ភ្នំពេញ ៖ ឯកឧត្តម បណ្ឌិត Takeshi Kasai ប្រធានអង្គការសុខភាពពិភពលោក ប្រចាំតំបន់ប៉ាស៊ីហ្វិកខាងលិច បានកោតសរសើរភាពខ្លាំងរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា ក្នុងការប្រយុទ្ធប្រឆាំងនឹងជំងឺកូវីដ១៩ ជាពិសេសការងារស្រោចស្រពវ៉ាក់សាំងបង្ការជំងឺកូវីដ-១៩។

​ការលើកឡើងរបស់ឯកឧត្តម បណ្ឌិត Takeshi Kasai ប្រធានអង្គការសុខភាពពិភពលោក ប្រចាំតំបន់ប៉ាស៊ីហ្វិកខាងលិច យ៉ាងដូច្នេះនាឱកាសអញ្ជើញទស្សនកិច្ចនៅសាលាបឋមសិក្សាទួលគោក ខណ្ឌទួលគោក រាជធានីភ្នំពេញ នាព្រឹកថ្ងៃទី៦ ខែកក្កដា ឆ្នាំ២០២២នេះ អមដំណើរដោយលោកជំទាវ វេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) លោកជំទាវ គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា លោកជំទាវ វេជ្ជបណ្ឌិត លី អាយឡែន តំណាងអង្គការសុខភាពពិភពលោកប្រចាំកម្ពុជា និងគណៈប្រតិភូអង្គការសុខភាពពិភពលោក ប្រចាំតំបន់ប៉ាស៊ីហ្វិកខាងលិចផងដែរ។

បើតាមរបាយការណ៍របស់លោក នាយកសាលាបឋមសិក្សាទួលគោក បានបង្ហាញច្បាស់ថា វិស័យអប់រំ បានចូលរួមយ៉ាងសកម្ម ក្នុងការទប់ស្កាត់ការឆ្លងរីករាលដាលនៃជំងឺកូវីដ-១៩ ហើយសាលាបឋមសិក្សាទួលគោកនេះ ជាសាលាមួយដែលទទួលរងនៃផលប៉ះពាល់ និងបិទ មិនឲ្យសិស្សមកចូលរៀន ដូចជាសាលាដទៃទៀតដែរ អំឡុងពេលដែលមានការរីករាលដាលជំងឺកូវីដ១៩ខ្លាំងក្នុងឆ្នាំ២០២១កន្លងមក។

នាឱកាសដែលប្រធានអង្គការសុខភាពពិភពលោក ប្រចាំតំបន់ប៉ាស៊ីហ្វិកខាងលិច ចុះទស្សនកិច្ច មានចំណាប់អារម្មណ៍ខ្ពស់ទៅលើការចាត់ចែងគ្រប់គ្រងរបស់កម្ពុជា ក្នុងវិស័យអប់រំជារួម និងសង្កេតទៅលើការអនុវត្តន៍វិធានការ ការពារ ការចម្លងនៃវីរុសកូវីដ-១៩ ទាំងបច្ចុប្បន្ន និងពេលកន្លងមកនេះ ដែលកម្ពុជា មានការរាតត្បាតជំងឺកូវីដ-១៩ នាឆ្នាំ២០២១។ អ្វីដែលជាកត់សម្គាល់របស់គណៈប្រតិភូ គឺសិស្សានុសិស្សមានចំណេះដឹងខាងវិធានការការពារ ជាពិសេសការអនុវត្តន៍នៃការពាក់ម៉ាស់ ក៏ដូចជាការលាងដៃរបស់សិស្សានុសិស្សទាំងថ្នាក់ទី១ និងថ្នាក់កុមារា កុមារីផ្សេងទៀត និងឆ្លៀតឱកាសចូលពិនិត្យមើលសិស្សដែលមានបញ្ហាអូទីស៊ឹម ដែលក្រសួងអប់រំ យុវជន និងកីឡា បានរៀបចំជាថ្នាក់មួយដាច់ដោយឡែក សម្រាប់ក្មួយៗដែលមានបញ្ហាអូទីស៊ឹម ប៉ុន្តែពួកគាត់នៅតែមានឱកាសក្នុងការមកទទួលយកការអប់រំ និងសិក្សារៀនសូត្រជារៀងរាល់ថ្ងៃផងដែរ។ តមកនៅថ្ងៃដដែលឯកឧត្តម បណ្ឌិត Takeshi Kasai ប្រធានអង្គការសុខភាពពិភពលោក ប្រចាំតំបន់ប៉ាស៊ីហ្វិកខាងលិច រួមនិងគណៈប្រតិភូ បានជួបធ្វើកិច្ចសន្ទនារវាងថ្នាក់ដឹកនាំក្រសួងសុខាភិបាល ជាមួយនិងសមាគមអ្នកផ្តល់សេវាសុខាភិបាលឯកជននៅកម្ពុជា នាទីសី្តការក្រសួងសុខាភិបាល។

 ក្នុងឱកាសនេះ ឯកឧត្តម វេជ្ជបណ្ឌិត ង៉ូវ កាង រដ្ឋលេខាធិការក្រសួងសុខាភិបាល និងជាប្រធានសមាគមអ្នកផ្តល់សេវាសុខាភិបាលឯកជន បានធ្វើរបាយការណ៍សង្ខេបពីប្រព័ន្ធគ្រប់គ្រងសេវាសុខាភិបាលឯកជននៅកម្ពុជា និងពីសមាគមអ្នកផ្ដល់សេវាសុខាភិបាលឯកជននៅកម្ពុជា ថា សមាគមអ្នកផ្តល់សេវាសុខាភិបាលឯកជននៅកម្ពុជា (Private Health Service Provider Association Of Cambodia) ទទួលបានច្បាប់អនុញ្ញាតជាផ្លូវការពីក្រសួងមហាផ្ទៃ កាលពីថ្ងៃទី១៥ ខែមករា ឆ្នាំ២០២០ មកដល់ថ្ងៃទី០១ ខែកក្កដា ឆ្នាំ២០២២ មានសមាជិកសរុបចំនួន២៦១មូលដ្ឋានសុខាភិបាលឯកជន រួមមាន៖ មន្ទីរពេទ្យឯកជន ចំនួន៤, មន្ទីរពហុព្យាបាល ចំនួន ៣៣, មន្ទីរសម្រាកព្យាបាល-មន្ទីរសម្ភព ចំនួន ១២៧, បន្ទប់ព្យាបាលជំងឺ ចំនួន ៩៧ ជាក់ស្តែងព្រឹកនេះមានសមាជឹកចំនួន ៧៥ នាក់អញ្ជើញចូលរួមក្នុងពិធីនេះ។

 ជាមួយគ្នានោះដែរ ឯកឧត្តម បណ្ឌិត Takeshi Kasai បានសម្តែងអំណរសាទរ និងកោតសរសើរជូនចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា ដែលសម្តេចតេជោ បានអំពាវនាវដដែរៗដល់ប្រជាពលរដ្ឋទាំងអស់ ជាពិសេសអ្នកងាយរងគ្រោះ ឲ្យចេះប្រុងប្រយ័ត្ន ខ្ពស់លើបញ្ហាជំងឺកូវីដ-១៩។ ឯកឧត្តម ក៏មានជំនឿថា វិស័យសុខាភិបាលកម្ពុជា នឹងទទួលបានការជឿទុកចិត្តផ្អែកទៅប្រធាន មេដឹកនាំ ក៏ដូចជាប្រជាពលរដ្ឋ នោះនឹងបានរួមចំណែកក្នុងការអភិវឌ្ឍន៍ប្រទេសជាតិ។

 ឆ្លៀតក្នុងឱកាសនេះលោកជំទាវ វេជ្ជបណ្ឌិត ឱ វណ្ណឌីន បានថ្លែងថា ការជួបពិភាក្សាជាមួយអ្នកផ្តល់សេវាសុខាភិបាលឯកជននេះ គឺជាការផ្តល់នូវចំណាប់អារម្មណ៍ខ្ពស់មួយបន្ថែមទៀតដល់គណៈប្រតិភូរបស់អង្គការសុខភាពពិភពលោក ប្រចាំតំបន់ប៉ាស៊ីហ្វិកខាងលិច ទៅលើការចូលរួមចំណែករបស់សេវាសុខាភិបាលឯកជន នៅក្នុងការអភិវឌ្ឍវិស័យសុខាភិបាល នៅក្នុងព្រះរាជាណាចក្រកម្ពុជា។

ជាចុងក្រោយលោកជំទាវ វេជ្ជបណ្ឌិត ឱ វណ្ណឌីន ក៏បានជម្រុញដល់អ្នកផ្តល់សេវាសុខាភិបាលទាំងអស់ ក៏ត្រូវតែអនុវត្តនូវក្រមសីលធម៌វិជ្ជាជីវៈពេទ្យនេះឲ្យបានត្រឹមត្រូវ និងចូលរួមចំណែកទាំងមនី្ទរពេទ្យ គ្លីនិកឯកជន ពហុព្យាបាលឲ្យមានអនាម័យស្អាត សំខាន់គឺភាពស្អាតរបស់មនី្ទរពេទ្យ ត្រូវតែអនុវត្តន៍ និងចូលរួមបន្តបង្កើនចំណេះជំនាញរបស់គ្រូពេទ្យ និងបំប៉នផ្នែកថែទាំអ្នកជំងឺ និងអនុវត្តន៍ប្រព័ន្ធសុខាភិបាលឌីជីថល និងការធ្វើកិច្ចសហប្រតិបតិ្តការ សាមគ្គីភាពគ្នាឲ្យបានល្អរវាងសេវាឯកជន និងឯកជន ជាមួយឯកជន និងរដ្ឋ ការសាមគ្គីភាពគ្នារឹងម៉ាំ គឺជាកត្តាមួយដែលនាំឲ្យយើងអនុវត្តន៍ការងារបានជោគជ័យផងដែរ៕ អត្ថបទ៖ រដ្ឋា