ភ្នំពេញ៖ រហូតមកដល់ថ្ងៃនេះ បងប្អូនប្រជាពលរដ្ឋខ្មែរ ដែលកំពុងរស់នៅសហរដ្ឋអាមេរិក បាននាំគ្នាចូលរួមថវិកាជាបន្តបន្ទាប់ជាមួយរាជរដ្ឋាភិបាលកម្ពុជាបន្ថែមទៀត ដើម្បីបោសសំអាតគ្រាប់មីន និងគ្រាប់មិនទាន់ផ្ទុះ ដោយរហូតមកដល់ពេលនេះ គឺមានទឹកប្រាក់ជិតពីរពាន់ដុល្លារអាមេរិក។

ការចូលរួមជាមួយរាជរដ្ឋាភិបាលកម្ពុជាក្នុងការបោសសំអាតគ្រាប់មីននេះ គឺបានធ្វើឡើងបន្ទាប់​ពី​សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា កាលពីថ្ងៃទី១ ខែកក្កដា ឆ្នាំ២០២២កន្លងទៅនេះ ​ក្នុងពិធីលែងកូនត្រីនៅខេត្តបន្ទាយមានជ័យ បានអំពាវនាវឱ្យ​សប្បុរសជន​ចូលរួមបំបាត់ចោលគ្រាប់មីន ​និងគ្រាប់មិនទាន់ផ្ទុះ ដើម្បីកម្ពុជាឈានទៅគ្មានគ្រាប់មីន​នៅឆ្នាំ២០២៥។

បន្ទាប់ពីមានការអំពាវនាវរបស់ប្រមុខរាជរដ្ឋភិបាលនេះ មានសប្បុរសជនទាំងក្នុងស្រុក និង ក្រៅ​ស្រុក​ជាច្រើន​បាននាំគ្នាប្រកាសចូលរួមជាបន្តបន្ទាប់។​ ជាក់ស្តែងរហូតដល់ពេលនេះ ​គឺមានជាង ១០លានដុល្លារអាមេរិកហើយ ​ដោយការចូលរួមពីសប្បុរសជន បងប្អូនប្រជាពលរដ្ឋទាំងក្នុង និង​ក្រៅប្រទេសនេះ គឺប្រកបដោយភាពស្នាម​ញញឹម​ ដើម្បីធ្វើយ៉ាងណាឲ្យប្រទេសកម្ពុជា ជាប្រទេស​ដែលគ្មានគ្រាប់មីន ​ក្នុងពេលឆាប់រហ័សនោះ។

ក្រោយពីមានការចូលរួមពីយ៉ាង​ផុលផុស​របស់​សប្បុរសជនខ្មែរ ទាំងក្នុងស្រុក ​និងក្រៅស្រុកនោះ សម្តេចតេជោ ហ៊ុន សែន បានផ្ញើសារតាមបណ្តាញ​សង្គម​ហ្វេសបុក ថ្លែងអំណរគុណដល់​សប្បុរសជន ​ដែលចូលរួមបរិច្ចាគថវិកាជូនរាជរដ្ឋាភិបាល ​ដើម្បីបំបាត់គ្រាប់មីន និងគ្រាប់មិនទាន់​ផ្ទុះក្នុងប្រទេស ខណៈពេលនេះ រាជរដ្ឋាភិបាលបានទទួលពីសប្បុរសជនជាង ១០លាន​ដុល្លារហើយនោះ៕ អត្ថបទ៖ បាន ចក់