ភ្នំពេញ៖ ដើម្បីចូលរួមបង្ការ និងទប់ស្កាត់ជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈនេះ ឯកឧត្ដម ឃួង ស្រេង អភិបាលរាជធានីភ្នំពេញបានដាក់ចេញជាវិធានការ និងការណែនាំជាច្រើន ជាមួយនិងការឧបត្ថមជាឧបករណ៍ សម្ភារៈ ស្បៀងអាហារ និងថវិកាផងដែរ ដើម្បីឱ្យអាជ្ញាធរខណ្ឌទាំង១៤ និងសមត្ថកិច្ចពាក់ព័ន្ធចូលរួមទប់ស្កាត់ជំងឺនេះឱ្យមានប្រសិទ្ធិភាព ពិសេសបញ្ចប់ឱ្យបានលឿននូវព្រឹត្តិការណ៍សហគមន៍២០កុម្ភៈនេះ ។

  លោក កែ ពន្លក នាយករងរដ្ឋបាលរាជធានី បានឱ្យដឹងនៅថ្ងៃទី៣០ ខែមីនា ឆ្នាំ២០២១នេះ ថា ឯកឧត្ដមអភិបាលរាជធានីភ្នំពេញ ដោយការយកចិត្តទុកដាក់ខ្ពស់ចំពោះ សុខមាលភាពប្រជាពលរដ្ឋ ពិសេសទប់ស្កាត់ឱ្យបាននូវការរីករាលដាលជម្ងឺកូវីដ-១៩ នៅថ្ងៃនេះ លោកបានផ្តល់ជូននូវធុងបាញ់ថ្នាំសម្លាប់មេរោគ និងថវិកាមួយចំនួនជូនដល់ខណ្ឌទាំង១៤ ដោយក្នុង១ខណ្ឌទទួលបានធុងបាញ់ថ្នាំសម្លាប់មេរោគចំនួន ៣គ្រឿង ជាមួយទឹកថ្នាំ និងថវិកា ចំនួន ១០លានរៀលផងដែរ ដើម្បីជួយសម្រាលការចំណាយដល់អាជ្ញាធរខណ្ឌ ក្នុងការចូលរួមបង្ការ និងទប់ស្កាត់នូវជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈនេះ ។

 គួរបញ្ជាក់ថា កន្លងមកនេះ ឯកឧត្ដម ឃួង ស្រេង តែងបានប្រគល់ម៉ាស អាកុល ជែល ម៉ាស៊ីនវាស់កំដៅ ស្បៀងអាហារ ជូនទៅខណ្ឌទាំង១៤ កងកម្លាំងមានសមត្ថកិច្ច និងផ្សារទាំង២៥នៅក្នុងរាជធានី ជាច្រើនលើកច្រើនសាររួចមកហើយ ជាមួយនិងការណែនាំឱ្យអាជ្ញាធរខណ្ឌទាំង១៤ធ្វើការផ្សព្វផ្សាយអំពីវិធានការបង្ការ និងទប់ស្កាត់ជំងឺកូវីដ-១៩ ដើម្បីឱ្យប្រជាពលរដ្ឋទាំងអស់ចូលរួមទប់ស្កាត់ជំងឺនេះទាំងអស់គ្នា ពិសេសគឺការអនុវត្តឱ្យបានវិធានការ៣កុំ និង៣ការពារ៕អត្ថបទ ៖ វណ្ណដា