​ភ្នំពេញ៖ ម្ចាស់អាជីវកម្ម និងធុរកិច្ចកម្ពុជា ចាត់ទុកប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន របស់រាជរដ្ឋាភិបាលជាការចូលរួមចំណែកយ៉ាងសំខាន់ ក្នុងការដោះស្រាយបញ្ហាដែលម្ចាស់អាជីវកម្មជួបប្រទះ ផ្តល់ភាពងាយស្រួលរហ័ស ទាន់ចិត្ត កាត់បន្ថយពេលវេលានិងចំណាយផ្សេងៗ ជាពិសេសផ្តល់ការទាក់ទាញ និងផ្តល់ភាពងាយស្រួលដល់វិនិយោគិនបរទេស។

​ម្ចាស់អាជីវកម្ម និងធុរកិច្ចកម្ពុជា ថ្លែងលើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន នៅក្នុងវេទិការអ្នកមាន (ទម្លាប់អ្នកមាន) នៅថ្ងៃទី៧ ខែ កក្កដា ឆ្នាំ២០២២ នេះថា ទាក់ទងប្រតិបត្តការនៃការចុះបញ្ជី ដែលក្រសួងស្ថាប័នបានអនុវត្តនាពេលកន្លងមក តែងតែជួបបញ្ហាជាច្រើន លើការរៀបចំឯកសារ ការយឺតយ៉ាវលើការអនុម័តជូនដល់ក្រុមហ៊ុន រោងចក្រ សហគ្រាស និងការខាតបង់ពេលវេលា និងការចំណាយក្រៅផ្លូវការផ្សេងៗជាដើម។

ចំណែកការបង្កើតចុះបញ្ជីតាមអនឡាញ, ម្ចាស់អាជីវកម្មទាំងអស់នោះ បានថ្លែងនូវការកោតសរសើរ ចំពោះការគិតគូរយកចិត្តទុកដាក់ខ្ពស់របស់រាជរដ្ឋភិបាល ដែលបានបង្កើតប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានរបស់ជាតិឡើង ដោយបច្ចុប្បន្នប្រព័ន្ធនេះ បានកំពុងឆ្លើយតបឆ្លើយតបទៅនឹងរបត់ នៃការរីកចម្រើននៃប្រព័ន្ធបច្ចេកវិទ្យាផង និងបានផ្តល់ភាពងាយស្រួលដល់ម្ចាស់អាជីវកម្មផង ជាពិសេសជាងនេះទៅទៀត ប្រព័ន្ធចុះបញ្ជីនេះ នឹងផ្តល់ភាពងាយស្រួលដល់វិនិយោគិនបរទេស ដែលមានបំណងចុះបញ្ជីក្រុមហ៊ុន មកវិនិយោគនៅព្រះរាជាណាចក្រកម្ពុជា។

​សូមបញ្ជាក់ថា ការបង្កើតប្រព័ន្ធចុះបញ្ជីតាមថ្នាលប្រព័ន្ធបច្ចេកវិទ្យា របស់រាជរដ្ឋាភិបាល បានបង្កើតឡើងក្នុងរយៈពេលជាង ២ឆ្នាំ កន្លងមកហើយ, សម្រាប់ដំណាក់កាលទី​១ បានដាក់ឱ្យដំណើរការជាផ្លូវការ អស់រយៈពេលជាង ២​ឆ្នាំ ក្នុងស្ថាប័នដែលអនុវត្តមាន ក្រសួងពាណិជ្ជកម្ម, អគ្គនាយកដ្ឋានពន្ធដារ, ក្រុមប្រឹក្សាអភិវឌ្ឍន៍កម្ពុជា និងក្រសួងការងារ និងបណ្តុះបណ្តាលវិជ្ជាជីវៈ។

ចំណែកដំណាក់កាលទី២ បានដាក់ឲ្យដំណើរការនៅថ្ងៃទី១៥ ខែកញ្ញា ឆ្នាំ២០២១ ដោយផ្តោតលើការផ្តល់អាជ្ញាបណ្ណជំនាញពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, ក្រសួងទេសចរណ៍, ក្រសួងប្រៃសណីយ៍ និងទូរគមនាគមន៍ និងនិយ័តករអាជីវកម្មអចលនទ្រព្យ និងបញ្ចាំនៃអាជ្ញាធរសេវាហិរញ្ញវត្ថុមិនមែនធនាគារ, ក្នុងនោះបើគិតត្រឹមថ្ងៃទី ១៤ ខែមិថុនា ឆ្នាំ២០២២ ដែលមានរយៈពេល ២ឆ្នាំ កម្ពុជាទទួលបានក្រុមហ៊ុនតាមប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ដែលអនុម័តរួច មានចំនួន ១៤ ៦៧៦ ក្រុមហ៊ុន គិតជាដើមទុនសរុប មានចំនួនជិត ២០ ពាន់ប៊ីលានរៀល ត្រូវប្រមាណជាង ៤ ៦៧០ លានដុល្លារអាមេរិក៕អត្ថបទ៖ សុន រ៉ាឌី