ភ្នំពេញ ៖ ដើម្បីរួមចំណែកកាត់បន្ថយការស្ទះចរាចរ និងគ្រោះថ្នាក់ចរាចរណ៍ រដ្ឋាករស្វយ័តដឹកជញ្ជូនសាធារណៈរថយន្តក្រុង( City Bus ) ​រាជធានីភ្នំពេញ បានប្រកាសដាក់ឱ្យប្រើប្រាស់សេវាដឹកជញ្ជូនតាមផ្លូវទឹកតាមរយៈ Taxi Boat ពីស្ថានីយចំណតសួនឬស្សីកែវ ដល់ស្ថានីយចំណតក្រុងតាខ្មៅ តំលៃសំបុត្រត្រឹមតែ ២០០០៛ ប៉ុណ្ណោះ ក្នុងមួយលើក។ នេះបើយោងតាមការបញ្ជាក់ពីរដ្ឋាករស្វយ័តដឹកជញ្ជូនសាធារណៈរថយន្តក្រុង( City Bus ) រាជធានីភ្នំពេញ នាថ្ងៃទី ០៦ ខែកក្កដា ឆ្នាំ ២០២២។ 

ស្ថានីយចំណតទាំង ០៥ រួមមាន៖

១. ស្ថានីយចំណតផែឫស្សីកែវ

២. ស្ថានីយចំណតផែផ្សារចាស់

៣. ស្ថានីយចំណតផែចតុមុខ

៤. ស្ថានីយចំណតផែច្បារអំពៅ

៥. ស្ថានីយចំណតផែតាខ្មៅ

ក្នុងនោះដែរ ក៏មានករណីលើកលែងមិនបង់ប្រាក់ចំពោះព្រះសង្ឈ ជនពិការ សិស្សនិស្សិត មនុស្សចាស់ (អាយុ៧០ឆ្នាំឡើង) កុមារ (កម្ពស់ក្រោម១ម៉ែត្រ) កម្មករ កម្មការិនីរោងចក្រ គ្រូបង្រៀន កីឡាករ កីឡាការិនី៕​ អត្ថបទ ៖ សុជាតា