បន្ទាយមានជ័យ៖ លោក លីសារី អភិបាលរងខេត្តបន្ទាយមានជ័យ បានលើកឡើងថា ក្រោយ​ប្រកាស​សុពលភាព ​មេឃុំនិងក្រុមប្រឹក្សាឃុំបន្ទាយនាង ​បេក្ខភាពជាប់ឆ្នោតទាំង ១១រូប​ត្រូវបំរើ​ពលរដ្ឋ​ប្រកប​ដោយ​គុណធម៌​ ចេះសាមគ្គីភាពគ្នារួមគ្នា ដើម្បីបំរើពលរដ្ឋ សមស្របលើការទុកចិត្ត ការ​ជឿជាក់ និងការស្រឡាញ់ពេញចិត្តរបស់បងប្អូន ​ដោយមិនប្រកាន់និន្នាការនយោបាយ ដើម្បី​បន្តការអភិវឌ្ឍមូលដ្ឋានអោយកាន់តែប្រសើរឡើងទៀត ប្រកបដោយ​ក្រម​សីលធម៌ល្អ និង​អនុវត្តអោយបានស្របតាមច្បាប់ ដែលព្រះមហាក្សត្រ និងរាជរដ្ឋាភិបាលបានដាក់ជូន។

លោក លី សារី បានឲ្យដឹងថា ​លទ្ធផលនៃការបោះឆ្នោត ​ដែលប្រកាសដោយ គណៈកម្មការរៀបចំ​ការ​បោះឆ្នោតជាតិ ​បានរៀបចំ​សន្និបាត​បូកសរុបលទ្ធផលការងារបោះឆ្នោត ​ជ្រើសរើស​ក្រុម​ប្រឹក្សា​ឃុំ សង្កាត់ អាណត្តិទី៥ ឆ្នាំ២០២២ ហើយ​គណបក្សប្រជាជនកម្ពុជា​ទទួល​បាន​ជោគជ័យ​ជាស្ថាពរ។

ជាមួយគ្នានោះដែរ​លោកអភិបាលរងខេត្តបន្ទាយមានជ័យ ក៏​បានអំពាវនាវដល់បងប្អូនពលរដ្ឋ និងកុមារ ដែលមិនទាន់បានចាក់វាក់សាំង ​ដូលជំរុញ ​ត្រូវនាំគ្នាទៅចាក់អោយបានគ្រប់ៗគ្នា និង​បន្តរក្សាអនាម័យ​បរិស្ថានល្អ ​ដើម្បីសុខភាពយើងទាំងអស់គ្នា​ដើម្បីបង្ការទប់ស្កាត់មិនឲ្យ​មានការ​ចម្លង​ក្នុងសហគមន៍សារជាថ្មីក្នុងមូលដ្ឋានរបស់បងប្អូនផងដែរ៕