ភ្នំពេញ៖ ឯកឧត្តម ហ៊ុន ម៉ានី ប្រធានគណៈកម្មការទី០៧ នៃរដ្ឋសភា និងជាប្រធានសហភាព​សហព័ន្ធ​យុវជនកម្ពុជា ​បានមានប្រសាសន៍ថា "សន្តិភាពរកបានមកដោយលំបាក តែងាយនឹងបាត់បង់"។

ក្នុងពិធីបិទមហាសន្និបាតលើកទី០១ ស្ដីពីលទ្ធផលការងារឆ្នាំ២០២១ ផ្សព្វផ្សាយទិសដៅការងារ និងផែនការសកម្មភាពឆ្នាំ២០២២-២០២៣​ របស់វេទិកាសន្តិភាពកម្ពុជា ​កាលពីថ្ងៃទី០៧ ខែកក្កដា​ម្សិលមិញ នៅក្នុងខេត្តសៀមរាប ឯកឧត្តម ហ៊ុន ម៉ានី មានប្រសាសន៍ថា ​សន្តិភាព គឺជាមូលដ្ឋានគ្រឹះ ដែលបានប្រែក្លាយប្រទេស​ដែល​ធ្លាប់តែរង​ទុក្ខវេទនា ​បែកបាក់គ្នា ​ឈានមកមានការឯកភាពគ្នា និង​មានសុខដុមរមនីយកម្ម គ្នាក្នុងភាពជាគ្រួសារខ្មែរតែមួយ។

ឯកឧត្តម បានបញ្ជាក់ថា គំនិតរួម ទស្សនៈជាតិរួម និងមធ្យោបាយរួម ត្រូវបានធ្វើឱ្យមាន ដើម្បីដើរ ស្របគ្នាឆ្ពោះទៅការរីកចម្រើនប្រទេសជាតិជាបន្តទៀត។

ឯកឧត្តម បានបញ្ជាក់បន្ថែមថា “កម្ពុជា បានប្រែមុខប្រែមាត់ជាបន្តបន្ទាប់លើឆាកអន្តរជាតិ ព្រោះ កម្ពុជា ​ដែលគេធ្លាប់ស្គាល់ថាជាប្រទេសដែលស្ថិតក្នុងភ្លើងសង្គ្រាម​ ក្លាយជាប្រទេស ដែលមាន​សុខសន្តិភាពពេញលេញ និងជាប្រទេសដែលមានកិត្តិយស ដើម្បីចូលរួមដោះស្រាយ​បញ្ហា​អន្តរជាតិ ស្មើមុខ ស្មើមាត់ដូចគ្នា។

អង្គការវេទិកាសន្តិភាពកម្ពុជា ត្រូវបានបង្កើតឡើង ​និងប្រកាសជាផ្លូវការ នៅថ្ងៃទី២៣ ខែកុម្ភៈ ឆ្នាំ២០២១ ​ដោយក្រសួងមហាផ្ទៃក្នុង​គោលបំណង ​ចូលរួមជាមួយរាជរដ្ឋាភិបាល ដើម្បីផ្សព្វផ្សាយ​ដល់សិស្ស និស្សិត និងប្រជាពលរដ្ឋឱ្យយល់កាន់តែច្បាស់​ពីគុណតម្លៃ ​និងគុណប្រយោជន៍នានា ដែលទទួលបានមកពីសន្តិភាព៕អត្ថបទ៖ ឈិត សាវី