​​ចក្រភព​អង់គ្លេស​៖ រដ្ឋមន្ត្រីការបរទេស​របស់​ចក្រភព​អង់គ្លេស​លោកស្រី Liz Truss បាន​ចាក​ចេញពី​សណ្ឋាគារ​មួយ​នៅ​រមណីយដ្ឋាន​កោះ​បាលី​ប្រទេស​ឥណ្ឌូនេស៊ី​នៅ​ថ្ងៃ​សុក្រ​នេះ ដើម្បី​ត្រឡប់​មក​ទីក្រុង​ឡុង​ដ៍​ចក្រភព​អង់គ្លេស​វិញ ដើម្បី​ដោះស្រាយ​ស្ថានភាព​ច្របូកច្របល់ ​នៃ​​ការលាលែង​ពី​តំណែង​របស់​នាយក​រដ្ឋមន្ត្រី​លោក Boris Johnson។​

​លោកស្រីត្រូវបាន​គេ​ឃើញ​ឡើង​ជិះ​លើ​រថយន្ត​របស់​ស្ថានទូត​អង់គ្លេស មុនពេល​រថយន្ត​ចូល​ទៅ​ក្នុង​ក្បួន​រថយន្ត​ដែល​អមដោយ​រថយន្ត​នគរបាល​។ មានការ​រំពឹងទុក​ថា ស្ត្រី​វ័យ 46ឆ្នាំ​រូបនេះ​អាច​នឹង​ចាប់ផ្តើម​បំណង​សម្រាប់​ការដឹកនាំ​របស់​គណបក្ស​អភិរក្ស​របស់លោក​ស្រី ​បន្ទាប់ពី​ការលាលែង​ពី​តំណែង​របស់លោក Johnson កាលពី​ថ្ងៃ​ព្រហស្បតិ៍​។ ​លោកស្រី Liz Truss បាន​ចូលកាន់​តំណែង​ជា​រដ្ឋមន្ត្រីការបរទេស​កាលពី​ខែកញ្ញា បន្ទាប់ពី​កាន់តំណែង​ជា​រដ្ឋមន្ត្រីក្រសួងពាណិជ្ជកម្ម​។ លោកស្រីទទួលបាន​ការគាំទ្រ​កាន់តែច្រើន ​នៅក្នុង​ចំណោម​គណបក្ស​អភិរក្សនិយម​របស់លោក​ស្រី​ចាប់តាំងពី​ពេល​នោះមក ​ហើយក៏​គ្មានអ្វី​ជា​អាថ៌កំបាំង​នូវ​មហិច្ឆតា​របស់លោក​ស្រី​ឡើយ​។ លោកស្រី Truss មាន​ប្រជាប្រិយ​ភាពជា​មួយក្រុម​អ្នក​អភិរក្សនិយម​ជាច្រើន ដែល​មើលឃើញ​លំ​អាន​របស់​លោកស្រី Margaret Thatcher ជា​នាយករដ្ឋមន្ត្រី​ស្ត្រី​ដំបូង​ដែល​ស្រឡាញ់​ទីផ្សារសេរី របស់​គណបក្ស​នៅក្នុង​ក្រុម​អ្នកនយោបាយ។​

ការប្រកួតប្រជែង​មេដឹកនាំ​គណបក្ស​អភិរក្សនិយម​ ត្រូវបាន​គេ​រំពឹងថា​នឹង​ប្រព្រឹត្តទៅ​នៅ​ប៉ុន្មាន​សប្តាហ៍​ខាងមុខនេះ​។ ការប្រកួតប្រជែង​ដើម្បី​ជំនួស​លោក Boris Johnson បានចាប់ផ្តើម បន្ទាប់ពី​នាយក​រដ្ឋមន្ត្រីបាន​លាលែង​ពី​តំណែងជា​មេដឹកនាំ​គណបក្ស ​Tory ក្រោយ​មាន​ភាពច្របូកច្របល់​ប៉ុន្មាន​ថ្ងៃ​ថ្មី​មកនេះ ដែល​មើ​ឃើញថា​អំណាច​របស់លោក​បាន​ដួលរលំ​។ លោក Johnson មាន​ផែន​ការបន្ត​នៅ​ជា​នាយករដ្ឋមន្ត្រី ​រហូត​ដល់​អ្នក​បន្ត​តំណែង​ថ្មីត្រូវបាន​ជ្រើសរើស​នៅក្នុងពេល​ប៉ុន្មាន​ខែ​ខាងមុខនេះ​។​ ​ទោះជា​យ៉ាងណា​សហការី​ជាច្រើន និង​អ្នកនយោបាយ​ប្រឆាំងមានបំណង​ឲ្យ​លោក​ចាកចេញ​នៅពេលនេះ​៕

អត្ថបទ៖ ប៊ុនថន