ភ្នំពេញ៖ តំបន់ប្រាសាទសំបូរព្រៃគុក បានប្រែពីប្រាសាទកណ្ដោកកណ្ដែងនៅកណ្ដាលព្រៃ មកជាតំបន់ទេសចរណ៍ស្រូបទាញភ្ញៀវទេសចរជាតិ អន្តរជាតិ។

បច្ចុប្បន្នតំបន់រមណីយដ្ឋានប្រាសាទសំបូរព្រៃគុក ក៏កំពុងស្ថិតក្រោមការអភិរក្សដោយ​យកចិត្តទុក​ដាក់ និងក៏បានជួយកែប្រែជីវភាពរស់នៅរបស់​ប្រជាពលរដ្ឋរស់នៅជុំវិញ តាមរយៈការបង្កើត​មុខ​របរនានា ​ពាក់ព័ន្ធនឹងវិស័យទេសចរណ៍។

ជាមោទកភាពសម្រាប់កម្ពុជា ថ្ងៃទី៨កក្កដា ឆ្នាំ ២០២២ ជាគម្រប់ខួប៥ឆ្នាំ ដែលតំបន់រមណីយដ្ឋាន​ប្រាសាទសំបូរព្រៃគុក បានក្លាយជាសម្បត្តិបេតិកភណ្ឌពិភពលោក។ទីតាំងតំបន់ប្រាសាទ​សំបូរព្រៃគុក​នេះ ក៏ជាតំបន់ទេសចរណ៍សំខាន់មួយ សម្រាប់ខេត្តកំពង់ធំ ក៏ដូចជាសម្រាប់កម្ពុជា​ទាំងមូលដែរ។

បច្ចុប្បន្នដោយសារវិស័យទេសចរណ៍ក្នុងតំបន់នេះ ក៏បានកែប្រែជីវភាពរស់នៅ ផ្ដល់នូវមុខរបរដល់​ប្រជាពលរដ្ឋរស់​នៅជុំវិញផងដែរ។ ​នេះជាការបញ្ជាក់របស់លោក ឃ្លាំង ជោ​ មានវ័យ ៧០ឆ្នាំ ដែលបានរស់នៅក្នុងតំបន់នេះ តាំងពីជំនាន់ ឪពុកម្ដាយគាត់មកម្លេះ។

ក្នុងនាមជាចាស់ព្រឹទ្ធាចារ្យមួយរូប​ លោកចងចាំថា ​កាលដើមឡើយប្រជាពលរដ្ឋក្នុងតំបន់នេះ ហាក់ដូចជារស់នៅកណ្ដាលព្រៃ ​ខុសប្លែកពីបច្ចុប្បន្ន។ បច្ចុប្បន្នប្រជាពលរដ្ឋចេះបង្កើតមុខរបរ និង​ទាញយកប្រយោជន៍ពីវិស័យទេសចរណ៍ ​ក្នុងតំបន់ប្រាសាទសំបូរព្រៃគុកនេះ។

វិស័យទេសចរណ៍នៅតំបន់ប្រាសាទសំបូរព្រៃគុកនេះ ​ពិតជាមានសារៈប្រយោជន៍ និងផ្ដល់​នូវ​មុខរបរដល់ប្រជាពលរដ្ឋរស់នៅជុំវិញ។​ នេះជាការលើកឡើងរបស់ លោកស្រី ហួន កឺល មានវ័យជាង៥០ឆ្នាំ ដែលសព្វថ្ងៃ ​ប្រកបរបរជាអ្នកផលិតវត្ថុអនុស្សាវរីយ៍ដោយដៃ ចេញពីធនធានធម្មជាតិ។

ចំពោះប្រជាពលរដ្ឋក្នុងស្រុក ដែលបានមកកំសាន្តនៅក្នុងតំបន់ ប្រាសាទសំបូរព្រៃគុកនេះ ក៏បាន​កោតសរសើរ និងមើលឃើញពីភាពវិវត្តច្រើនក្នុងតំបន់នេះផងដែរ។ ​ពួកគាត់លើកឡើងដែរថា ជាកូនខ្មែរត្រូវសិក្សាស្វែងយល់ឱ្យបានច្បាស់ពីអ្វីដែលជារបស់ខ្មែរ។

រមណីយដ្ឋានប្រាសាទសំបូរព្រៃគុក ​ជាអតីតរាជធានីខ្មែរ ឥសានបុរៈ ដែលមានភាពល្បីរន្ទឺ​នៅ​សតវត្សទី ៧។ ដោយកិច្ចខិតខំប្រឹងប្រែងរបស់​ រាជរដ្ឋាភិបាលកម្ពុជា ​តំបន់ប្រាសាទសំបូរព្រៃគុក បានចុះក្នុងបញ្ជីសម្បត្តិបេតិកភណ្ឌពិភពលោក​ កាលពីថ្ងៃទី០៨ ខែកក្កដា ឆ្នាំ២០១៧ នៅ​ទីក្រុងក្រាកូវ ប្រទេសប៉ូឡូញ៕ អត្ថបទ៖ គឹមហុក