ភ្នំពេញ៖ ក្នុងពេល​អញ្ជើញធ្វើជាអធិបតីភាព​ក្នុងពិធីបើក​កិច្ចប្រជុំក្រុមប្រឹក្សា​សហព័ន្ធកីឡា​អាស៊ាន​ប៉ារ៉ាហ្គេម និងក្រុមប្រឹក្សាសហព័ន្ធកីឡាអាស៊ីអាគ្នេយ៍នៅសណ្ឋាគារសុខា​ នាព្រឹកថ្ងៃចន្ទ ទី១១ ខែកក្កដា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បាន​ឆ្លៀតចូល​សួរសុខ​ទុក្ខជន​ពិការមួយក្រុម ​ដែលប្រកបរបរម៉ាស្សានៅក្បែរសណ្ឋាគារ។

សូមជំរាបជូនថា ហាងម៉ាស្សានេះមានឈ្មោះថា «សំណាង ខេមបូឌា» គឺជាកន្លែងម៉ាស្សាផ្តល់​សេវា​ដោយជនពិការភ្នែក។ ការអញ្ជើញចូលសួរសុខទុក្ខជនពិការ​នៅក្នុងហាងម៉ាស្សានេះ មិនមាន​បាន​រៀបចំ​ទុកជាមុននោះឡើយ ​ពោលជាការអញ្ជើញ​ចូលសួរសុខទុក្ខដោយមិនបានព្រៀងទុក។

ក្រៅតែពីការសាកសួរសុខទុក្ខ ​និងព័ត៌មានពាក់ព័ន្ធនឹងការប្រកបរបរហើយនោះ​ សម្តេចតេជោ ហ៊ុន សែន​ ក៏បាន​ឧបត្ថម្ភ​ថវិកាមួយចំនួនជូនដល់បងប្អូន​ជនពិការបម្រើការងារនៅទីតាំងនោះផងដែរ។

សម្តេចតេជោ ​តែងតែយកចិត្តទុកដាក់ខ្ពស់​បំផុតដល់ការរស់នៅរបស់បងប្អូនជនពិការ។ ការយកចិត្តទុកដាក់នេះ ​ដោយសារតែសម្តេចយល់ពីទុក្ខលំបាករបស់ជនពិការ ក្នុងនាមសម្តេចជា​ជន​ពិការភ្នែកផងដែរ។ ការយកចិត្តទុកដាក់លើជនពិការ ជាស្មារតីនៃការទទួលខុសត្រូវក្នុងនាម​ជា​ប្រមុខដឹកនាំកម្ពុជា ​ដើម្បីជំរុញ​សមត្ថភាព ​និងលទ្ធភាព​ដល់ជនពិការ ​ខណៈដែលពួក​គេមិនមាន​កាយ​សម្បទា​គ្រប់គ្រាន់ ​ដើម្បី​បង្កភាព​ងាយស្រួលក្នុងការរស់នៅ ​ឬប្រកប​របរ​ចិញ្ចឹម​ជីវិតដូចអ្នក​មាន​កាយ​សម្បទាគ្រប់គ្រាន់នោះ។

នេះជាការស្តែងឱ្យឃើញកាន់​តែ​ច្បាស់​ថែមទៀតថា សម្តេចតេជោ គឺជាប្រមុខរាជរដ្ឋាភិបាល​មួយរូប​ ដែលបានយកចិត្តទុកដាក់ខ្ពស់បំផុត​ចំពោះជនពិការ​និងធ្វើឱ្យសិទ្ធិរបស់ជន​ពិកា​ត្រូវ​បាន​លើក​កំពស់នៅក្នុងសង្គម៕