ភ្នំពេញ៖ ផលិតផលកសិកម្មកម្ពុជា មានគុណភាពល្អៗ​ជាច្រើនមានសក្តានុពល​សម្រាប់ធ្វើការ​នាំចេញ​ទៅកាន់ទីផ្សារអន្តរជាតិ រួមទាំងទីផ្សារជប៉ុនផងដែរ​ ឧទាហរណ៍មានអង្ករ ចេក ស្វាយចន្ទី និងម្រេច ខណៈកម្ពុជា និងជប៉ុន នឹងសិក្សាលើលក្ខណនាំចេញផ្លែស្វាយ​ទៅកាន់​ទីផ្សារ​ប្រទេសជប៉ុន។

ឯកឧត្តម MIKAMI Masahiro ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសជប៉ុន​ប្រចាំ​ព្រះរាជា​ណាចក្រកម្ពុជា ​លើកឡើងបែបនេះ ​ក្នុងជំនួបជាមួយឯកឧត្តម វេង សាខុន រដ្ឋមន្រ្តី​ក្រសួង​កសិកម្ម រុក្ខាប្រមាញ់ និងនេសាទ ​កាលពីសប្តាហ៍កន្លងទៅ។

ក្នុងជំនួបនេះ ឯកអគ្គរដ្ឋទូតជប៉ុន មានប្រសាសន៍ថា ស័យកសិកម្មកម្ពុជាបានដើរតួនាទីយ៉ាងសំខាន់​ក្នុងការជួយជំរុញកំណើនសេដ្ឋកិច្ច ​បង្កើតការងារនៅមូលដ្ឋាន និងបង្កើតប្រាក់ចំណូលទាំង​ក្នុង​ពេលបច្ចុប្បន្ន​ និងអនាគត។

ការកសាងហេដ្ឋរចនាសម្ព័ន្ធគាំទ្រ ការលើកកម្ពស់សមត្ថភាព​កែច្នៃ ​ការជួយបណ្តុះបណ្តាល និង​ផ្សព្វផ្សាយបច្ចេកទេសគឺជាអាទិភាពចំបងសម្រាប់អង្គការ JICA យកទៅពិនិត្យ ពិចារណា​តាម​សំណើរ​រ​បស់ក្រសួងកសិកម្ម ​ហើយទាំងអស់នេះ គឺស្ថិតក្នុងរបៀបវារៈ​នៃជំនួបពិភាក្សារបស់​ឯកឧត្តមអនុរដ្ឋមន្រ្តីកសិកម្មជប៉ុន ជាមួយឯករដ្ឋមន្រ្តីក្រសួងកសិកម្ម ​រុក្ខាប្រមាញ់ និងនេសាទកម្ពុជានាពេលខាងមុខ។

ជាការឆ្លើយតប ឯកឧត្តមរដ្ឋមន្ត្រី បានថ្លែងអំណរគុណយ៉ាងជ្រាលជ្រៅជូនចំពោះរដ្ឋាភិបាល និង​ប្រជាជនជប៉ុន ដែលបាននិងកំពុងជួយឧបត្ថម្ភគាំទ្រ​ដល់ការកសាង ​និងអភិវឌ្ឍន៍​ នៅកម្ពុជា ជា​ពិសេសវិស័យកសិកម្មតាមរយៈអង្គការ JICA។

គម្រោងកម្មវិធីទាំងនោះ បាននិងកំពុង ចូលរួមចំណែកយ៉ាងសំខាន់ក្នុងការ​អភិវឌ្ឍវិស័យកសិកម្ម​កម្ពុជា​ឲ្យមានការរីកចម្រើន​ ធានាសន្តិសុខស្បៀង​ បង្កើនប្រាក់ចំណូល​ កែប្រែកម្រិតជីវ ភាព និង​បង្កើន​ប​រិមាណផលិតប្រកបដោយនិរន្តរភាព ​ធានាគុណភាព ​សុវត្ថិភាព​ តាមរយៈការ អនុវត្ត​បច្ចេកវិទ្យាសមស្រប​ ទំនើបទាន់សម័យ ​ធននឹងការប្រែប្រួលអាកាសធាតុ ​បរិយាប័ន្ន ​និងនវានុវត្តន៍ ឈានទៅសម្រេចឲ្យបាននូវចក្ខុវិស័យរបស់រាជរដ្ឋាភិបាលក្នុង​ការនាំចេញ​កសិផលទៅ​កាន់​ទីផ្សារ​អន្តរជាតិ។

ឯកឧត្តម បានជម្រាបជូនឯកឧត្តមរដ្ឋមន្រ្តីថា នៅថ្ងៃទី១៩ ខាងមុខនេះ ឯកឧត្តមអនុរដ្ឋមន្រ្តី​ក្រសួង​កសិកម្ម រុក្ខាប្រមាញ់ និងនេសាទ ​ជប៉ុននឹងមកបំពេញទស្សនកិច្ចនៅកម្ពុជា ហើយនៅពេលនោះ​ជាឱកាស​ដែលក្រសួងកសិកម្ម រុក្ខាប្រមាញ់ និងនេសាទ នៃប្រទេសយើងទាំងពីរ មានឱ​កាស​ធ្វើការ​ពិភាក្សា ផ្លាស់ប្តូរបទពិសោធន៍ ​និងលើកជាសំណើជួយគាំទ្រលើការងារបច្ចេកទេសសំខាន់ ហើយ​សំណើរ​ពិនិត្យលើ ​លក្ខខណ្ឌ​នៃ​ការនាំចេញកសិផល​ទៅកាន់​ទីផ្សារជប៉ុន ដូចជា​ផ្លែស្វាយ​ក៏អាច​លើក​យកមកពិភាក្សា ​នាឱកាសនោះផងដែរ៕ អត្ថបទ៖ វណ្ណៈ