ភ្នំពេញ​៖ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងលើកកម្ពស់គុណភាព និងសមធម៌សុខាភិបាលដំណាក់កាលទី២ បានអញ្ជើញជាអធិបតីក្នុងសិក្ខាសាលាស្តីពី ការរៀបចំផែនការប្រតិបត្តិប្រចាំឆ្នាំរបស់ គម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២ (H-EQIP 2) នាព្រឹកថ្ងៃទី១១ ខែកក្កដា ឆ្នាំ២០២២នេះ និងមានការចូលរួមពី តំណាងក្រសួងសេដ្ឋកិច្ច និងហិរញ្ញវត្ថុ តំណាងធនាគារពិភពលោក និងដៃគូពាក់ព័ន្ធដូចជា អូស្រ្តាលី អាល្លឺម៉ង់ កូរ៉េ និង Global Financing Facility (GFF) ព្រមទាំងមន្ទីរសុខាភិបាលនៃរដ្ឋបាលខេត្ត-រាជធានី ទាំង២៥។

​លោកជំទាវរដ្ឋលេខាធិការ និងជានាយកគម្រោង បានគូសបញ្ជាក់ថា សិក្ខាសាលារយៈពេល២ថ្ងៃនេះ ផ្តល់ឱកាសឱ្យអ្នកចូលរួមទាំងអស់ ក្នុងការពិនិត្យ និងរៀបចំផែនការប្រតិបត្តិសម្រាប់រយៈពេល១៨ខែដំបូង របស់គម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២។ ដើម្បីរៀបចំផែនការឱ្យសម្រេចបានទៅតាមគោលដៅកំណត់ អង្គភាពប្រតិបត្តិនីមួយៗ ត្រូវកំណត់អាទិភាពចំនួន៤គឺ៖ 

១) លើកកម្ពស់ការប្រើប្រាស់មូលនិធិសមធម៌ និងការគាំពារហិរញ្ញវត្ថុ ដែលនឹងគាំទ្រចក្ខុវិស័យរបស់ រាជរដ្ឋាភិបាលក្នុងការឈានឆ្ពោះទៅសម្រេចបានការគ្របដណ្តប់សុខភាពជាសកល នៅកម្ពុជានាឆ្នាំ២០៣០។ 

២) ពង្រឹងគុណភាព និងសមត្ថភាពផ្តល់សេវាសុខាភិបាល ព្រមទាំងពង្រីកការផ្តល់សេវាជំងឺមិនឆ្លង និងការចូលរួមរបស់សហគមន៍។

៣) ការត្រួតពិនិត្យតាមដាន និងគ្រប់គ្រងសមភាពយេនឌ័រ និងសង្គម

៤) ការឆ្លើយតបបន្ទាន់នឹងគ្រោះអាសន្ន ដែលនឹងផ្តល់ការឆ្លើយតបបានទាន់ពេលវេលា និងមានប្រសិទ្ធភាពនៅពេលមានគ្រោះអាសន្ន ។

លោកជំទាវ វេជ្ជបណ្ឌិត យក់ សម្បតិ្ត ក៏បានថ្លែងអំណរគុណ និងកោតសរសើរ ដល់មន្រ្តីសុខាភិបាលគ្រប់លំដាប់ថ្នាក់ អាជ្ញាធរមូលដ្ឋាន និងដៃគូអភិវឌ្ឍន៍ទាំងអស់ ដែលបានចូលរួមចំណែកក្នុងការប្រយុទ្ធ នឹងជំងឺកូវីដ-១៩ នៅកម្ពុជា ក្នុងរយៈពេលជាង២ឆ្នាំកន្លងមកនេះ ដែលជោគជ័យនេះកើតឡើង ពីការដឹកនាំដ៏ឈ្លាសវៃប្រកប ដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ជាអគ្គមេបញ្ជាការដឹកនាំចង្អុលបង្ហាញផ្ទាល់។  

លោកជំទាវ រដ្ឋលេខាធិការ បានសង្កត់ធ្ងន់ថា គម្រោងលើកកម្ពស់គុណភាព និងសមធម៌សុខាភិបាលដំណាក់កាលទី១ បានទទួលលទ្ធផលគួរជាទីមោទនៈ ដែលអាចយកជាមេរៀនបទពិសោធន៍ សម្រាប់ការអនុវត្តគម្រោងដំណាក់កាលទី២។ លោកជំទាវ វេជ្ជបណ្ឌិត ក៏បានលើកទឹកចិត្តសិក្ខាកាមទាំងអស់ចែករំលែកនូវបទពិសោធន៍ល្អៗ សម្រាប់ជាធាតុចូលបន្ថែម ព្រមទាំងរៀបចំផែនការប្រតិបត្តិសម្រាប់រយៈពេល១៨ខែដំបូង ដើម្បីធានាការអនុវត្តគម្រោងប្រកបដោយប្រសិទ្ធភាព និងប្រសិទ្ធផល។

ជាមួយគ្នានោះដែរអ្នកឯកទេសសុខភាពជាន់ខ្ពស់របស់ធនាគារពិភពលោក លោកស្រី លី ណារ៉េត បានសម្តែងនូវការអបអរសាទរចំពោះរាជរដ្ឋាភិបាលកម្ពុជា ក៏ដូចជាក្រសួងសុខាភិបាល ក្នុងការរៀបចំគម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២ នេះប្រកបដោយជោគជ័យ។ ជាពិសេសគម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២ មានរយៈពេលប្រាំឆ្នាំ និងមានសុពលភាពអនុវត្តចាប់ពីថ្ងៃទី៧ ខែកក្កដា ឆ្នាំ២០២២ តទៅ។ សេវាពិនិត្យរកនិងព្យាបាលជំងឺមិនឆ្លង និងត្រូវពង្រីកក្នុងវិសាលភាពទូទាំងប្រទេស ហើយសេវាពិនិត្យរកនិងព្យាបាលការរលាកមុនដំណាក់កាលមហារីកមាត់ស្បូន នឹងត្រូវពង្រីកបន្ថែម ចំនួន៥០០មណ្ឌលសុខភាព និង៦០មន្ទីរពេទ្យបង្អែក។

លោកស្រីតំណាងធនាគារពិភពលោក ក៏បានថ្លែងអំណរគុណដល់លោកជំទាវនាយកគម្រោង ដែលបានចំណាយពេលវេលាអញ្ជើញជាអធិបតីក្នុងសិក្ខាសាលានាថ្ងៃនេះ និងបានថ្លែងអំណរគុណក្រសួងសេដ្ឋកិច្ច និងហិរញ្ញវត្ថុ និងក្រសួងសុខាភិបាល ដែលតែងតែសហការសម្របសម្រួលអនុវត្តគម្រោងបានទទួលជោគជ័យ៕ ​អត្ថបទ ៖ រដ្ឋា