​អ៊ុយក្រែន៖ អភិបាលខេត្ត Luhansk និង Donetsk ​បាន​និយាយ​ថា កងកម្លាំង​រុស្ស៊ី​កំពុង​ប្រើ​យុទ្ធវិធី​កម្ទេច​សល់​តែ​ផេះ ក្នុង​ការ​វាយ​រុលទៅមុខ​ក្នុងប្រទេស​អ៊ុយ​ក្រែ​នភា​គ​ខាងកើត ដោយ​វាយកម្ទេច​តំបន់​លំនៅឋាន​ជន​ស៊ីវិល​ដោយ​ប្រើ​មី​ស៊ី​ល និង​បំផ្លិចបំផ្លាញ​ភូមិឋាន​ទីក្រុង​តូច​ធំ​ជាច្រើន​ឲ្យ​ក្លាយ​ជា​កម្ទេច​ថ្ម​។​

​ក្រុម​មន្ត្រី​អ៊ុយ​ក្រែ​ន​បាន​និយាយ​កាលពី​ថ្ងៃ​ពុធ​ថា ការ​បាញ់​ផ្លោង​ដោយ​មិន​រើសមុខ​ពី​សំណាក់​កង​កម្លាំង​រុស្ស៊ីរយៈពេល​ជាង​ ២៤​ម៉ោង​បាន​សម្លាប់​ជន​ស៊ីវិល ​៨​នាក់ និង​ជាង ​២៥​នាក់​រង​របួស​។ ​ការិយាល័យ​ប្រធានាធិបតី​អ៊ុយ​ក្រែ​ន​បាន​អះអាងថា ភាគច្រើន​នៃ​ជន​ស៊ីវិល​រងគ្រោះ​នៅ​ក្នុង​ខេត្ត Donetsk ជាទី​ដែល​កងទ័ព​រុស្ស៊ី​បាន​បង្កើន​ការ​វាយ​សន្ធាប់​ក្នុង​រយៈពេល​ប៉ុន្មាន​ថ្ងៃ​ថ្មីៗ​នេះ។ ​អភិបាលខេត្ត Luhansk លោក Serhiy Haidai បាន​ច្រានចោល​កាលពី​ថ្ងៃ​ពុធ​ថា កងកម្លាំង​រុស្ស៊ី​ពុំបាន​ដណ្ដើម​គ្រប់គ្រង​ខេត្ត​នេះ​ទាំងស្រុង ដែល​ទីក្រុង​ចុងក្រោយ Lysychansk របស់​ខេត្ត​នេះ​បាន​ធ្លាក់​ចូល​ក្នុង​ដៃ​របស់​កងកម្លាំង​រុស្ស៊ី​កាលពី​ថ្ងៃអាទិត្យ។ លោ​កថា ​ការវាយប្រហារ​ដ៏​ខ្លាំងក្លា​នៅតែ​បន្ត​នៅ​ក្នុង​ភូមិ​នានា​ជុំវិញ​ទីក្រុង Lysychansk​។​ អភិបាលក្រុង​នីមួយៗ​និយាយ​ថា ពុំ​មាន​សុវត្ថិភាព​ទេ​នៅ​ក្នុង​ទីក្រុង Mykolaiv ​និង Kharkiv ខណៈ​កងកម្លាំង​រុស្ស៊ី​ព្យាយាមវាយ​សម្រុក​ក្នុង​តំបន់ Donetsk៕

អត្ថបទ៖ សុខមាន