​ស្រីលង្កា៖ ប្រធានាធិបតី​ស្រីលង្កា​បាន​ស្នើ​លោក Vladimir Putin ឲ្យ​ជួយ​នាំចូល​ប្រេង​ឥន្ធនៈ ខណៈ​សេដ្ឋកិច្ច​របស់​ប្រទេស​នេះ​កាន់តែ​ធ្ងន់ធ្ងរ​។ ​លោក Gotabaya Rajapaksa បាន​និយាយ​នៅ​ក្នុង​បណ្ដាញ tweeter នៅ​សប្ដាហ៍​នេះ​ថា លោក​បានសន្ទនា​តាម​ទូរស័ព្ទ​ប្រកបដោយ​ផ្លែផ្កា​ជាមួយ​ប្រធានាធិបតី​រុស្ស៊ី ដែល​រូបលោក​បាន​ស្នើ​សុំ​ឲ្យ​ជួយ​គាំទ្រ​ប្រទេស​ដី​កោះ​មួយ​នេះ​។ ស្រីលង្កា​បាន​ទិញ​ប្រេង​ពី​រុស្ស៊ី​រួច​ទៅ​ហើយ​។ ​

ក្រុម​អ្នក​តវ៉ា​បាន​ប្រមូលផ្ដុំ​គ្នា​ជិត​អគារ​រដ្ឋសភា​ក្នុង​រដ្ឋធានី Colombo នៅ​កាលពី​ថ្ងៃ​ពុធ​ដោយ​អំពាវនាវ​ឲ្យ​លោក Rajapaksa លាលែង​ពី​តំណែង។ អតិផរណាបាន​ឡើងដល់​កម្រិត​ខ្ពស់បំផុត ៥៤.៦% នៅក្នុង​ខែកក្កដា​នេះ ខណៈ​ដែល​តម្លៃ​ម្ហូបអាហារ​បាន​កើន​ឡើង​ជិត ​២​ដង​។ ​សំណើ​របស់លោក​ប្រធានាធិបតី​ស្រី​លង្កា​មាន​ឡើង ​បន្ទាប់ពី​លោកនាយក​រដ្ឋមន្ត្រី Ranil Wickremesinghe បាន​និយាយ​ថា ស្រីលង្កាបាន​ក្ស័យ​ធន​កាលពី​ថ្ងៃ​អង្គារ ២​ថ្ងៃ​បន្ទាប់ពី​រដ្ឋមន្ត្រី​ថាមពល​លោក Kanchana Wijesekera និយាយ​ថា ប្រទេស​នេះ​នៅសល់​ប្រេងឥន្ធនៈ​ប្រើប្រាស់​មិន​ដល់​ ១​ថ្ងៃ​ផង​ទេ​។

ទុន​បម្រុង​រូបិយប័ណ្ណ​បរទេស​របស់​ប្រទេស​ស្រីលង្កា​បាន​អស់ បន្ទាប់ពី​ខកខាន​ក្នុង​ការ​សងបំណុល​ជា​លើកដំបូង​កាលពី​ខែ​ឧសភា ដែល​មានន័យថា ​ប្រទេស​នេះ​បាន​ជួប​ការ​លំបាក​ក្នុង​ការ​ទូទាត់​ប្រាក់​ថ្លៃ​នាំចូល​ប្រេងឥន្ធនៈ​។ សារព័ត៌មាន Insider ធ្លាប់​បាន​រាយការណ៍​ពី​ថា ប្រជាជន​ស្រីលង្កា​បាន​តម្រង់​ជួរ​ទិញ​ឧស្ម័ន​អស់​ជាច្រើន​ថ្ងៃ ហើយ​រដ្ឋាភិបាល​បាន​លើកទឹកចិត្ត​ឱ្យ​ធ្វើ​ការ​ពី​ផ្ទះ​ដើម្បី​សន្សំសំចៃ​ប្រេង​៕

អត្ថបទ៖ សុខមាន