ព្រះវិហារ៖ នាយឧត្តមសេនីយ៍ សៅ សុខា បាន​ក្រើន​រំលឹក​ដល់​គ្រប់​អង្គភាពអាវុធ​ទាំងអស់​ ត្រូវ​យក​ចិត្តទុកដាក់ទប់ស្កាត់​ និង​បង្ក្រាប​បទល្មើសធនធានធម្មជាតិដូចជា៖ ​ការ​កាប់ឈើ ការ​ស្តុកទុក ​ការ​ដឹកជញ្ជូន​ឈើដោយ​ខុសច្បាប់ ​ការ​កាប់រាន​ដីព្រៃឈើរបស់រដ្ឋ​យកធ្វើកម្មសិទ្ធ​ ការ​ជីករ៉ែមាស​ដោយខុសច្បាប់​ជាដើម។

ថ្លែងថ្ងៃទី០៦ខែកក្កដាឆ្នាំ២០២២ ក្នុងឱកាសអញ្ជើញជាអធិបតីក្នុងពិធី បញ្ចុះបឋមសិលា សាងសង់អគារសេនាធិការដ្ឋានកងរាជអវុធហត្តថ្មីខេត្តព្រះវិហារឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពល​ខេមរភូមិន្ទ​ មេបញ្ជាការកងរាជអាវុធហត្ថលើផ្ទៃប្រទេស ក៏​បានណែនាំដល់​កង​រាជអាវុធ​ហត្ថ​ទាំងអស់​ មិន​ត្រូវ​ជាប់​ពាក់ព័ន្ធ​ជាមួយ​បទល្មើស​នោះទេ​ ហើយ​ការ​ចុះ​ទប់ស្កាត់ ​និង​បង្ក្រាប​បទល្មើស​ត្រូវ​សហការ​ជាមួយ​មន្ទីរជំនាញ​ និង​អាជ្ញាធរមូលដ្ឋាន​ ដើម្បី​ទទួលបាន​លទ្ធផល​ជោគជ័យជូនអង្គភាព ​ក៏ដូចជូនជាតិទាំងមូលផងដែរ ។

ក្នុងឱកាសនោះដែរ​ឯកឧត្តមនាយឧត្តមសេនីយ៍ សៅ សុខា បាន​កោត​សរសើរ ចំពោះកងរាជអាវុធ​ហត្ថ​ខេត្តព្រះវិហារ ដែលបានខិតខំអនុវត្តន៍​បទ​បញ្ជា​បានយ៉ាងល្អប្រសើរ​ក្នុងការ​បំពេញ​តួនាទី​និងភារកិច្ច​ជូនជាតិមាតុភូមិ​ ដើម្បីរួមចំណែកជាមួយរាជរដ្ឋាភិបាលកម្ពុជា ដែលមាន​សម្តេចតេជោ ​ហ៊ុន​ សែន នាយករដ្ឋមន្រ្តី ជាប្រមុខដឹកនាំ​ឆ្នើម​របស់យើងទាំងអស់គ្នា ​ក្នុងការ​អភិវឌ្ឍប្រទេសជាតិ រក្សាបាន​នូវ​ស្ថេរភាព សន្តិសុខ សណ្ដាប់ធ្នាប់​ ។ នឹងបានណែនាំឲ្យអង្គភាព​យកចិត្តទុកដាក់ លើការងារ​កសាង​អង្គភាព កន្លែងធ្វើការងារឲ្យបាន​សមរម្យ​ចាប់​ពី​បញ្ជាការដ្ឋាន​កងរាជអាវុធហត្ថខេត្ត រហូត​ដល់​មូលដ្ឋាន​កងរាជអាវុធហត្ថក្រុង ស្រុក និង​ស្នាក់​ការ​សន្តិសុខផងដែរ។

បើតាមឯកឧត្តម កង សៅគុណ បានឱ្យដឹងថា អគារ​ទីបញ្ជាការថ្មីកំពង់រៀបចំសាសង់ មាន​ទំហំ ១១ម៉ែត្រ គុណ ៥៦ម៉ែត្រ កំពស់៣ជាន់ ប្រើរយៈពេលសាងសង់ ៣៦ខែ ​ចំណាយថវិកាសាសង់ចំនួន ៦៥ម៉ឺនដុល្លារ​ មិនទាន់គិតចំណាយលើការបំពាក់សម្ភារៈការិយាល័យទេ ​ក្នុងនោះឯកឧត្តម សៅ សុខា បានចូលរួមចំណែកចំនួន១០ម៉ឺនដុល្លារ ។

ឯកឧត្តម បានបន្តថា អគារទីបញ្ជាការថ្មីនេះ សង់លើផ្ទៃដីជាង ៣ហិកតា បាន​ធ្វើរបងថ្មព័ទ្ធជុំវិញ ក្លោងទ្វា​ អគារប្រចាំការ អគារទទួលភ្ញៀវ បន្ទប់ទឹក នឹងបង្គន់អនាម័យ មានចាក់សាបផងដែរ ៕