ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា ទោះបីកម្ពុជាបាន ទទួលជោគជ័យខ្ពស់លើការប្រយុទ្ធប្រឆាំងជំងឺកូវីដ-១៩ តែរាជរដ្ឋាភិបាល មិនទាន់ដកថយនោះទេ ហើយក៏ជំរុញប្រជាពលរដ្ឋ ឱ្យបន្តទៅទទួលវ៉ាក់សាំងដូសជំរុញ​ឲ្យបានគ្រប់គ្នា ។

តាមរយៈសំណេរលើបណ្ដាញសង្គមហ្វេសប៊ុក នៅថ្ងៃទី៨ ខែកក្កដា នេះ ខណៈកម្ពុជា ទទួលបាន វ៉ាក់សាំង Pfizer ដែលជាជំនួយរបស់អូស្រ្តាលីជិត ២០ម៉ឺនដូសសម្រាប់កុមារ សម្ដេចតេជោ ហ៊ុន សែន នាយករដ្ឋមន្ត្រី បានបញ្ជាក់ថា កម្ពុជាបន្តស្វះស្វែងរកវ៉ាក់សាំងទុកក្នុងឃ្លាំង ហើយប្រកាស​ជំរុញ​ការចាក់ វ៉ាក់សាំងដូសជំរុញជូនប្រជាពលរដ្ឋ ដើម្បីធានាបាននូវការការពារសុខភាព​ប្រជាពលរដ្ឋ​ពីមេរោគកូវីដ-១៩ ​ដែលមកដល់ពេលនេះទាំងជំនួយ​ និងការបញ្ជាទិញ កម្ពុជារក​បាន​វ៉ាក់សាំង​បង្ការជំងឺកូវីដ១៩​ សរុបជិត ៥៣លានដូស ក្នុងនោះនៅសល់ក្នុងឃ្លាំង​ប្រមាណ​ជា៨លានដូស និងក៏នៅមានវ៉ាក់សាំងសរុបប្រមាណ ​២០លានដូសទៀត ​ដែលជាជំនួយ និងជាការបញ្ជាទិញ មិនទាន់បានដឹកមកប្រទេសកម្ពុជាផងដែរ ។

សម្ដេចតេជោ បានបញ្ជាក់ថា “កម្ពុជាកំពុងទទួលបានជោគជ័យខ្ពស់ លើការប្រយុទ្ធប្រឆាំងការរាត ត្បាតជំងឺកូវីដ-១៩ ​ហើយទោះបីទទួលបានជោគជ័យយ៉ាងណាក្តី តែរាជរដ្ឋាភិបាល នៅតែបន្ត​យក​ចិត្តទុក ដាក់ខ្ពស់ លើការប្រយុទ្ធប្រឆាំង និងទប់ស្កាត់ការរាតត្បាត ដែលការងារអាទិភាពក្នុងការ​ប្រយុទ្ធ​ប្រឆាំងនេះ គឺការបន្តផ្តល់វ៉ាក់សាំងជូនប្រជាពលរដ្ឋ” ។

សម្តេចតេជោ បានបញ្ជាក់បន្ថែមថា ការប្រគល់វ៉ាក់សាំងនៅពេលនេះ ​ជាការបន្ថែមទៅលើជំនួយ វ៉ាក់សាំង Pfizer-BioNtech ចំនួន២,៣៥លានដូស ទូបង្កកត្រជាក់ និងទូបង្កកត្រជាក់បំផុត ​សរុបទាំង អស់ចំនួន១៣៣គ្រឿង និងគ្រឿងបរិក្ខារចាំបាច់ផ្សេងៗទៀត ដែលជាជំនួយទ្វេភាគីរបស់ប្រទេស​អូស្រ្តាលី ហើយជំនួយទាំងនេះ ជាផ្នែកមួយ នៃជំនួយអូស្រ្តាលី ដែលមានថវិកា​ចំនួន ៣៥,៧លាន​ដុល្លារអូស្រ្តាលី ​ដែលជាការប្តេជ្ញាចិត្តគ្រប់ជំហានទាំងអស់ ឆ្ពោះទៅរកយុទ្ធនាការ​ចាក់វ៉ាក់សាំង​ប្រកបដោយសុវត្ថិភាព ប្រ សិទ្ធភាព និងសមភាពនៅកម្ពុជា ។

គិតត្រឹមថ្ងៃទី៦ ខែកក្កដា នេះ កម្ពុជា បានចាក់វ៉ាក់សាំងជូនពលរដ្ឋ ជាង៩៤ភាគរយ នៃ​ចំនួន​ប្រជា​ពលរដ្ឋសរុប។ ក្នុងនោះ ចាក់ជូនកុមារអាយុចាប់ពី៣ឆ្នាំដល់ក្រោម៥ឆ្នាំ ​បានជាង ៧០ភាគរយ កុមារ អាយុ៥ឆ្នាំ បានជាង១៣៥ភាគរយ, កុមារអាយុពី៦ឆ្នាំ ទៅ១២ឆ្នាំ ​បានជាង១០៩ភាគរយ, កុមារ និងយុវ វ័យ អាយុ១២ឆ្នាំ ដល់១៨ឆ្នាំ ​បានជាង១០០ភាគរយ និងអាយុ១៨ឆ្នាំឡើង បានជាង ១០៣ភាគរយ។ ក្រៅ តែពីដូសមូលដ្ឋាន ពេលនេះកម្ពុជា បានឈានដល់ចាក់ដូសជំរុញទី ៥ផងដែរ។ ក្នុងនោះដូសជំរុញទី៣ ចាក់បានជាង១០លាននាក់, ដូសជំរុញទី៤ ចាក់បានជិត ៣លាននាក់, ដូសជំរុញទី៥ បានជាង៣៤ម៉ឺន នាក់ ៕

អត្ថបទ៖ បាន សុខរិទ្ធិ