​អឺរ៉ុប៖ ប្រធាន​បណ្ដាញ​អយស្ម័យយាន​អាល្លឺម៉ង់​បាន​ប្រកាស​កាលពី​ថ្ងៃ​សុក្រ​ថា ប្រធាន​ក្រុមហ៊ុនអយស្ម័យយាន​អឺរ៉ុប​ចំនួន​ ៣០​ក្រុមហ៊ុន​បាន​ព្រមព្រៀង​ជួយ​សាងសង់​ផ្លូវ​រថភ្លើង​របស់​ប្រទេស​អ៊ុយ​ក្រែ​ន​ឡើងវិញ​ ដោយមាន​ការគាំទ្រ​ផ្នែក​បច្ចេកទេស និង​ការដឹកជញ្ជូន​។

ថ្លែង​នៅក្នុង​កិច្ចប្រជុំ​ស្តីពី​អយស្ម័យយាន​អឺរ៉ុប​នៅ​ទីក្រុង​វី​យែ​ន​ប្រទេស​អូទ្រីស នាយក​ប្រតិបត្តិ​ក្រុមហ៊ុន Deutsche Bahn លោក Richard Lutz បាន​និយាយថា​ ប្រព័ន្ធ​ផ្លូវ​រថភ្លើង​ដែល​ធ្វើ​ប្រតិបត្តិការ​គឺជា​គន្លឹះ​សំខាន់​ សម្រាប់​ការ​សាង​សង់​ឡើងវិញ​របស់​អ៊ុយ​ក្រែ​ន​ក្នុង​ពេល​មានការ​វាយលុក​របស់​រុស្ស៊ី​។​ លោក Richard Lutz និយាយថា យើង​សន្យា​ផ្តល់​ឧបករណ៍​បច្ចេកទេស​ផ្លូវ​រថភ្លើង និង​គ្រឿងបន្លាស់បន្ទាន់​នៅ​គ្រប់​ទីកន្លែង​ដែល​ត្រូវការ ​និង​ដើម្បី​គាំទ្រ​ដល់​ Ukrainian Railways ជា​ក្រុមហ៊ុន​ផ្លូវ​រថភ្លើង​រដ្ឋ ក្នុង​កិច្ចប្រឹងប្រែង​រាល់ថ្ងៃ​របស់​ពួកគេ​ក្នុងការ​ជួយសង្គ្រោះ​ជីវិត​មនុស្ស​។ យោងតាម​សេចក្តីប្រកាស​របស់​ប្រទេស​អ៊ុយ​ក្រែ​ន ​ដែល​មិនទាន់បាន​ចុះហត្ថលេខា​ជាមួយ​ក្រុមហ៊ុន​អយស្ម័យយាន​អឺរ៉ុប ប្រទេស​អ៊ុយ​ក្រែ​ន​នឹង​ផ្លាស់ប្តូរ​បណ្តាញ​ផ្លូវ​រថភ្លើង​របស់ខ្លួន ​ទៅរក​ស្តង់ដារ​សហភាព​អឺរ៉ុប​។​ ​លោក Lutz បាន​និយាយថា​ ការធ្វើសមាហរណកម្មរ​បស់​ប្រទេស​អ៊ុយ​ក្រែ​ន​ទៅក្នុង​បណ្តាញ​ផ្លូវ​រថភ្លើង​អឺរ៉ុប គួរតែ​ត្រូវបាន​ជួយ​ដោយ​ស្ថាប័ន​អឺរ៉ុបដោយ​អំពាវនាវ​ឱ្យមាន​បណ្តាញ​ផ្លូវ​រថភ្លើង​ឆ្លង​អឺរ៉ុប ​ឆ្លងកាត់​ដែល​ត​ភ្ជាប់​បណ្តាញ​ផ្លូវ​រថភ្លើង​សហភាព​អឺរ៉ុប​ជាមួយ​ប្រទេស​អ៊ុយ​ក្រែ​ន ​និង​ម៉ុ​ល​ដូ​វ៉ា​៕

អត្ថបទ៖ ប៊ុនថន