ភ្នំពេញ៖ ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) អាជ្ញាធរកម្ពុជាគ្រប់គ្រង​សកម្មភាព​កម្ចាត់មីន និងសង្គ្រោះជនពិការ ដោយសារមីន (CMAA) និងអង្គការកម្មវិធីអភិវឌ្ឍន៍ របស់​អង្គការ​សហប្រជាជាតិ (UNDP) ​និង​សហគមន៍​ម្ចាស់ជំនួយ បានបើកការប្រជុំ​សម្រាប់​ពាក់​កណ្តាល​ឆ្នាំ២០២២ ​របស់ក្រុមប្រឹក្សាភិបាលនៃ “គម្រោងបោសសម្អាតមីន ដើម្បីទទួលបាន​លទ្ធផល​ដំណាក់កាលទី៤(CFR-IV)-សកម្មភាពមីនសម្រាប់គម្រោង​អភិវឌ្ឍន៍មនុស្ស” នៅថ្ងៃទី៧ ខែកក្កដា ឆ្នាំ២០២២នេះ។

សូមបញ្ជាក់ថា “គម្រោងបោសសម្អាតមីន ដើម្បីលទ្ធផលដំណាក់កាលទី៤(CFR-IV)-សកម្មភាពមីន​សម្រាប់​គម្រោងអភិវឌ្ឍន៍មនុស្ស” គឺស្របតាមយុទ្ធសាស្ត្រជាតិ សកម្មភាពមីន(NMAS) របស់កម្ពុជា ហើយ​មានលទ្ធភាពខ្ពស់ក្នុងការរួមចំណែក​ដល់កម្ពុជា ​គ្មានមីន ​ដែលជាគោលដៅទី១៨ របស់​គោលដៅ​អភិវឌ្ឍន៍ប្រកបដោយចីរភាព (SDG) ដែលកំណត់ដោយរដ្ឋាភិបាលកម្ពុជា ហើយកយកា-KOICA ​បាននឹងកំពុងជួយដល់សកម្មភាពបោសសម្អាតមីន ​នៅកម្ពុជា ដោយផ្តល់ថវិកាចំនួន ១០លានដុល្លារ​អាមេរិក ពីឆ្នាំ២០២១ ដល់ឆ្នាំ២០២៥។

កិច្ចប្រជុំនេះ ត្រូវបានធ្វើឡើងក្រោមអធិបតីភាពលោកស្រី ជី យៀក្យុង (Ms. Ji Yea Kyung) អនុប្រធានតំណាង ​នៃការិយាល័យ ​កយកា-KOICA ប្រចាំប្រទេសកម្ពុជា, ឯកឧត្ដម លី ធុជ ទេសរដ្ឋមន្ត្រី ​និងជាអនុប្រធានទី១ អាជ្ញាធរមីន និងលោកស្រី Sonali Dayaratne អនុប្រធានតំណាង នៃកម្មវិធីអភិវឌ្ឍន៍របស់អង្គការសហប្រជាជាតិ (UNDP) ប្រចាំកម្ពុជា រួមជាមួយសហការីអាជ្ញាធរមីន និង យូអិនឌីភី ​និងមានការចូលរួមពីតំណាងមកពីនាយកដ្ឋានកិច្ចការបរទេស និង​ពាណិជ្ជកម្ម(DFAT) របស់ប្រទេសអូស្រ្តាលី ប្រទេសនូវែលហ្សេឡង់ និងមកពីក្រសួងសេដ្ឋកិច្ច និងហិរញ្ញវត្ថុកម្ពុជាផងដែរ។

កិច្ចប្រជុំនេះ គឺដើម្បីពិនិត្យ ទី១)-សមិទ្ធផលគម្រោងពីខែមករា ​ដល់ខែមិថុនា ឆ្នាំ២០២២, ទី២)-ការងារ​អាទិភាពសំខាន់ៗសម្រាប់ខែកក្កដា​ ដល់ខែធ្នូ ឆ្នាំ២០២២, ទី៣)-បញ្ហាប្រឈមក្នុង​ការអនុវត្តគម្រោង និងទី៤)-បច្ចុប្បន្នភាព​ហិរញ្ញវត្ថុជាដើម។

អ្នកចូលរួមទាំងអស់បានចូលរួមយ៉ាងសកម្មនៅក្នុងកិច្ចប្រជុំ ​និងចែករំលែកការយល់ដឹង និង​យោបល់​របស់​ពួកគេ​លើ​ប្រធានបទ​ដែលបានលើកឡើង ដែលនាំឲ្យកិច្ចប្រជុំនេះបាន​ទទួល​លទ្ធផលជាផ្លែផ្កា៕អត្ថបទ៖ រដ្ឋា