មណ្ឌលគិរី៖លោក នួន សារ៉ន អភិបាលស្រុកកែវសីមា បានប្រាប់អ្នកយកព័ត៌មានថា ក្រោយទទួលព័ត៌មាននេះ លោកបានដឹកនាំក្រុមការងារស្រុកចុះពិនិត្យ ឃើញថា ទឹកអូរបានជន់ឡើងខ្លាំងបណ្តាលឲ្យបាក់ដីមាត់ច្រាំងខាងកម្ពុជាយើង ហើយជិតដល់បង្គោលព្រំដែនដែលបានបោះរួច។

លោកអភិបាលស្រុកបន្តថា បច្ចុប្បន្នលោកបានរាយការណ៍​ជូនដល់អាជ្ញាធរខេត្ត​ក្នុងករណីនេះ​រួចរាល់ហើយ។ លោកបានចាត់ក្រុមការងារដើម្បីយកខ្សែទាក់ចងបង្គោលកុំឲ្យធ្លាក់ចូលទឹកអូរ។ប៉ុន្តែរហូតដល់ពេលនេះ ក្រុមការងារមិនទាន់អាចចូលទៅតំបន់នោះបានទេ ព្រោះមេឃ​នៅធ្លាក់ភ្លៀងខ្លាំង ម៉្យាងទីតាំងនោះ ស្ថិតនៅចំណោតភ្នំខ្ពស់ៗ ព្រៃ គ្មានផ្លូវចូលដល់ទេ។

សូមបញ្ជាក់ថា អភិបាលស្រុកកែវសីមា បានដឹកនាំកងកម្លាំងកាពារព្រំដែនចុះពិនិត្យភ្លាមៗ​ចំណុច​បង្គោលលេខ ៦០/៣៨(១)ចំណុច UTM72079,1340735ស្ថិតលើព្រំដែនគោកអូរហ៊ុច ព្រំប្រទល់​ប្រទេសកម្ពុជា-វៀតណាម។

ក្រោយចុះទៅដល់ពិនិត្យឃើញថា បង្គោលលេខ៦០នេះ​ កំពុងរងផលប៉ះពាល់ខ្លាំង ដោយ​ជំនន់​ទឹកភ្លៀងធ្វើឲ្យបាក់ដីហូរច្រោះខ្វះតែ ០,៤០ម៉ែត្រទៀត និងដល់បង្គោលហើយ៕