ភ្នំពេញ៖ ពលរដ្ឋបានបង្ហាញការប្តេជ្ញាចិត្តការរួមគ្នាបន្តចាក់វ៉ាក់សាំងកូវីដ១៩ ដូសជំរុញជាបន្តទៀត និង​បន្តអនុវត្តវិធានសុខាភិបាល ខណកម្ពុជាឈរនៅលើកំពូលតារាង នៃសន្ទស្សន៍ស្តីពីការ​ងើប​ឡើងវិញ​ពីវិបត្តិជំងឺកូវីដ-១៩របស់ Asia Nikkei​ ដែលបានចេញផ្សាយកាលពីពេលថ្មីៗនេះ។

ទោះបីជាក្នុងរយៈពេលជាង១សប្តាហ៍នេះ កម្ពុជា បានរកឃើញករណីកើតជំងឺកូវីដ១៩រង្វង់ ១០នាក់​នេះក៏ដោយពលរដ្ឋ ​លើកឡើងថា​ រាជរដ្ឋាភិបាលកម្ពុជា ​មានសមត្ថភាពគ្រប់គ្រងការរលក​នៃការ​ឆ្លងថ្មី​នេះបាន។ ពលរដ្ឋ អះអាង ពួកគាត់មិនភ័យខ្លាចខ្លាំងដូចកាលពីឆ្នាំ២០២១ កន្លងទៅនោះទេ ។

បើតាមឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានថ្លែងថា ការសិក្សាស្រាវជ្រាវ រកឃើញថា កម្ពុជា ​ស្ថិតក្នុងលំដាប់ថ្នាក់ទី១ លើពិភពលោកពីការងើបឡើងវិញ​ពីវិបត្តិកូវីដ១៩នេះ ​ដែលចេញផ្សាយដោយAsia Nikkei ​ក៏ជាចំណែកមួយដ៏ល្អ ក្នុងការផ្សព្វផ្សាយ​កម្ពុជា​ជាប្រទេសគោលដៅទេសចរណ៍មាន​សុវត្ថិភាព​ និងលំហូរទេសចរអន្តរជាតិមកទស្សនាកម្ពុជា ហើយការផ្សព្វផ្សាយនេះ ​បានធ្វើឡើងចំពេលរាជរដ្ឋាភិបាលកម្ពុជា​បាន​កែសំរួល​លក្ខខណ្ឌ​មិន​តម្រូវធ្វើចត្តាឡីស័ក ចំពោះអ្នកដំណើរអន្តរជាតិមិនទាន់បានចាក់វ៉ាក់សាំងកូវីដ១៩ ប្រសិនបើ​អ្នក​ដំណើរមិនទាន់ចាក់វ៉ាក់សាំងនោះធ្វើតេស្តរហ័សអវិជ្ជមានកូវីដ១៩។

បើតាមលោកជំទាវ ឱ វណ្ណឌីន រដ្ឋលេខាធិការ ​និងជាអ្នកនាំពាក្យក្រសួងសុខាភិបាល សូមសំដែង​ការ​អបអរសាទរ​ទៅនឹងចំណាត់ថ្នាក់នេះ ​ ដែលបង្ហាញពីសមត្ថភាពដឹកនាំរបស់សម្តេចតេជោ ហ៊ុន​ សែន នាយករដ្ឋមន្រ្តី​ លើការប្រយុទ្ធប្រឆាំងនឹងជំងឺកូវីដ-១៩។

ដោយសារការបម្លែងខ្លួនថ្មីៗនៃវីរុសកូវីដ-១៩ ​ជាពិសេសពពួកអូមីក្រុង លើសកលលោក និង​នៅប្រទេសជិតខាងកម្ពុជា​ លោកជំទាវ អំពាវនាវបងប្អូនបន្តនាំគ្នាចាក់​វ៉ាក់សាំង​ដូសជំរុញ​ដែល​រយៈពេលគន្លាតគ្នាចាប់ពី៣ខែឡើងទៅ​ និងបន្តរក្សា៣កុំ៣ការពារ ដើម្បីទប់ស្កាត់ការផ្ទុះឡើងវិញ​នៃជំងឺកូវីដ១៩នៅក្នុងសហគម៕ អត្ថបទ ស៊ុម សុខជា