កំពង់ស្ពឺ៖ មន្ទីរសុខាភិបាលនៃរដ្ឋបាលខេត្តកំពង់ស្ពឺ សហការជាមួយនឹងកម្មវិធីជាតិប្រយុទ្ធ នឹងជំងឺគ្រុនឈាម នៃក្រសួងសុខាភិបាល និងអាជ្ញាធរដែនដី ព្រឹកថ្ងៃទី៧ ខែកក្កដា ឆ្នាំ២០២២នេះ បានបើកយុទ្ធនាការអប់រំផ្សព្វផ្សាយស្តីពីការបង្ការទប់ស្កាត់ជំងឺគ្រុនឈាម ជូនដល់​សិស្សានុសិស្សនៅក្នុងវិទ្យាល័យ កំពង់ស្ពឺ និងសាលាបឋមសិក្សាឯកភាព ស្ថិតក្នុងភូមិស្រីសំពោង ឃុំខ្ទុំក្រាំង ស្រុកសំរោងទង ខេត្តកំពង់ស្ពឺ។

យុទ្ធនាការខាងលើនេះ ដោយមានការចូលរួមពីលោកវេជ្ជបណ្ឌិត លាង ឬទ្ធា ប្រធានកម្មវិធី​ជាតិប្រយុទ្ធ នឹងជំងឺគ្រុនឈាម ​តំណាងអង្គការសុខភាពពិភពលោក(WHO) មន្ត្រីនៃមន្ទីរ​សុខាភិបាល​ខេត្តកំពង់ស្ពឺ ​យុវជនសភាពសហព័ន្ធយវុជនកម្ពុជាខេត្ត យុវជនកាកបាទ​ក្រហមខេត្ត លោក លោកស្រី អាជ្ញាធរដែនដី លោក លោកស្រី ការិយាល័យសុខាភិបាលស្រុកប្រតិបត្តិ កំពង់ស្ពឺ និងមណ្ឌលសុខភាពក្រាំងព្នាយ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋប្រមាណជាង ១៥០នាក់ផងដែរ ។

បើតាមមន្ត្រីនៃមន្ទីសុខាភិបាលខេត្តកំពង់ស្ពឺ បានឱ្យដឹងថា អត្រាអ្នកឆ្លងជំងឺគ្រុនឈាម មានការកើន​ឡើងហើយ បើគិតមកដល់ពេលនេះ ​ខណៈដែលមន្ទីរសុខាភិបាលខេត្ត នៅតែបន្តបើកយុទ្ធនាការ​អប់រំ​ផ្សព្វផ្សាយស្ដីអំពី ជំងឺគ្រុនឈាម និងវិធីបង្ការ នៅតែបន្តធ្វើយ៉ាងសកម្ម នៅតាមមូលដ្ឋាន​សហគមន៍​ក្នុងស្រុក-ក្រុង នៃខេត្តកំពង់ស្ពឺ ជាពិសេសនៅតំបន់ដែលមានការឆ្លងនូវ​ជំងឺគ្រុនឈាមនេះ។

សូមបញ្ជាក់ផងដែរថា យុទ្ធនាការនេះខាងមន្ទីរសុខាភិបាលខេត្តកំពង់ស្ពឺ តែងតែអនុវត្តន៍គ្រប់​បណ្តាស្រុក ក្រុង នៃខេត្តកំពង់ស្ពឺ ​ហើយបានផ្តោតលើចំណុចសំខាន់ៗដូចជា៖ ការផ្សព្វផ្សាយ​អំពីជំងឺគ្រុនឈាម វិធីបង្ការ ការពារ បំបាត់ជំរកមូសខ្លា, ករណីសង្ស័យត្រូវបញ្ជូនអ្នកជំងឺទៅ​កាន់​មូលដ្ឋានសុខាភិបាល ដែលនៅជិតបំផុត, ការដាក់ថ្នាំអាបែតសម្លាប់ដង្កូវទឹក ក្នុងពាងទឹក អាងទឹក, ការបាញ់ថ្នាំសម្លាប់មូសខ្លា នៅតាមសាលារៀន មណ្ឌលសុខភាព លំនៅដ្ឋានប្រជាជន​ (គ្មានទឹកដក់ គ្មានដង្កូវទឹក គ្មានមូសខ្លា គ្មានជំងឺគ្រុនឈាម គ្រួសារមានសុខភាពល្អ)។ ​ការចុះយុទ្ធនាការនេះ មន្ទីរសុខាភិបាលខេត្ត បានផ្សព្វផ្សាយដល់ប្រជាពលរដ្ឋគ្រប់មូលដ្ឋាន ឲ្យមានការប្រុងប្រយ័ត្នខ្ពស់​ចំពោះសុខភាព និងត្រូវបង្កើនការប្រុងប្រយ័ត្ន ចំពោះបញ្ហាជំងឺ គ្រុនឈាម ដែល​កំពុងមាន​អាត្រាខ្ពស់ ដែលកើតមកលើមនុស្សគ្រប់វ័យ ហេតុនេះយើងទាំងអស់គ្នា ត្រូវចូលរួមធ្វើអនាម័យ​ថែរក្សាបរិស្ថាន ​ដើម្បីកំចាត់ជម្រកមូសខ្លា ​ហើយត្រូវសំរាន្តក្នុងមុង ស្លៀកពាក់ខោអាវជើងវែង ដៃវែងជានិច្ច៕ អត្ថបទ រដ្ឋា