ភ្នំពេញ៖ ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បានស្នើដល់ក្រសួង ស្ថាប័ន ប្រធានមន្ទីរសុខាភិបាលខេត្ត ម្ចាស់ជំនួយ តំណាងអង្គការជាតិ-អន្តរជាតិ ដៃគូអភិវឌ្ឍន៍ ប្តេជ្ញារួមគ្នាលុបបំបាត់ជំងឺគ្រុនចាញ់ ក្នុងឆ្នាំ២០២៥។

ការថ្លែងរបស់ឯកឧត្តមសាស្រ្តាចារ្យ ម៉ម ប៊ុនហេង យ៉ាងដូច្នេះក្នុងពិធីបើកកិច្ចប្រជុំផ្សព្វផ្សាយ និង​កំណត់អាទិភាពស្តីពី និរន្តរភាពរបស់កម្ពុជា​ក្នុងការឆ្លើយតប​នឹងជំងឺគ្រុនចាញ់​ រយៈពេល០២ថ្ងៃ ចាប់ពីថ្ងៃទី៧-៨ ខែកក្កដា ឆ្នាំ២០២២។

ឯកឧត្តមរដ្ឋមន្រី្ត បានបន្តទៀតថា ប្រទេសកម្ពុជា​មានផែនការលុបបំបាត់ជំងឺគ្រុនចាញ់​គ្រប់ទម្រង់​នៅ​ឆ្នាំ២០២៥ ក្រោមការ​ផ្តួចផ្តើម​ផ្ទាល់ពីសម្តេចតេជោ ហ៊ុន សែន នាយករដ្ឋមន្រ្តី។ តាមរយៈនៃការប្រតិបត្តិអន្តរាគមន៍តាមផែនការយុទ្ធសាស្រ្តជាតិលុបបំបាត់ជំងឺគ្រុនចាញ់ឆ្នាំ២០១១-២០២៥ ព្រមជាមួយកិច្ចសហការគាំទ្រពីសំណាក់ដៃគូ និងម្ចាស់ជំនួយ គឺលទ្ធផលយើងទទួល​បាន​ជាវិជ្ជមានលើការកាត់បន្ថយចំនួនករណីពីជាង ១០០,០០០ នៅឆ្នាំ២០១០ មកនៅត្រឹមតែតិចជាង ១០,០០០នៅឆ្នាំ២០២១ និងគ្មានករណីស្លាប់រយៈពេល៤ឆ្នាំចុងក្រោយពីឆ្នាំ២០១៨ មក។

បើតាមលោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត ​និងបាណកសាស្រ្ត បានឲ្យដឹងថា បច្ចុប្បន្ននេះ យើងឈានជិតដល់ការលុបបំបាត់​ហើយ ប៉ុន្តែផ្លូវសម្រាប់កម្ពុជាឆ្ពោះទៅដល់ការលុបបំបាត់មិនមែនជាប្រការងាយស្រួលឡើយ។ ការប្រឈម​នឹងបញ្ហាស៊ាំឱសថ​ប្រឆាំងនឹងមេរោគគ្រុនចាញ់ និងការផ្តល់សេវាជូនសហគមន៍​និង​ប្រជាជនដាច់ស្រយាលពិបាកចូលទៅដល់​ គឺនៅតែមាននៅឡើយ។

ទន្ទឹមគ្នានៃបញ្ហាប្រឈមទាំងនេះ មជ្ឈមណ្ឌលជាតិប្រយុទ្ធនិងជំងឺគ្រុនចាញ់ ​ប៉ារ៉ាស៊ីតសាស្រ្ត និងបាណក​សាស្រ្ត ​នៅតែប្តេជ្ញាចិត្តដោយព្យាយាមបំផុតបន្តធ្វើការជាមួយដៃគូរ រាជរដ្ឋាភិបាល​របស់​យើង ដៃគូរសហគមន៍អន្តរជាតិ ​និងសង្គមស៊ីវិលក្នុងការកសាងកម្មវិធីលុបបំបាត់​មួយដែល​មាន​ភាពជោគជ័យ។ សព្វថ្ងៃនេះ ក្រោមការចង្អុលបង្ហាញពី ​ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តី​ក្រសួងសុខាភិបាល មជ្ឈមណ្ឌលជាតិ បានមានក្របខ័ណ្ឌសកម្មភាពលុបបំបាត់ជំងឺ​គ្រុនចាញ់ (MEAF) មួយលំអិតដ៏ល្អសម្រាប់ឈានទៅលុបបំបាត់ជំងឺ​គ្រុនចាញ់ ហើយត្រូវបានគាំទ្រ​ដោយ​ដៃគូជាច្រើន ​ទាំងបណ្តាញរាជរដ្ឋាភិបាល​ សង្គមស៊ីវិល និងអង្គការអន្តរជាតិ ដែលភាគច្រើន​កំពុង​មានវត្តមាននៅទីនេះ។

លោកវេជ្ជបណ្ឌិត ក៏សូមថ្លែងអំណរគុណចំពោះ អង្គការសុខភាពពិភពលោក WHO, UNOPS, RSC, CHAI, URC, CRS, MC និងដៃគូជាតិ អន្តរជាតិ និងសង្គមស៊ីវិលផ្សេងៗទៀត ដែលបានបន្តគាំទ្រ​ទាំង​ផ្នែកបច្ចេកទេស និងកម្មវិធី។ សង្ឃឹមយ៉ាងមុតមាំថា ​ការបន្តកិច្ចខិតខំប្រឹងប្រែង មានការទទួល​ខុសត្រូវខ្ពស់ និងចូលរួមគាំទ្រពេញលេញ ​គឺយើងនឹងសំរេចបានជោគជ័យ លើទិសដៅលុប​បំបាត់​ការចម្លងជំងឺគ្រុនចាញ់ ដោយមេរោគហ្វាល់ស៊ីប៉ារ៉ូម នៅឆ្នាំ២០២៣​ និងគ្មានការចម្លងជំងឺគ្រុនចាញ់ គ្រប់ប្រភេទនៅឆ្នាំ២០២៥៕អត្ថបទ៖ រដ្ឋា