ភ្នំពេញ៖ បងប្អូនប្រជាពលរដ្ឋខ្មែរ ដែលកំពុងរស់នៅរដ្ឋដាច់ដោយឡែកពីគ្នា នៅសហរដ្ឋអាមេរិក បាននាំគ្នាចូលរួមថវិកាជាបន្តបន្ទាប់ ជាមួយរាជរដ្ឋាភិបាលកម្ពុជា ដើម្បីបោសសំអាតគ្រាប់មីន និងគ្រាប់មិនទាន់ផ្ទុះ បន្ទាប់ពីសម្តេចតេជោ ហ៊ុន សែន នាយករដ្ឋមន្រ្តី ធ្វើការ​អំពាវនាវ​កាល​ពី​កន្លងទៅថ្មីៗនេះ។

សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា កាលពីថ្ងៃទី១ ខែកក្កដា ឆ្នាំ២០២២​កន្លងទៅនេះ ក្នុងពិធីលែងកូនត្រីនៅខេត្តបន្ទាយមានជ័យ បាន​អំពាវនាវ​ឱ្យ​សប្បុរសជន​ចូលរួមបំបាត់ចោលគ្រាប់មីន​ និងគ្រាប់មិនទាន់ផ្ទុះ ​ដើម្បីកម្ពុជា​ឈាន​ទៅគ្មានគ្រាប់មីន​នៅ​ឆ្នាំ២០២៥។

ភ្លាមៗបន្ទាប់ពីមានការអំពាវនាវរបស់ប្រមុខរាជរដ្ឋភិបាលនេះ ​មានសប្បុរសជនទាំងក្នុងស្រុក ​និង ក្រៅស្រុកជាច្រើនបាននាំគ្នាប្រកាស​ចូលរួមជាបន្តបន្ទាប់។ ​ជាក់ស្តែងរហូតដល់ពេលនេះ គឺ​មានជាង ១០លានដុល្លារអាមេរិកហើយ ​ដោយការចូលរួមពី​សប្បុរសជន​ បងប្អូនប្រជាពលរដ្ឋទាំង​ក្នុង ​និងក្រៅប្រទេសនេះ ​គឺប្រកបដោយភាពស្នាមញញឹម ​ដើម្បីធ្វើយ៉ាងណាឲ្យប្រទេសកម្ពុជា ជាប្រទេសដែលគ្មានគ្រាប់មីន​ ក្នុងពេលឆាប់រហ័សនោះ។

ក្រោយពីមានការចូលរួម​ពីយ៉ាង​ផុលផុស​របស់សប្បុរសជនខ្មែរ ទាំងក្នុងស្រុក​ និងក្រៅស្រុកនោះ សម្តេចតេជោ ហ៊ុន សែន បានផ្ញើសារតាមបណ្តាញ​សង្គមហ្វេសបុក ថ្លែងអំណរគុណ​ដល់​សប្បុរសជន ​ដែល​ចូលរួម​បរិច្ចាគ​ថវិកា​ជូនរាជរដ្ឋាភិបាល​ ដើម្បីបំបាត់​គ្រាប់មីន​ និងគ្រាប់មិនទាន់ផ្ទុះ​ក្នុងប្រទេស ​៕អត្ថបទ៖ បានចក់