ភ្នំពេញ៖ គិតចាប់ពីថ្ងៃទី៦ ដល់ថ្ងៃទី១០ ខែកក្កដានេះ កុមារអាយុពី៣ឆ្នាំដល់ក្រោម១២ឆ្នាំ រស់នៅភ្នំពេញចំនួនជាង ១ពាន់នាក់ បានចាក់វ៉ាក់សាំងបង្ការជំងឺកូវីដ-១៩ ដូសជំរុញទី៣ និងទី៤រួចរាល់ ខណៈការចាក់ វ៉ាក់សាំង នៅបន្តដំណើរការជារៀងរាល់ថ្ងៃ។

របាយការណ៍របស់គណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩​ ក្នុងក្របខណ្ឌទូទាំង ប្រទេស ដែលBTVទទួលបាននៅថ្ងៃទី១១ ខែកក្កដានេះ បានបង្ហាញថា​ រយៈពេល៤ថ្ងៃ កុមាររស់​នៅរាជធានីភ្នំពេញ អាយុពី៣ឆ្នាំ ដល់ក្រោម៦ឆ្នាំ ទទួលបានការចាក់វ៉ាក់សាំងដូសជំរុញទី៣ មានចំនួន១៧១នាក់ និងកុមារអាយុពី៦ឆ្នាំដល់ក្រោម១២ឆ្នាំ ចាក់វ៉ាក់សាំងដូសជំរុញទី៤ មានចំនួន១,៥៣១នាក់។

ការចាក់វ៉ាក់​សាំងកូវីដ-១៩ជូនប្រជាពលរដ្ឋចាប់ពីអាយុ៣ឆ្នាំឡើងទៅ ​ដំណើការជារៀងរាល់ថ្ងៃ នៅទីតាំងសុខាភិបាល សាធារណៈទូទាំងប្រទេសកម្ពុជា។

បើតាមលោកវេជ្ជបណ្ឌិត ឌី ប៊ុនលន ប្រធានក្រុមការងារចាក់វ៉ាក់សាំងកូវីដ ​នៅមន្ទីរពេទ្យបង្អែក ច្បារអំពៅ រាជធានីភ្នំពេញ បានឱ្យដឹងថា បច្ចុប្បន្ន ដំណើរការចាក់វ៉ាក់សាំងកូវីដដូសជំរុញ មាន​សម្ទុះកើន ឡើងជាងមុន បន្ទាប់ពីជំងឺកូវីដមានការឆ្លងសារឡើងវិញ។

ក្រៅពីនេះ លោកវេជ្ជបណ្ឌិត ​បានជំរុញដល់ប្រជាពលរដ្ឋទូទៅ និងជាពិសេសពលរដ្ឋ​មានកូនស្ថិត​ក្នុងក្រុមអាយុនេះ ត្រូវរួសរាន់នាំពួកគេទៅចាក់វ៉ាក់សាំង ចាប់ពីដូសមូលដ្ឋាន ដល់ដូសជំរុញ។

អាណាព្យាបាល ដែលបាននាំកូនៗចូលចាក់វ៉ាក់សាំង ​នៅមន្ទីរពេទ្យបង្អែកច្បារអំពៅ​ បាន​លើកឡើងថា​ ការសម្រេចចិត្តនាំកូនៗមកចាក់វ៉ាក់សាំងដូសជំរុញ ​គឺដើម្បីធានាសុវត្ថិភាព ការពារ​ខ្លួនកុំឲ្យឆ្លង ជំងឺកូវីដ ​ធ្វើដំណើរទៅណាមកណាស្រួល ​ជាពិសេសពេលពួកគេនៅសាលារៀន។ ជាមួយគ្នានេះ កុមារ និង យុវវ័យ បានបង្ហាញការសប្បាយចិត្តពេលទទួលបានការចាក់វ៉ាក់​សាំង​ដូសជំរុញ។

បច្ចុប្បន្ន ការចាក់វ៉ាក់សាំងបង្កាជំងឺកូវីដ-១៩ ត្រូវបានរាជរដ្ឋាភិបាលបន្តចាត់ទុកជាយុទ្ធសាស្រ្ត​ដ៏សំខាន់​មួយ ដើម្បីធានានិរន្តរភាពដំណើរការសេដ្ឋកិច្ច​ និងការរស់នៅជាធម្មតា​ តាមបែបគន្លថ្មី ជាមួយវត្ត មានជំងឺកូវីដ-១៩៕អត្ថបទ៖ ទូច សោភ័ណ