គុនដាវ៖ ប្រជាជនម្នាក់លេងកីឡាមួយមុខ គឺជាផែនការយុទ្ធសាស្ដ្រមួយដើម្បីផ្សព្វផ្សាយពីដំណើរឆ្ពោះទៅស៊ីហ្គេមឆ្នាំ២០២៣ ខណៈសហព័ន្ធកីឡាជាតិនីមួយៗក៏បានចូលរួមអនុវត្តផែនការនេះដែរ ជាក់ស្ដែងកីឡាគុនដាវដែលបានអះអាងថា ខ្លួនបានបង្កើតកម្មវិធីមួយ ស្រដៀងនឹងផែនការនេះ ហើយបានអនុវត្តជាច្រើនឆ្នាំមកហើយ។
លោក សុខ អាង អគ្គលេខាធិការសហព័ន្ធកីឡាគុនដាវកម្ពុជា បានបញ្ជាក់ថា ក្នុងផែនការមេរបស់សហព័ន្ធមានចំណុចមួយ ផ្ដោតលើការចូលរួមទាំងគ្រូបង្វឹក ក្លិប កីឡាករ និងអ្នកគាំទ្រ តែបច្ចុប្បន្នសហព័ន្ធបានប្ដូរមកជា Academy Program វិញ ហើយជារៀងរាល់ឆ្នាំសហព័ន្ធតែងចុះទៅផ្សព្វផ្សាយគ្រប់រាជធានី-ខេត្តដើម្បីជំរុញការចូលរួម ដែលស្របជាមួយនឹងផែនការប្រជនម្នាក់ ឬយុវជនម្នាក់លេងកីឡាមួយមុខនេះដែរ។ អគ្គលេខាធិការសហព័ន្ធដដែលបន្ដថា ក្នុងការអនុវត្តនេះដែរ សហព័ន្ធបានយកគោលការណ៍ និងទ្រឹស្ដីមួយរបស់នាយកដ្ឋានអប់រំកាយ និងកីឡា និងអ្វីដែលបាល់ទាត់ធ្លាប់ធ្វើ ដូចជាការបែងចែកជា ៥ភូមិភាគជាដើម ពោលគឺក្នុងឆ្នាំនីមួយៗ សហព័ន្ធបានជ្រើសរើសខេត្ត ឬភូមិភាគមួយដើម្បីបើកវគ្គបណ្ដុះបណ្ដាលដល់គ្រូអប់រំកាយ ដើម្បីជំរុញការចែករំលែកចំណេះដឹងដល់កីឡាករ-កីឡាការិនីតាមក្លិប ឬសាលាបន្ដ។
ទន្ទឹមជាមួយកម្មវិធី Academy Program នេះ សហព័ន្ធក៏បានរៀបចំការប្រកួតជ្រើសរើសជើងឯកយុវជនប្រចាំឆ្នាំ ដើម្បីផ្សាភ្ជាប់ជាមួយកម្មវិធីនេះដែរ ដោយកីឡាករ-កីឡាការិនីដែលទទួលបានការបណ្ដុះបណ្ដាល និងហ្វឹកហាត់ ក្រោយយុទ្ធនាការបើកវគ្គបណ្ដុះបណ្ដាលប្រចាំឆ្នាំរបស់សហព័ន្ធ ពួកគេនឹងអាចចូលរួមការប្រកួតនេះបាន ដើម្បីបង្ហាញសមត្ថភាព និងទេពកោសល្យរបស់ខ្លួនក្នុងវិស័យកីឡាគុនដាវនេះ។ សូមរំឭកថា ផែនការប្រជាជនម្នាក់លេងកីឡាមួយមុខ គឺជាផែនការមួយដែលសម្រេចដោយរាជរដ្ឋាភិបាល និងត្រូវបានសម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ជំរុញឲ្យប្រជាពលរដ្ឋគ្រប់រូបលេងកីឡាឲ្យបានគ្រប់ៗគ្នា មិនថាកីឡាអ្វីក៏ដោយ ដើម្បីជំរុញយុទ្ធនាការឆ្ពោះទៅរកភាពជោគជ័យ ក្នុងការត្រៀមខ្លួនធ្វើជាម្ចាស់ផ្ទះជាប្រវត្តិសាស្ត្រលើកដំបូង នៃការប្រកួតកីឡាស៊ីហ្គេមលើកទី៣២ ឆ្នាំ២០២៣៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
