវត្ថិភាពចំណីអាហារកម្ពុជា ដើម្បីឈានទៅដល់ការនាំទៅទីផ្សារអន្តរជាតិ រួមទាំងទីផ្សារនៃសហភាពអឺរ៉ុប៕ អត្ថបទ បាន សុខរិទ្ធិ