ភ្នំពេញ៖ នៅថ្ងៃទី៧ ខែកក្កដា ឆ្នាំ២០២២នេះ ចំថ្ងៃខួប១៤ឆ្នាំ នៃការដាក់ប្រាសាទព្រះវិហារ ចូលក្នុងបញ្ជីបេតិកភណ្ឌពិភពលោក ដោយអង្គការUNESCO នៅទីក្រុងកេប៊ិច ប្រទេសកាណាដា។ បណ្តាពលរដ្ឋខ្មែរគ្រប់​មជ្ឈដ្ឋាន​បង្ហាញការចងចាំជានិច្ច និង​មាន​មោទនភាព​ចំពោះប្រមុខថ្នាក់​ដឹកនាំ​រាជរដ្ឋាភិបាលបច្ចុប្បន្ន ដែលកាលនោះ បានខិតខំរៀបចំស្នើដាក់ប្រាសាទព្រះវិហារ​ក្នុងបញ្ជី​បេតិកភណ្ឌពិភពលោក​ស្ថានភាពមួយ​ក្នុង​ស្ថានភាព​តានតឹង​បំផុតទទួលបានជោគជ័យ។

ពលរដ្ឋថ្លែងប្រាប់BTV នៅថ្ងៃទី៧ខែកក្កដានេះថា ការដាក់ប្រាសាទព្រះវិហារ​ចូលក្នុងបញ្ជី​សម្បតិ្ត​បេតិកភណ្ឌវប្បធម៌រូបីយ​នៃមនុស្សជាតិ​ របស់អង្គការUNESCO នោះ គឺពិតជាមាន​តម្លៃខ្លាំងណាស់សម្រាប់ជាតិខ្មែរទាំងមូល ​ជាពិសេសការ​នាំ​កេរ្តិ៍ឈ្មោះ​កិត្តិយស​កម្ពុជា​ទៅ​លើពិភពលោក ធ្វើឲ្យពិភពលោកស្គាល់ពីកម្ពុជា ​និងការទាក់ទាញទេសចរ មនុស្សជាតិ​លើពិភពលោកមកទស្សនាកម្ពុជា​ ជាពិសេសប្រាសាទព្រះវិហារ។

ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានថ្លែងថា នៅថ្ងៃនេះ​ក្រសួងទេសចរណ៍ ក៏សូម​បង្ហាញពីមោទនភាពរាជរដ្ឋាភិបាលដាក់ប្រាសាទ​ព្រះវិហារចូល​ក្នុងបញ្ជី​បេតិកភណ្ឌ​ពិភពលោក ​ខណៈចាប់ពីថ្ងៃចុះបញ្ជីនោះមក​ រាជរដ្ឋាភិបាលកម្ពុជា ​បាន​ខិតខំប្រឹង​អភិរក្ស អភិវឌ្ឍន៍ផ្លូវទៅកាន់ប្រាសាទព្រះវិហារ ​និងមានការរៀបចំកញ្ចប់ទេសចរណ៍ និងជម្រុញ​ពលរដ្ឋទៅទស្សនាខេត្តព្រះវិហារ ​ខណៈគោលដៅ​ទេសចរណ៍នៅខេត្តព្រះវិហារ​មាន​តំបន់ទេសចរណ៍​ប្រណិតចំនួន ៥កន្លែង​ ក្នុងតំបន់ប្រាសាទព្រះវិហារ​ មានភាពទាក់ទាញខ្លាំងគេ។

បើតាមឯកឧត្តម គង់ ពុទ្ធិការ អគ្គនាយកអាជ្ញាធរជាតិព្រះវិហារ ថ្លែងថា បន្ទាប់ពីរាជរដ្ឋាភិបាល​ប្រកាសបើក​ប្រទេសវិញមក ​ក្នុងរយៈពេល៦ខែ ឆ្នាំ២០២២នេះប្រាសាទព្រះវិហារបានទទួលភ្ញៀវទៅ​ទស្សនា​ប្រមាណជាង ៦ម៉ឺននាក់ ក្នុងនោះ​ទេសចរអន្តរជាតិ ១០៥៥នាក់ កើនឡើងបើធៀប​រយៈពេល​ដូចគ្នា​ឆ្នាំ២០២១ ​ដែលមានត្រឹមប្រមាណ ៥ម៉ឺននាក់។

ឯកឧត្តម បន្តថា ក្នុងរយៈពេល១៤ឆ្នាំអាជ្ញាធរជាតិព្រះវិហារ បានបំពេញតួនាទីភារកិច្ចយ៉ាងសកម្ម ក្នុង​ការអភិរក្ស និង​ជុសជុល​ប្រាសាទ ​ដែល​ទទួលបានកញ្ចប់ថវិកាពីរាជរដ្ឋាភិបាលផង និង​តាមយន្តការគណៈកម្មការសម្របសម្រួលអន្តរជាតិ ដើម្បីអភិរក្សប្រាសាទព្រះវិហារ ដែល​មានប្រទេសចិន ​និងឥណ្ឌា ជាសហប្រធាន និងមានប្រទេសចំនួន ៧ទៀតជាសមាជិក​ រួមមាន៖ សហរដ្ឋអាមេរិក​ បារាំង​ ប៊ែលហ្សិក ជប៉ុន កូរ៉េខាងត្បូង ​និងប្រទេសថៃ បានចូលរួមគ្នា​អភិរក្ស​ប្រាសាទព្រះវិហារផងដែរ៕ អត្ថបទ ស៊ុម សុខជា