ភ្នំពេញ៖ ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ ប្រាប់BTV ព័ត៌មាន នាព្រឹកថ្ងៃទី១២ ខែកក្កដា ឆ្នាំ២០២២នេះថា គិតត្រឹមថ្ងៃម្សិលមិញ នៅរាជធានី​ភ្នំពេញ​​មានអ្នកឆ្លងជំងឺកូវីដ-១៩ ប្រមាណ ៣០នាក់ បន្ទាប់ពីកម្ពុជាគ្មានករណីឆ្លងរយៈពេល ៥២​ថ្ងៃមកហើយនោះ។

ឯកឧត្តមវេជ្ជបណ្ឌិតបន្តទៀតថា កម្ពុជាចាប់ផ្តើមមានករណីឆ្លងថ្មីឡើងវិញ ចាប់ពីថ្ងៃទី២៨ ខែ​មិថុនា រហូតមកដល់ថ្ងៃទី១១ ខែកក្កដា ឆ្នាំ២០២២ ក្នុងរាជធានីភ្នំពេញ មានអ្នកជំងឺកូវីដ-១៩ ប្រមាណ៣០នាក់ គ្មានរោគសញ្ញាធ្ងន់ធ្ងរ គឺសុទ្ធតែព្យាបាលនៅតាមផ្ទះរៀងៗខ្លួន គ្មាន​អ្នក​ជំងឺ​កូវីដ-១៩ មកសម្រាកព្យាបាលនៅតាមមនី្ទរពេទ្យនោះទេ។ បើទោះបីជាជំងឺកូវីដ-១៩ មាន​ការ​ឆ្លង​ឡើង​វិញ និងមានចំនួនតិចតួចក៏ដោយ ប៉ុន្តែគ្រប់មនី្ទរពេទ្យទាំងអស់ក្នុងមូលដ្ឋានរាជធានីភ្នំពេញ បាន​ត្រៀមរួចជាស្រេច ដើម្បីទប់ស្កាត់ការរីករាលដាលជំងឺដ៏កាចសាហាវនេះ។

ឯកឧត្តមវេជ្ជបណ្ឌិត ងី មានហេង ក៏សូមអំពាវនាវដល់ប្រជាពលរដ្ឋគ្រប់រូប បន្ត​រក្សា​ការ​ប្រុង​ប្រយ័ត្ន និងបន្តចូលរួមចាក់វ៉ាក់សាំងបង្ការជំងឺកូវីដ១៩ ដូសមូលដ្ឋាន និងដូសជំរុញ ទី៣ ទី៤ និង​ទី៥ ឲ្យបានគ្រប់ចំនួន។

ដោយឡែកការចាក់វ៉ាក់សាំងជូនប្រជាពលរដ្ឋ និងកុមារ អាយុចាប់ពី៣ឆ្នាំឡើង គិតត្រឹមថ្ងៃទី១១ ខែកក្កដា ឆ្នាំ២០២២៖

លទ្ធផលចាក់វ៉ាក់សាំង​ជូន​កុមារពី៣ឆ្នាំ ដល់ក្រោម៥ឆ្នាំ គោលដៅ៧២,៨៥៤នាក់

-ដូសទី១ ចាក់បានចំនួន៩៥.៦៣%, ដូសទី២ ចាក់បានចំនួន៦៥.៤៦% និងដូសទី៣ ចាក់បានចំនួន០.២៩%។

លទ្ធផលចាក់វ៉ាក់សាំងជូនកុមារអាយុ៥ឆ្នាំ គោលដៅ៤៩,៨៤៨នាក់

-ដូសទី១ ចាក់បានចំនួន១២២.២៧%, ដូសទី២ ចាក់បានចំនួន១០៣.៥២%, ដូសទី៣ ចាក់បានចំនួន១០.១៤% និងដូសទី៤ ចាក់បានចំនួន០.០៩%។

លទ្ធផលចាក់វ៉ាក់សាំងជូនកុមារអាយុចាប់ពី៦ឆ្នាំ ដល់ក្រោម១២ឆ្នាំ គោលដៅ២២១,១៣៦នាក់

-ដូសទី១ ចាក់បានចំនួន១០៦.៦៣%, ដូសទី២ ចាក់បានចំនួន១១១.៥៤%, ដូសទី៣ ចាក់បានចំនួន៦៨.២៦% និងដូសទី៤ ចាក់បានចំនួន០.៧៤%។

លទ្ធផលចាក់វ៉ាក់សាំងជូនកុមារអាយុចាប់ពី១២ឆ្នាំ ដល់ក្រោម១៨ឆ្នាំ គោលដៅ១៩១,៤៨៦នាក់

-ដូសទី១ ចាក់បានចំនួន១១៦.២៤%, ដូសទី២ ចាក់បានចំនួន១១៦.៦២%, ដូសទី៣ ចាក់បានចំនួន១០៦.៥០% និងដូសទី៤ ចាក់បានចំនួន១៧.៣៧% និងដូសទី៥ ចាក់បានចំនួន០.១៩%។

លទ្ធផលចាក់វ៉ាក់សាំងជូនប្រជាពលរដ្ឋអាយុចាប់ពី១៨ឆ្នាំឡើង គោលដៅ១,៤១២,៧៦៩នាក់

-ដូសទី១ ចាក់បានចំនួន១២៥.២៥%, ដូសទី២ ចាក់បានចំនួន១២១.៨៩%, ដូសទី៣ ចាក់បានចំនួន១០៥.១៣%, ដូសទី៤ ចាក់បានចំនួន៧៧.៨៧% និងដូសទី៥ ចាក់ចំនួនចំនួន៥.៣៦%៕ អត្ថបទ៖ រដ្ឋា