ភ្នំពេញ៖ នៅតាមបណ្តាក្រសួងស្ថាប័ននានា ក្រុមហ៊ុន សាលារៀន និងតាមគេហដ្ឋានបងប្អូនប្រជាពលរដ្ឋមួយចំនួនទៀតនៅថ្ងៃទី១០ ខែកក្កដា ឆ្នាំ២០២២នេះក្នុងរាជធានីភ្នំពេញ ត្រូវបានគេមើលឃើញបង្ហូតទង់ជាតិពាក់កណ្តាលដង ដើម្បីគោរពវិញ្ញាណក្ខន្ធ ឯកឧត្តម ហ្ស៊ីនហ្សូអាបេ អតីតនាយករដ្ឋមន្រ្តីជប៉ុន ដែលបានទទួលមរណភាព កាលពីថ្ងៃទី៨ កន្លងទៅដោយសារជនទុច្ចរិតបានបាញ់ប្រហារយ៉ាងព្រៃផ្សៃ ខណៈដែលឯកឧត្តមកំពុងតែថ្លែងសុន្ទរកថា ក្នុងការឃោសនាមួយនៅទីក្រុងណារ៉ាប្រទេសជប៉ុន។​

 ការបង្ហូតទង់ជាតិពាក់កណ្តាលដងនេះ បានធ្វើឡើងស្របទៅតាមការប្រកាសរបស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងគណៈកម្មាធិការជាតិរៀបចំបុណ្យជាតិ-អន្តរជាតិ ដោយសម្រេចយកថ្ងៃអាទិត្យទី១០ ខែកក្កដា ឆ្នាំ២០២២នេះ គោរពវិញ្ញាណក្ខន្ធឯកឧត្តម ហ្ស៊ីនហ្សូអាបេ ​អតីតនាយករដ្ឋមន្រ្តីជប៉ុន ដែលបានទទួលមរណភាពក្នុងវ័យ៦៧ឆ្នាំ។

សម្តេចតេជោ ហ៊ុន សែន នាយករដ្ឋមន្រ្តីបានថ្លែងថាមរណភាពរបស់ឯកឧត្តម អាបេ ស៊ិនហ្សូ មិនត្រឹមតែជាការបាត់ប្រកបដោយភាពសោកស្តាយ តក់ស្លុត រន្ធត់ និងអាឡោះអាល័យសម្រាប់តែប្រជាពលរដ្ឋជប៉ុនប៉ុណ្ណោះ តែសម្រាប់ប្រជាពលរដ្ឋនៅលើពិភពលោក រួមទាំងប្រជាពលរដ្ឋកម្ពុជាផងដែរ។

សម្តេចតេជោ ហ៊ុន សែន បានលើកឡើងទៀតថា ក្នុងអំឡុងពេលដែលឯកឧត្តម ហ្ស៊ីនហ្សូអាបេ ​ធ្វើជានាយករដ្ឋមន្រ្តីប្រទេសជប៉ុនបានប្រឹងប្រែងយ៉ាងខ្លាំងដល់ការជំរុញទំនាក់ទំនងរវាងជប៉ុន និងកម្ពុជា រហូតក្លាយទៅជាដៃគូយុទ្ធសាស្ត្រនៅឆ្នាំ២០១៣។ បន្ថែមពីលើនោះ ឯកឧត្តម អាបេ ក៏បានជំរុញនូវការផ្តល់ជំនួយគាំទ្រដល់ការអភិវឌ្ឍគ្រប់វិស័យនៅកម្ពុជា រួមទាំងហេដ្ឋារចនាសម្ព័ន្ធផងដែរ។

ក្រោយឮដំណឹងថា ឯកឧត្តម ស៊ីនស្សូ អាបេ អតីតនាយករដ្ឋមន្រ្តីជប៉ុន បានទទួលមរណភាព ភ្លាមៗបណ្តាថ្នាក់ដឹកនាំប្រទេសនៅលើពិភពលោករួមទាំងអ្នកនយោបាយ មន្រ្តីរាជកា ប្រជាជនកម្ពុជាបានបង្ហោះសារចូលរួមរំលែកមរណទុក្ខ និងតក់ស្លុតបំផុតចំពោះការបាត់បង់ជីវិតរបស់ឯកឧត្តម អាបេនេះ៕​ អត្ថបទ៖ បាន ចក់​