ភ្នំពេញ៖ គណៈកម្មាធិការជាតិគ្រប់គ្រងកម្មសិទ្ធិបញ្ញា កំពុងរៀបចំចុះបញ្ជី «បង្គារក្រៀមកំពង់សោម» ជាម៉ាកសម្គាល់ភូមិសាស្រ្ត​ ក្នុងប្រទេសកម្ពុជា ដើម្បីជំរុញការផលិត លើកកម្ពស់ទីផ្សារក្នុងស្រុក និងនាំចេញ។

ឯកឧត្តម សួន វិជ្ជា ប្រធានលេខាធិការដ្ឋាននៃគណៈកម្មាធិការជាតិគ្រប់គ្រងកម្មសិទ្ធិបញ្ញា និងជា​ប្រធាន​នាយកដ្ឋានកម្មសិទ្ធិបញ្ញា ​បានអញ្ជើញចូលរួមជាអធិបតីក្នុងសិក្ខាសាលា​ពិគ្រោះយោបល់​ស្តីពី ការកំណត់ផលិតផលសក្តានុពលសម្រាប់កសាងកេរ្តិ៍ឈ្មោះម៉ាកសម្គាល់ភូមិសាស្រ្តទំនិញ “បង្គារក្រៀមកំពង់សោម” កាលពីថ្ងៃទី៥ ខែកក្កដាកន្លងទៅ។

សិក្ខាសាលានេះ ក៏មានការចូលរួមពីតំណាងក្រសួងកសិកម្មរុក្ខាប្រមាញ់ និងនេសាទ ផលិតករ និងអាជីវករទិញ​លក់បង្គារក្រៀមកំពង់សោម និងភាគីពាក់ព័ន្ធផ្សេងៗ សរុបចំនួនប្រមាណ ៣០រូប។

ឯកឧត្តម លើកឡើងថា ក្រសួងពាណិជ្ជកម្មបានខិតខំស្វះស្វែងរកអង្គការដៃគូអភិវឌ្ឍន៍ ដើម្បី​សិក្សា​លទ្ធភាពក្នុងការចុះបញ្ជីម៉ាកសម្គាល់ភូមិសាស្រ្តទំនិញ​ ឬម៉ាកសមូហភាព លើវិស័យជលផល​រួមមាន “បង្គារក្រៀមកំពង់សោម បង្គារក្រៀមកោះកុង និងប្រហុកត្រីសៀមរាប” ដែលជាផលិតផលជលផលរបស់ប្រទេសកម្ពុជា។

ឯកឧត្តម បានស្នើឱ្យអង្គការ UNIDO ពិនិត្យលទ្ធភាពរបស់ខ្លួនក្នុងការរៀបចំចុះបញ្ជី “បង្គារក្រៀម​កំពង់​សោម” ជាម៉ាកសម្គាល់ភូមិសាស្រ្តទំនិញ ក្នុងប្រទេសកម្ពុជា។

ប្រធានលេខាធិការដ្ឋាននៃគណៈកម្មាធិការជាតិគ្រប់គ្រងកម្មសិទ្ធិបញ្ញា បានថ្លែងអំណរគុណ និង​កោតសរសើរចំពោះកិច្ចខិតខំប្រឹងប្រែងរបស់អង្គការ​ UNIDO ​និងគ្រប់ភាគីពាក់ព័ន្ធ ក្នុងការ​សិក្សា​ស្រាវជ្រាវ ​និងជំរុញផលិតផលនេសាទក្នុងប្រទេសកម្ពុជា ដើម្បីរៀបចំចុះបញ្ជី​ការ​ពារជាម៉ាក​សម្គាល់​ភូមិសាស្រ្តទំនិញ។

សូមបញ្ជាក់ថា គណៈកម្មាធិការជាតិគ្រប់គ្រងកម្មសិទ្ធិបញ្ញានៃក្រសួងពាណិជ្ជកម្ម ​កន្លងមក បាន​ចុះបញ្ជី​ផលិតផលសក្តានុពលមួយចំនួន ដូចជា ​ដូងខ្ជិះបាត់ដំបង ​ស្ករត្នោតកំពង់ស្ពឺ ទឹកឃ្មុំព្រៃមណ្ឌលគិរី ​និងផលិតផលសមូហភាពក្រូចថ្លុងក្រចេះជាដើម៕ អត្ថបទ៖ វណ្ណៈ