​អាមេរិក៖ ទោះបីជា​ការប្រកាស​រប​ស់​រដ្ឋាភិបាល​ក្រុង​ New York​ លោក Andrew Cuomo ថា​ មិន​យូរ​ប៉ុន្មាន​មនុស្ស​គ្រប់រូប​ដែល​មាន​អាយុ​ចាប់ពី​ ១៦​ឆ្នាំ​ឡើង​ទៅ​នឹង​មាន​សិទ្ធិ​ទទួល​បាន​ការ​ចាក់​វ៉ាក់សាំង​បង្ការ​ជំងឺ COVID-19 ដែល​ចាប់ផ្ដើម​ពី​ថ្ងៃ​ទី​៦ ខែ​មេសាក៏ដោយ​ភាគច្រើន​នៅ​ក្នុង​ទីក្រុង New York នៅ​តែ​ព្យាយាម​ស្វែងរក​ការ​ណាត់​ជួប ​ជាមួយ​ពលរដ្ឋ​ដើម្បី​ផ្ដល់​វ៉ាក់សាំង​។​

​នោះ​ជា​មូលហេតុ​មួយ​ក្នុងចំណោម​មូលហេតុ​ជាច្រើន ដែល​មណ្ឌល​សុខភាព ​និង​មន្ទីរពេទ្យ​នានា​ក្នុង​ទីក្រុង​ New York​ ​ឥឡូវ​កំពុង​សហការ​ជាមួយ​អង្គការ​សហគមន៍​ នៅ​ទូទាំង​ទីក្រុង ដាក់​រថយន្ត​ក្រុង​ចាក់​វ៉ាក់សាំង​ចល័ត​នៅ​តាម​សង្កាត់​នានា​ ដែល​ត្រូវការ​ជំនួយ​បំផុត​។​ អង្គការ Mixteca​ គឺជា​អង្គការ​មួយ​ក្នុងចំណោម​អង្គការ​ជាច្រើន​ ដែល​បាន​សហការ​ជាមួយ​ទីក្រុង​នេះ ដើម្បី​ជួយ​ប្រជាជន​នៅ​តំបន់​ឧទ្យាន ​Sunset Park និង​សង្កាត់ Greenwood​ នៅ​ជិត​ក្រុង​ New York​ ទទួល​វ៉ាក់សាំង​បង្ការ​។​ អ្នក​សម្រប​សម្រួល​កម្ម​វិធី​ផ្ដល់​វ៉ាក់សាំង​បង្ការ Mixteca លោកស្រី Nicole Rojas បាន​និយាយ​ថា “​វា​មាន​សារៈ​សំខាន់​ណាស់ ​ដែល​គ្លីនិក​ចល័ត​នេះ​មាន​វត្តមាន​នៅ​ក្នុង​សហគមន៍ ​ព្រោះ​វា​បង្ក​លក្ខណៈ​កាន់​តែ​ងាយ​ស្រួល ​ក្នុង​ការ​ធ្វើដំណើរ​។ វា​ជា​កន្លែង​មាន​សុវត្ថិភាព​។ វា​ជា​មជ្ឈមណ្ឌល​ដែល​សហគមន៍​បាន​ដឹង ​និង​ជឿជាក់​រួចហើយ​។

ពួកគេ​ដឹង​ថា​ យើង​នៅ​ទីនេះ​ដើម្បី​គាំទ្រ​ពួកគេ ​និង​តស៊ូ​មតិ​ដើម្បី​ពួកគេ ប្រសិនបើស្ថានភាព​ណាមួយ​កាន់តែ​តានតឹង​ខ្លាំង​។ ​ពួកគេ​ដឹង​ថា ​យើង​នឹង​ជួយ​គាំទ្រ​ពួកគេ ​និង​បកប្រែ​សម្រាប់​ពួកគេ​ប្រសិនបើ​ចាំបាច់​”។​ រថយន្តក្រុង​វ៉ាក់សាំង​ចល័ត​ នឹង​ស្ថិត​នៅ​ក្នុង​សង្កាត់​រយៈពេល ៣​ថ្ងៃ​បន្ទាប់មក​នឹង​ចេញទៅ​សង្កាត់​ផ្សេងទៀត​៕

អត្ថបទ៖ សុខមាន