អ៊ុយក្រែន៖ យោធាអ៊ុយក្រែនបាននិយាយថា កងកម្លាំងអ៊ុយក្រែនបានរុញច្រានការវាយលុករបស់រុស្ស៊ី នៅតាមបណ្ដោយជួរមុខជាច្រើនកន្លែងកាលពីថ្ងៃពុធ រួមទាំងនៅតំបន់ភាគខាងកើតដែលកំពុងប្រយុទ្ធគ្នា។
នាយសេនាធិការនៃអ្នកនាំពាក្យកងកម្លាំងប្រដាប់អាវុធអ៊ុយក្រែនលោក Oleksandr Shtupun បាននិយាយថា កងទ័ពអ៊ុយក្រែនបានរុញច្រានអង្គភាពសត្រូវដែលកំពុងរុលឆ្ពោះទៅកាន់ទីក្រុង Sloviansk ជាទីក្រុងមួយនៅតំបន់ Donetsk ភាគខាងកើតដែលត្រូវបានគេមើលឃើញថា ជាគោលដៅសំខាន់ដ៏មានសក្ដានុពលសម្រាប់ទីក្រុងមូស្គូ បន្ទាប់ពីការដណ្ដើមកាន់កាប់តំបន់ Luhansk។ លោកបានអះអាងថា យោធាអ៊ុយក្រែនបានវាយរុញច្រានការវាយលុករបស់រុស្ស៊ីទៅលើទីក្រុង និងភូមិនៅភាគខាងជើងទីក្រុង Kharkiv។ ជាមួយគ្នានេះតាមសេចក្ដីរាយការណ៍បានឲ្យដឹងថា កុមារ ២នាក់ត្រូវបានគេរាយការណ៍ថាបានស្លាប់កាលពីថ្ងៃពុធ និង ៣នាក់ផ្សេងទៀតរងរបួសនៅក្រុង Makiivka តំបន់ Donetsk គ្រប់គ្រងដោយក្រុមឧទ្ទាម ក្នុងការបាញ់ផ្លោងមួយដែលត្រូវបានដាក់កំហុសទៅលើកងកម្លាំងអ៊ុយក្រែន។
សាក្សីបាននិយាយថា មីស៊ីល Uragan សម័យសូវៀតបានវាយប្រហារលើសួនកុមារ នៅខាងក្រៅលំនៅឋានមួយកន្លែង។ ប្រព័ន្ធផ្សព្វផ្សាយរុស្ស៊ីបានដកស្រង់សំដីមន្ត្រីតំបន់ និងទាហានប៉ារ៉ារបស់សាធារណរដ្ឋប្រជាមានិត Donetsk ដែលប្រកាសខ្លួនឯងបាននិយាយថា កុមារ ២នាក់បានស្លាប់, កុមារ ៣នាក់ទៀតរងរបួស និងមនុស្សពេញវ័យ ២នាក់ ទោះបីជាព័ត៌មាននៅមិនទាន់មានប្រភពផ្លូវការ ពីភាគីណាមួយធ្វើការអះអាងនៅឡើយ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
