ភ្នំពេញ៖ ឯកឧត្តម ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា លើកឡើងថា គុណភាពគ្រូបង្រៀន ជាគុណភាពវិស័យអប់រំ។ ការលើកឡើងដូចនេះ ធ្វើឡើងក្នុងឱកាស ចូលរួមការកម្មវិធីដាក់បង្ហាញស្នាដៃស្រាវជ្រាវរបស់គរុនិស្សិតកម្រិតឧត្តមជំនាន់ទី ២៦ នៃវិទ្យាស្ថានជាតិអប់រំ។

ក្នុងឱកាសដាក់បង្ហាញស្នាដៃស្រាវជ្រាវនៅថ្ងៃដំបូងនេះ ឯកឧត្តម ហង់ ជួនណារ៉ុន រដ្ឋមន្រ្តី​ក្រសួងអប់រំ យុវជន និងកីឡា បានកោតសសើរដល់ គរុសិស្សដែលមានការខិតខំព្យាយាម ហើយ​ក៏បាន​ផ្ដល់ការណែនាំដល់គរុនិស្សិត​ទាំងអស់ ​ដោយឯកឧត្តម បានលើកឡើងថា គុណភាព​គ្រូបង្រៀន ​ជាគុណភាពវិស័យអប់រំ ។

គ្រូបង្រៀនត្រូវមានចំណេះច្បាស់លាស់លើមុខជំនាញវិជ្ជាជីវៈរបស់ខ្លួន ​បូករួមជាមួយចំណេះ​ដឹង​ទូទៅ ​និងបូកថែមការសិក្សាស្រាវជ្រាវ​ជាប្រចាំ​ និងត្រូវមានចំណេះ​ដឹងផ្នែកបច្ចេកវិទ្យាផងដែរ។

ឯកឧត្តមរដ្ឋមន្រ្តី គូសបញ្ជាក់ដែរថា វិស័យអប់រំ​ជា​អនាគត​របស់​ប្រទេសជាតិ ​ជាសសរទ្រូង​ប្រទេស​ជាតិ ហេតុដូចនេះទើបក្រសួង ​បានដាក់ចេញនូវការធ្វើកំណែទម្រង់វិស័យអប់រំ។ ការលើកកម្ពស់គុណភាពគ្រូបង្រៀន ​ក៏ជាផ្នែកសំខាន់នៃកំណែទម្រង់នេះ។ ជាការយកចិត្តទុកចិត្តទុកដាក់ រាជរដ្ឋាភិបាល ក៏បានបង្កើនប្រាក់បៀវត្សប្រចាំខែ ជាបន្តបន្ទាប់​សម្រាប់​គ្រូបង្រៀនផងដែរ។

សម្រាប់កម្មវិធីដែលរៀបចំរយៈពេល ២ថ្ងៃ គឺថ្ងៃទី ៧-៨ កក្កដានេះ គឺជាការបង្ហាញ​ស្នាដៃ​ស្រាវជ្រាវ​របស់ គរុនិស្សិតកម្រិតឧត្តមជំនាន់ទី ២៦​ ដែលបានចាប់ផ្ដើមគម្រោងតាំងពីចុងឆ្នាំ ​២០២១មកម្លេះ។ នេះក៏ជាស្នាដៃ ​ដែលត្រូវបំពេញមុននឹង​បញ្ចប់​ការសិក្សាចេញទៅបង្រៀន​ដោយផ្ទាល់ផងដែរ។

ស្នាដៃស្រាវជ្រាវ​ជាច្រើនបានដាក់បង្ហាញ ​ទៅតាមជំនាញរបស់គរុសិស្ស។ ជាក់ស្ដែងក្រុម​គរុសិស្សខ្លះ ​បង្កើតស្នាដៃដែលអាចបង្កើត ​អុកស៊ីសែន ដែលមានសារៈសំខាន់សម្រាប់​វិស័យ​សុខាភិបាល។ ឯក្រុមខ្លះទៀត ​បង្កើតថាមពលអគ្គីសនី ​ដោយប្រើប្រាស់ថាមពលខ្យល់។

ពាក់ព័ន្ធនឹងការរៀបចំកម្មវិធីនេះ លោក សៀង សុវណ្ណា ជានាយកវិទ្យាស្ថានជាតិអប់រំ បញ្ជាក់​ពីគោល​បំណង​ច្បាស់លាស់ ដើម្បីឱ្យគរុសិស្សអាចអនុវត្តវិជ្ជាជីវៈតាមរយៈការផលិតសម្ភារៈរៀន និងបង្រៀន ​លើកកម្ពស់ការស្រាវជ្រាវរបស់គរុសិស្ស ​ទាំងផ្នែកចំណេះដឹងវិធីសាស្រ្តបង្រៀន និងគោល​បំណងជាច្រើនទៀត ​ដែលមានសារៈសំខាន់សម្រាប់វិជ្ជាជីវៈជាគ្រូបង្រៀន៕

អត្ថបទ៖ គឹមហុក